Balaan nga Pagtahod sa Sagrado nga mga Butang

Sa basahon sa Exodo, mobiyahe kita kauban ni Moises ngadto sa bakilid nga Bukid sa Horeb samtang iyang gibiyaan ang iyang matag adlaw nga mga kabalaka—butang nga kitang tanan kinahanglan nga andam sa pagbuhat—aron motan-aw sa nagdilaab nga sampinit nga wala masunog. Samtang mipaduol siya, “Miingon ang Ginoo taliwala sa kasampinitan, Moises, Moises. Mitubag siya, Unsa man. Ang Dios miingon, … huboa ang imong sandalyas, kay balaan ang dapit nga imong gitindogan.” Sa hilabihan nga balaan nga pagtahod, kamapaubsanon, ug kahibulong, gitangtang ni Moises ang iyang sandalyas ug giandam ang iyang kaugalingon sa pagpaminaw sa pulong sa Ginoo ug sa pagsinati sa Iyang balaan nga presensya.

Kanang sagrado nga kasinatian mao ang usa ka kasinatian nga puno sa balaan nga pagtahod tungod sa hilabihan nga pagdayeg, gikonektar ni Moises ngadto sa iyang balaanong pagkatawo ug, gani, ang mahinungdanong elemento sa iyang pagkausab gikan sa usa ka yanong magbalantay sa karnero ngadto sa usa ka bantogan nga propeta, nga naggiya niya sa paglakaw sa bag-ong dalan sa kinabuhi. Sa samang paagi, matag usa kanato makausab sa atong pagkadisipulo ngadto sa mas taas nga sundanan sa espirituwalidad pinaagi sa paghimo sa hiyas sa balaan nga pagtahod isip sagrado nga bahin sa atong espirituwal nga kinaiya.

Ang pulong nga balaan nga pagtahod mahimong masubay ngadto sa Latin nga pulong nga revereri, nga nagpasabot og “magbarog nga magdayeg.” Sa ebanghelyo, kini nga kahulogan nag-uban sa usa ka pagbati o kinaiya sa tinud-anay nga pagtahod, gugma, ug pagpasalamat. Ang ingon nga pagpahayag alang sa sagrado pinaagi niadtong adunay mahinulsolon nga kasingkasing ug lawom nga debosyon ngadto sa Dios ug ni Jesukristo naghatag og dugang nga kalipay sa ilang mga kalag.

Ang balaan nga pagtahod sa sagrado nga mga butang mao ang labing mahinungdanong pagpakita sa importante nga espirituwal nga kinaiya; kini ang produkto sa atong koneksiyon ngadto sa kabalaan ug nagpakita sa atong gugma ug kasuod sa atong Langitnong Amahan ug sa atong Manluluwas, si Jesukristo. Mao usab kini ang usa sa labing taas nga mga kasinatian sa kalag. Ang ingon niana nga hiyas naggiya sa atong mga hunahuna, kasingkasing, ug kinabuhi ngadto sa Dios. Gani, ang balaan nga pagtahod dili lang usa ka aspeto sa espirituwalidad; mao kini ang lintunganay niini—ang pundasyon diin ang espirituwalidad natukod, nagmugna og personal nga koneksiyon ngadto sa balaanon, sama sa gitudlo sa atong kabataan kon manganta sila og, “Kon ako magmatinahuron man, Naa si Jesus ug Amahan.”

Isip mga disipulo ni Jesukristo, kita gidapit sa pag-ugmad sa gasa sa balaan nga pagtahod sa atong kinabuhi aron maablihan ang atong kaugalingon ngadto sa mas sinsero nga komunikasyon ngadto sa Dios ug sa Iyang Anak nga si Jesukristo, sa samang paagi magpalig-on sa atong espirituwal nga kinaiya. Kon kita adunay mas daghang ingon niana nga mga pagbati sa atong kasingkasing, sa walay pagduhaduha adunay mas dakong kalipay ug kamaya sa atong kinabuhi, ug gamay ra ang luna alang sa kasubo ug kaguol. Atong hinumdoman nga ang pagpakita og balaan nga pagtahod sa sagrado nga mga butang maghatag og dakong kahulogan sa unsay atong gibuhat kada adlaw ug mopalig-on sa atong pagbati sa pagpasalamat—hilabihan nga pagdayeg, pagtahod, ug gugma alang sa mas halangdon ug mas balaan nga mga butang.

