Ang Plano sa Kaluoy

Sa miaging Abril, human dayon sa sadya nga mga balita nga ang Kirtland Temple naangkon na og balik sa Simbahan, si Presidente Russell M. Nelson midapit kanato nga tun-an ang pagpahinungod nga pag-ampo sa Kirtland Temple, narekord sa seksiyon 109 sa Doktrina ug mga Pakigsaad Ang pagpahinungod nga pag-ampo, miingon si Presidente Nelson, “usa ka panudlo kon sa unsa nga paagi nga ang templo espirituwal nga makahatag kaninyo ug kanako og gahom aron makaatubang sa mga hagit sa kinabuhi niining kataposang mga adlaw.”

Segurado ko nga ang pagtuon ninyo sa seksiyon 109 naghatag og mga pagtulun-an nga mipanalangin kaninyo. Karong gabhiona, mopakigbahin ko og pipila ka mga butang nga akong nakat-onan dihang gisunod nako ang pagdapit sa propeta. Ang kalinaw nga akong naangkon gumikan sa akong pagtuon nagpahinumdom kanako nga ang Ginoo manggiluy-on ug nga ang plano sa Langitnong Amahan sa kaluwasan sa tinuod usa ka plano sa kaluoy.

Tingali namatikdan ninyo nga, “ang bag-ong gitawag nga mga misyonaryo giawhag nga modawat sa pagtuga sa templo diha dayon kutob sa mahimo ug sa pagtambong sa templo sa kanunay kutob sa itugot sa kahimtang.” Kon makadawat na sa pagtuga, sila usab “mahimong moserbisyo isip mga worker … sa templo sa dili pa sila magsugod sa misyonaryo nga pagserbisyo.”

Ang panahon sulod sa templo sa dili pa mosulod sa missionary training center (MTC) mahimong talagsaon nga panalangin alang sa bag-ong mga misyonaryo samtang magkat-on sila og dugang pa mahitungod sa mga pakigsaad sa templo sa dili pa mopakigbahin niana nga mga pakigsaad ngadto sa kalibotan.

Apan sa pagtuon sa seksiyon 109, akong nakat-onan nga, didto sa templo, ang Dios mohatag og gahom sa bag-ong mga misyonaryo—gani, sa tanan kanato—sa dugang, sagrado nga paagi. Sa pagpahinungod nga pag-ampo, nga gihatag pinaagi sa pagpadayag, si Joseph smith nag-ampo nga “sa panahon nga ang imong mga sulugoon mogula gikan sa imong balay … aron mohatag og pagpamatuod sa imong ngalan,” ang “mga kasingkasing” sa “tanang katawhan”mahumok”—silang mga “bantogan sa yuta”, ug “tanang mga kabos, ang timawa, ug [ang] mga sinakit.” Nag-ampo siya nga ang ilang “sayop nga mga paghukom mahanaw sa atubangan sa kamatuoran, ug ang imong katawhan makaangkon og kaluoy sa panan-aw sa tanan; nga ang tanang lumulupyo sa yuta masayod nga kami, ang imong mga sulugoon, nakadungog sa imong tingog, ug nga kami imong gipadala.”

Usa kini ka matahom nga saad alang sa bag-ong natawag nga misyonaryo—nga ang sayop nga paghukom “mahanaw sa atubangan sa kamatuoran,” aron “makaangkon og kaluoy sa panan-aw sa tanan,” ug aron ang kalibotan masayod nga sila gipadala sa Ginoo. Tanan kita seguradong nagkinahanglan sa sama niining mga panalangin. Pagkadakong panalangin nga makabaton og mga kasingkasing nga mahumok sa atong pakig-atubang sa mga silingan ug mga kaubanan sa trabaho. Ang pagpahinungod nga pag-ampo wala mohatag og eksakto gayod nga pagpasabot kon sa unsang paagi ang atong panahon sulod sa templo mopahumok sa mga kasingkasing sa uban, apan kombinsedo ko nga may kalabotan kini kon sa unsang paagi ang mga oras sulod sa balay sa Ginoo mopahumok sa kaugalingon natong mga kasingkasing pinaagi sa pagpatutok kanato ngadto ni Jesukristo ug sa Iyang kaluoy.

Dihang gitun-an nako ang pagpahinungod nga pag-ampo sa Kirtland, natandog usab ako nga si Joseph balik-balik nga nangamuyo alang sa kaluoy—alang sa mga miyembro sa Simbahan, alang sa mga kaaway sa Simbahan, alang sa mga lider sa nasod, alang sa mga nasod sa yuta. Ug, sa personal gayod, nangamuyo siya sa Ginoo sa paghinumdom kaniya ug pagbaton og kaluoy diha sa iyang pinalangga nga si Emaa ug sa ilang mga anak.