Walay swerte, nagpuyo kita sa kalibotan diin ang pagpakita og balaan nga pagtahod sa sagrado nga mga butang nag-anam ka dili komon. Gani, ang kalibotan modayeg sa mga butang nga kulang sa pagtahod, sama sa mga pagsuta sa bisan unsa nga makita sa magasin, programa sa telebisyon, o sa internet. Ang pagkawalay pagtahod alang sa sagrado moresulta sa nagkaanam ka kaswal sa kinaiya ug walay pagpakabana nga pamatasan, nga mahimong hinungdan nga diha dayon ang usa ka henerasyon mosangpot sa pagkawalay pagtagad ug motukmod sa sunod nga henerasyon ngadto sa kaalaotan.

Ang pagkawalay pagtahod modala usab nato palayo nianang mga kasabotan nga gitanyag sa mga pakigsaad ngadto sa Dios ug mopakunhod sa atong pagbati sa pagpanubag sa atubangan sa Dios. Ang resulta, anaa kita sa risgo sa pagpakabana lamang sa atong kaugalingong kaharuhay; pagtagbaw sa atong dili makontrolar nga gana; ug sa kataposan moabot ngadto sa punto sa pagsalikway sa sagrado nga mga butang, gani sa Dios, ug dayon sa atong balaanong kinaiyahan isip mga anak sa Langitnong Amahan. Ang pagkawalay pagtahod sa sagrado nga mga butang mopalambo sa mga katuyoan sa kaaway pinaagi sa pagbalda sa atong sensitibo nga mga paagi sa pagdawat sa pagpadayag nga mahinungdanon alang sa atong espirituhanong pagsugakod sa atong panahon.

Ang kahulogan ug kaimportante sa balaan nga pagtahod sa unsay sagrado maayo nga pagkalatid diha sa mga kasulatan. Usa ka sanglitanan diha sa Doktrina ug mga Pakigsaad ingon og nagpasabot nga ang balaan nga pagtahod ngadto sa atong Langitnong Amahan ug sa Iyang Anak nga si Jesukristo usa ka mahinungdanong hiyas alang niadtong makaadto sa celestial nga gingharian.

Isip usa ka simbahan naningkamot kita sa paghupot sa Amahan ug sa Anak sa hilabihan ka sagrado ug pagtahod diha sa matag aspeto, lakip na sa paagi sa atong paghulagway sa Ilang mga imahe. Ang giya sa Espiritu Santo usa ka mahinungdanong elemento sa pagtino kon sa unsang paagi nga kini nga mga imahe magpakita sa sagrado nga kinaiyahan, karakter, ug diosnong mga hiyas sa Amahan ug Anak. Mag-amping gayod kita nga malikayan ang paghulagway sa mga elemento nga makabalda sa atong nag-unang gitutokan diha sa atong Langitnong Amahan ug sa Iyang Anak, si Jesukristo, ug sa Ilang mga pagtulun-an, lakip na kon unsaon nato paggamit ang moderno nga mga himan nga gitanyag sa teknolohiya, sama sa paggamit sa artificial intelligence (AI) sa paghimo og content ug mga imahe.

Kining sama nga baroganan magamit ngadto sa bisan unsa nga tinubdan sa impormasyon nga anaa pinaagi sa opisyal nga mga pamaagi sa komunikasyon sa Simbahan. Matag leksiyon, basahon, manwal, ug mensahe mainampingon nga gihimo ug giaprobahan ubos sa direksiyon sa Espiritu sa pagseguro nga atong mapabilin ang sagrado nga hiyas, mga mithi, ug mga sumbanan sa ebanghelyo ni Jesukristo. Sa bag-ohay lang nga mensahe alang sa mga young adult sa Simbahan, si Elder David A. Bednar mitudlo, “Sa pagnabigar sa komplikadong mga interseksiyon sa espirituwalidad ug sa teknolohiya, ang mga Santos sa Ulahing mga Adlaw kinahanglang mapainubsanon ug mainampoon nga (1) moila sa mga baroganan sa ebanghelyo nga makagiya sa ilang paggamit sa artificial intelligence ug (2) sinsero nga maningkamot alang sa pagpakig-uban sa Espiritu Santo ug sa espirituhanong gasa sa pagpadayag.”

Akong minahal nga mga kaigsoonan, bisan ingon ka taas ang kalamboan sama sa nahitabo sa moderno nga teknolohiya, dili kini makatupong sa katalagsaon, kadalaygon, ug kanindot nga makaplagan diha sa matang sa balaan nga pagtahod nga nagagikan sa impluwensya sa Espiritu Santo. Isip mga sumusunod ni Kristo, kinahanglan kita nga mag-amping nga dili mohuyang ang atong koneksiyon sa Dios ug sa Iyang Anak pinaagi sa paggamit sa hinimo sa AI nga content ug mga imahe sa dili tukmang paagi. Kinahanglan nga atong hinumdoman nga ang pagsalig sa modernong teknolohikal nga “gahom sa tawo” dili tukma ug dili matinahoron nga puli alang sa inspirasyon, paghatag og kaayohan, ug pagsaksi nga madawat lamang pinaagi sa gahom sa Espiritu Santo. Sama sa gipahayag ni Nephi: “O Ginoo, misalig ako kanimo, ug mosalig ako kanimo hangtod sa hangtod. Dili ako mobutang sa akong pagsalig sa gahom sa tawo.”

Sa laing pagpadayag, si Propeta Joseph Smith gimandoan nga ang mga templo nga gitukod ngadto sa Ginoo kinahanglan nga mahimong usa ka dapit sa balaan nga pagtahod ngadto Kaniya. Sa tibuok niya nga pangalagad, ang atong minahal nga propeta, si Presidente Russell M. Nelson, kusganong mipasabot bahin sa atong pagsimba inubanan sa balaan nga pagtahod diha sa sagrado nga templo. Diha sa balay sa Ginoo, gitudloan kita mahitungod sa pagsulod sa balaan nga presensya sa Amahan ug sa Anak. Nakita ko kini kanunay nga matulun-anon ug gani makadasig nga ang usa sa labing una nga mga butang nga atong buhaton sa pagsulod sa templo ug sa pag-andam sa atong kaugalingon sa pag-apil sa sagrado nga mga ordinansa didto mao ang pagtangtang sa atong mga sapatos ug pag-ilis ngadto sa puti nga sinina. Sama ni Moises, kon kita matinuoron, atong mahibaloan nga ang pagtangtang sa atong kalibotanon nga mga sapatos mao ang sinugdanan sa pagtikang ngadto sa balaan nga dapit ug mausab sa mas halangdon ug mas balaan nga mga paagi.

Mga kaigsoonan, dili kinahanglan nga mokatkat kita sa tumoy sa bukid, sama sa gibuhat ni Moises, aron madiskobrehan ang balaan nga pagtahod sa sagrado nga mga butang ug mausab ang atong pagkadisipulo ngadto sa mas lawom nga lebel sa espirituwalidad ug debosyon. Kini atong makaplagan, pananglitan, samtang kita naningkamot sa pagpanalipod sa atong panimalay gikan sa kalibotanong mga impluwensya. Matuman kini pinaagi sa sinsero ug tinud-anay nga pag-ampo sa atubangan sa Langitnong Amahan pinaagi sa ngalan ni Jesukristo ug sa pagtinguha nga mas makaila sa atong Manluluwas pinaagi sa atong makugihon nga pagtuon sa pulong sa Dios nga makita diha sa mga kasulatan ug sa mga pagtulun-an sa atong mga propeta. Dugang pa, ang ingon nga espirituwal nga pagkausab moabot kon kita maningkamot sa pagtahod sa mga pakigsaad nga atong gihimo ngadto sa Ginoo pinaagi sa pagpakabuhi nga masulundon sa mga sugo. Kini nga mga paningkamot magdala og hilom ug tinuod nga kalinaw sa atong mga kasingkasing. Ang pagtutok sa ingon nga mga buhat seguradong makatabang nga mausab ang atong mga panimalay ngadto sa may balaan nga pagtahod nga mga dapit sa espirituwal nga kadangpan—personal nga mga sangtuwaryo sa hugot nga pagtuo diin ang Espiritu nagpuyo, sama gayod sa kasinatian ni Moises sa bukid.