Unsa kahay gibati ni Joseph dihang, usa ka semana ang milabay, sa buntag sa Pagkabanhaw, Abril 3, 1836, didto sa Kirtland Temple, ang Manluluwas nagpakita kaniya ug ni Oliver Cowdery ug, sigon sa narekord sa seksiyon 110 sa Doktrina ug mga Pakigsaad, nga nag-ingon, “Akong gidawat kini nga balay, ug ang akong ngalan maania dinhi; ug akong ipakita ang akong kaugalingon ngadto sa akong katawhan tungod sa kaluoy dinhi niini nga balay.” Kini nga pagsaad og kaluoy seguradong dunay espesyal nga kahulogan ni Joseph. Ug sigon sa gitudlo ni Presidente Nelson sa milabayng Abril, kini usab nga saad “magamit sa matag gipahinungod nga templo karon.”

Adunay daghan kaayong paagi diin kitang matag usa makakaplag og kaluoy sa balay sa Ginoo. Tinuod kini sukad pa sa unang pagsugo sa Ginoo ni Israel sa pagtukod og usa ka tabernakulo ug ibutang diha sa taliwala niini ang “[trono sa kaluoy].” Sulod sa templo, makakaplag kita og kaluoy diha sa mga pakigsaad nga atong gihimo. Kadto nga mga pakigsaad, agig dugang sa pakigsaad sa bunyag, maghigot kanato ngadto sa Amahan ug sa Anak ug maghatag kanato og nagkadako nga akses sa unsay gitudlo ni Presidente Nelson nga “usa ka espesyal nga matang sa gugma ug kaluoy … gitawag og hesed” sa Hebreo.

Makakaplag kita og kaluoy pinaagi sa oportunidad nga maselyo sa atong mga pamilya alang sa kahangtoran. Sulod sa templo, mas tin-aw natong masabtan nga ang Paglalang, ang Pagkapukan, ang maulaong sakripisyo sa Manluluwas, ug ang atong katakos nga makasulod og balik sa presensiya sa atong Langitnong Amahan—sa pagkatinuod, ang matag bahin sa plano sa kaluwasan—usa ka pagpakita sa kaluoy. Tingali ginaingon nga ang plano sa kaluwasan usa ka plano sa kalipay tungod kay sakto gayod nga kini usa ka “plano sa kaluoy”.

Mapasalamaton ako sa matahom nga saad diha sa seksiyon 110 nga ang Ginoo mopakita sa Iyang Kaugalingon uban sa kaluoy sulod sa Iyang mga templo. Mapasalamaton usab ako sa unsay gipadayag niini mahitungod kon sa unsang paagi ang Ginoo mopakita sa Iyang Kaugalingon uban sa kaluoy sa matag higayon nga kita, sama ni Joseph, mangamuyo og kaluoy.

Ang pangamuyo ni Joseph Smith alang sa kaluoy diha sa seksiyon 109 dili ang unang higayon nga ang iyang pagpangamuyo og kaluoy nag-aghat og pagpadayag. Didto sa Sagradong Kakahoyan, ang batan-ong si Joseph nag-ampo dili lang aron masayod kon hain nga Simbahan ang tinuod, apan miingon usab siya nga siya “[nag-ampo] sa Ginoo og kaluoy, kay walay lain nga akong kaduolan ug kapangayoan og kaluoy.” Sa bisan unsa pa man ang iyang pag-ila nga siya nagkinahanglan og kaluoy nga ang Ginoo lamang ang makahatag nagtabang nga maabli ang mga bintana sa langit. Paglabay sa tulo ka tuig ang anghel nga si Moroni nagpakita , human sa unsay gisulti ni Joseph nga maoy iyang “pag-ampo ug pangamuyo ngadto sa Magkagagahom nga Dios alang sa kapasayloan sa akong tanan nga mga sala ug kahilayan.”

Kini nga sundanan sa pagpadayag human sa pangamuyo alang sa kaluoy usa ka butang nga diha sa mga kasulatan. Si Enos nakadungog sa tingog sa Ginoo human lamang nga siya nag-ampo alang sa kapasayloan. Ang pagkakabig sa amahan ni Hari Lamoni nagsugod sa iyang pag-ampo, “Ako mobiya sa tanan nakong mga sala aron makaila kanimo.” Tingali dili kita mapanalanginan og sama niini katalandogon nga mga kasinatian, apan alang niadtong usahay tingali naglisod sa pagbati og mga tubag sa pag-ampo, ang pagtinguha og kaluoy sa Ginoo usa sa labing gamhanan nga mga paagi aron mabati ang pagsaksi sa Espiritu Santo.