Kita usab makasinati nianang espirituwal nga pagkausab kon kita matinud-anong moapil sa tulumanon sa pagsimba diha sa Simbahan, lakip na sa pagpunting sa atong mga kasingkasing ngadto sa Ginoo pinaagi sa atong sinsero nga pagkanta sa sagrado nga mga himno. Ang pagsalikway—sama ni Moises—sa kalibotanong mga makabalda, ilabi na sa atong mga selpon o bisan unsang butang nga wala mahiuyon sa sagrado nga higayon, makapahimo nato nga ang atong tanang pagtagad anaa sa pag-ambit sa sakramento, nga ang atong mga hunahuna ug kasingkaisng nakatutok sa Manluluwas ug sa Iyang maulaong sakripisyo uban sa atong kaugalingong mga pakigsaad. Ang ingon nga pagtutok diha sa sakramento mopasiugda og may balaan nga pagtahod nga gutlo sa pagbag-o sa atong komunikasyon uban sa Manluluwas ug ang Igpapahulay mahimong usa ka kahimut-an ug makausab sa atong kinabuhi.

Sa kataposan, kita makasinati niining espirituwal nga kausaban sa atong pagkadisipulo kon kita kanunay nga mosimba diha sa bukid sa balay sa Ginoo—atong balaan nga mga templo—ug maningkamot nga magpakabuhi uban sa kamasaligon sa pakigsaad, ilabi na kon kita nag-atubang og mga pagsulay sa mortal nga kinabuhi.

Ang akong asawa ug ako personal nga nakasinati og pipila ka higayon sa sagrado nga bukid inubanan sa balaan nga pagtahod samtang naningkamot kami sa paggamit niini nga mga baroganan sa among kinabuhi, nga nakahimo og makahuloganon nga pagkausab sa among pagkadisipulo. Nakahinumdom ko nga murag kagahapon lang nga naglakaw sa sementeryo sa wala pa ilubong ang among ikaduhang anak, nga natawo nga kulang sa bulan ug namatay, samtang ang akong asawa nagpaalim pa sa ospital. Nakahinumdom ko nga nag-ampo sa Dios pinaagi sa mainiton ug balaan nga pagtahod, nangayo og tabang nga makasugakod nianang lisod nga pagsulay. Dihadiha dayon, nakadawat ko og klaro ug gamhanan nga espirituwal nga kaseguroan sa akong kasingkasing: Ang tanan mamaayo ra sa among kinabuhi kon ang akong asawa ug ako molahutay, mohupot diha sa kalipay nga nagagikan sa pagsunod sa ebanghelyo ni Jesukristo. Ang ingon ka bug-at, makasubo nga hagit nianang higayona nahimong sagrado, may balaan nga pagtahod nga kasinatian, usa ka mahinungdanon nga kasinatian nga nakatabang nga matunhay ang among pagtuo ug nakahatag namo og pagsalig sa mga pakigsaad nga among gihimo ngadto sa Ginoo ug sa Iyang mga saad alang nako ug sa akong pamilya.

Akong mga kaigsoonan, ang balaan nga pagtahod sa sagrado nga mga butang nagpasiugda og tinud-anay nga pagpasalamat, nagpalambo sa tinuod nga kalipay, naggiya sa atong mga hunahuna ngadto sa pagpadayag, ug nagdala og mas dakong kalipay sa atong kinabuhi. Nagbutang kini sa atong mga tiil diha sa balaan nga dapit ug nagbayaw sa atong mga kasingkasing ngadto sa Dios.

Ako mopamatuod kaninyo nga kon kita maningkamot sa paggamit niana nga hiyas sa atong inadlaw nga kinabuhi, kita makahimo sa pagpalambo sa atong kamapaubsanon, sa pagpalapad sa atong panabot bahin sa kabubut-on sa Dios alang nato, ug sa pagpalig-on sa atong pagsalig sa mga saad diha sa mga pakigsaad nga atong gihimo ngadto sa Ginoo. Ako mosaksi nga kon kita mohangop niini nga gasa sa balaan nga pagtahod sa sagrado nga mga butang—diha man sa bukid sa balay sa Ginoo, sa meetinghouse, o sa atong kaugalingong mga panimalay—kita mapuno sa hilabihan nga pagdayeg ug kahingangha samtang kita mokonektar ngadto sa hingpit nga gugma sa atong Langitnong Amahan ug ni Jesukristo. Uban sa balaan nga pagtahod ako mosaksi niini nga mga kamatuoran sa sagrado nga ngalan sa atong Manluluwas ug Manunubos, si Jesukristo, amen.