Usa ka susamang baroganan gitudlo sa matahom nga paagi diha sa Moroni 10:3–5. Kanunay natong pamub-an kini nga mga bersikulo sa pagtudlo nga, pinaagi sa sinserong pag-ampo, atong makat-onan kon ang Basahon ni Mormon tinuod ba. Apan kini nga pagpamubo mosalikway sa importanteng tahas sa kaluoy. Paminawa kon sa unsang paagi gisugdan ni Moroni ang iyang pag-awhag: “Ako moawhag kaninyo nga kon kamo mobasa niini nga mga butang, … nga kamo unta mohinumdom unsa ka maluluy-on ang Ginoo ngadto sa mga katawhan, gikan sa paglalang ni Adan bisan hangtod sa panahon nga kamo makadawat niini nga mga butang, ug pamalandonga kini sa inyong mga kasingkasing.”

Giawhag kita ni Moroni sa dili lang pagbasa niining mga butanga—sa mga rekord nga iya nang pagaselyohan—apan usab sa pagpamalandong sulod sa atong mga kasingkasing unsay gipadayag sa Basahon ni Mormon bahin sa “unsa ka maluluy-on ang Ginoo ngadto sa katawhan.” Ang pagpamalandong sa kaluoy sa Ginoo maoy mag-andam kanato nga “mangutana sa Dios, ang Amahan sa Kahangtoran, sa ngalan ni Kristo, kon kini nga mga butang dili ba tinuod.”

Kon atong pamalandongan ang Basahon ni Mormon, tingali mangutana kita: Tinuod ba gayod kaha, sama sa gitudlo ni Alma, nga ang plano sa Dios sa kaluoy nagseguro nga ang matag tawo nga nabuhi dinhi sa yuta mabanhaw ug nga sila “mapahiuli sa ilang … hingpit nga bayanan”? Husto ba si Amulek—ang kamanggiluy-on sa Manluluwas motagbaw ba sa tanan nga tinuoray nga mapait nga gipangayo sa kaangayan nga kita kinahanglan nga magbayad ug imbis niana gakson [kita] sa mga bukton sa kaseguroan?

Tinuod ba, sama sa gipamatuod ni Alma, nga giantos ni Kristo ang “mga sakit ug mga kasakit” aron Iyang “masayran … unsaon sa pagtabang ang iyang katawhan sumala sa ilang mga kahuyang”? Ang Ginoo tinuod bang manggiluy-on, sama sa gitudlo ni Hari Benjamin, nga isip “walay bayad nga gasa “niadtong … namatay nga wala mahibalo sa kabubut-on sa Dios mahitungod kanila, o kinsa nakasala sa kawalay alamag”?

Tinuod ba, sama sa giingon ni Lehi, nga “si Adan napukan aron ang mga tawo maanaa; ug ang mga tawo anaa, aron sila makabaton og kamaya”? Ug tinuod ba, sigon sa gipamatuod ni Abinadi, nga nagkutlo bahin ni Isaias, nga si Jesukristo “gisamaran alang sa atong mga kalapasan, gibun-og siya alang sa atong pagkadaotan; ang kastigo alang sa atong kalinaw iyang giantos; ug pinaagi sa iyang mga labod kita naayo”?

Agig sumada, ang plano ba sa Amahan sigod sa gitudlos a Basahon ni Mormon manggiluy-on ba gayod? Mopamatuod ko nga ingon gayod niana ug nga ang paghatag og kalinaw ug ang malaomong mga pagtulun-an sa kaluoy diha sa Basahon ni Mormon tinuod.

Sa gihapon, akong mahanduraw nga ang pipila tingali naglisod, bisan sa inyong matinud-anong pagbasa ug mga pag-ampo, sa katumanan sa saad ni Moroni nga ang Langitnong Amahan “mopakita sa kamatuoran niini nganha kaninyo, pinaagi sa gahom sa Espiritu Santo.” Nasayod ako niini nga panglimbasog tungod kay gibati ko kini, daghang tuig nang milabay, dihang ang kaugalingon nakong mga pagbasa sa Basahon ni Mormon wala maghatag og diha-diha dayon ug tin-aw nga tubag sa akong mga pag-ampo.

Kon nagpanglimbasog man kamo, dapiton ko kamo sa pagpamalandong sa tambag ni Moroni sa daghang mga paagi nga gitudlo sa Basahon ni Mormon “unsa ka maluluy-on ang Ginoo ngadto sa katawhan”? Base sa akong kasinatian, manghinaot ko nga kon buhaton man ninyo kini, ang kalinaw sa Espiritu Santo makasulod sa inyong kasingkasing ug masayod kamo, motuo, ug mobati nga ang Basahon ni Mormon ug ang plano sa kaluoy nga gitudlo niini tinuod.

Akong ipahayag ang akong pasalamat sa talagsaong plano sa Amahan sa kaluoy ug sa kaandam sa Manluluwas sa pagtuman niini. Nasayod ko nga Iyang ipakita ang Iyang kaugalingon sa kaluoy diha sa Iyang balaan nga templo ug sa matag bahin sa atong kinabuhi kon kita magtinguha Kaniya. Sa ngalan ni Jesukristo, amen.