Iganti nga mga Panalangin

Sa pagserbisyo sa Presiding Bishopric, nakaangkon ko og kahigayonan nga makahimamat og mga Santos sa Ulahing mga Adlaw sa tibuok kalibotan sa nagkalainlaing lugar ug mga kultura. Kanunay kong nadasig sa inyong malungtaron nga hugot nga pagtuo ug debosyon ngadto ni Ginoong Jesukristo. Apan natandog ko sa lahi-lahi ug kasagaran lisod nga mga sirkumstansiya nga giatubang sa kadaghanan ninyo—mga hagit sama sa sakit, kakulangan, limitado nga kapanguhaan, diyotay nga mga oportunidad sa pagminyo o edukasyon, pag-abuso sa uban, ug ubang mga limitasyon o pagpugong. Usahay, kini nga mga hagit daw makapugong sa inyong pag-uswag ug mohagit sa inyong tinuod nga mga paningkamot nga magpuyo sa ebanghelyo sa hingpit, nga mas makapalisod sa pagserbisyo, pagsimba, ug pagtuman sa sagradong mga katungdanan.

Akong minahal nga mga higala, kon ugaling gibati ninyo nga limitado o walay bintaha tungod sa mga kahimtang sa inyong kinabuhi, gusto ko nga mahibaloan ninyo kini: Ang Ginoo personal nga nahigugma kaninyo. Siya nahibalo sa inyong mga sirkumstansiya, ug ang mga pultahan sa Iyang mga panalangin magpabiling bukas kaayo bisan unsa pa ang mga hagit nga inyong giatubang.

Akong nakat-onan kini nga kamatuoran pinaagi sa personal nga kasinatian nga, bisan daw dili mahinungdanon, nagbilin og mahangtorong impresyon ngari kanako. Sa edad nga 22, samtang nagserbisyo sa French Air Force didto sa Paris, naghinam-hinam ko sa pagkahibalo nga si Elder Maxwell, usa ka Apostol sa Ginoo, mamulong sa usa ka komperensiya didto sa Champs-Élysées. Hinuon, sa wala pa ang kalihokan, nakadawat ko og mga sugo sa paghatod og senyor nga opisyal ngadto sa airport sa esksaktong oras nga mahitabo ang komperensiya.

Nasagmuyo ko. Apan determinado nga motambong, akong gihatod ang opisyal ug paspas nga miadto sa komperensiya. Human makakita og kaparkingan, midagan ko sa Champs-Elysées ngadto sa dapit sa miting ug miabot nga naghangos apan singko minutos na lang sa dili pa matapos ang miting. Sa pagsulod gyod nako, akong nadungog si Elder Maxwell nga nagsulti, “Ako karon mohatag kaninyo og apostolikanhong panalangin.” Dihadiha dayon, nakabaton ko og maanindot, dili hikalimtan nga espirituwal nga kasinatian. Gidaog ko sa Espiritu ug ang mga pulong sa panalangin ingon og midulot sa matag lanot sa akong kalag sama nga gitumong kadto ngari lamang kanako.

Ang akong nasinati niadtong adlawa gamay lamang apan gamhanan nga pagpamatuod sa makahupay nga aspeto sa plano sa Dios alang sa Iyang mga anak: Kon ang mga sirkumstansiya nga dili nato makontrol mopugong nato sa pagtuman sa matarong nga mga tinguha sa atong kasingkasing, ang Ginoo moganti sa mga paagi nga motugot nato sa pagdawat sa Iyang gisaad nga mga panalangin.

Kining makahatag og pagsalig nga kamatuoran nagsukad sa tulo ka baroganan nga makita diha sa gipahiuli nga ebanghelyo ni Jesukristo:

1. Ang Dios hingpit nga nahigugma kanato. “Siya nagdapit [kanatong] tanan sa pagduol ngadto kaniya ug sa pag-ambit sa iyang kaayo.” Ang Iyang plano sa pagtubos moseguro nga ang tanan, walay gipili, mohatag og kahigayonan aron usa ka adlaw niana makadawat sa mga panalangin sa kaluwasan ug kahimayaan.

2. Tungod kay makiangayon ug maluluy-on ang Dios ug hingpit ang Iyang plano, dili Siya mobasol nato sa mga butang nga dili nato makontrolar. Si Elder Neal A. Maxwell mipasabot nga ang “Dios … mokonsiderar sa maluluy-ong paagi dili lamang sa atong mga tinguha ug sa atong mga kahimoan, apan usab sa gibug-aton sa kalisod nga gipahamtang kanato sa atong magkalahi nga mga sirkumstansiya.”

3. Pinaagi ni Jesukristo ug sa Iyang Pag-ula, makakaplag kita sa kalig-on aron makalahutay ug sa kataposan makabuntog sa tanang mga hagit sa kinabuhi. Si Alma nagtudlo nga, gipas-an sa Manluluwas dili lamang ang mga sala sa mahinulsolon apan usab “ang mga sakit ug mga balatian sa Iyang katawhan” ug ang “ilang mga kahuyang.” Mao nga, labaw pa sa pagtubos kanato gikan sa atong mga sayop, ang kaluoy ug grasya sa Ginoo magauban kanato latas sa mga walay kaangayan, mga pagkulang, ug mga limitasyon nga gipahamtang sa atong mortal nga kasinatian.

Ang pagdawat niining giganti nga mga panalangin adunay piho nga mga kondisyon. Ang Ginoo naghangyo kanato sa pagbuhat sa “tanan nga atong mabuhat” ug ”itanyag ang [atong] tibuok nga mga kalag isip usa ka halad ngadto kaniya, Nagkinahanglan kini og lawom nga tinguha, sinsero ug matinud-anon nga kasingkasing, ug sa atong labing makugihon nga pagsunod sa Iyang mga sugo ug pagpasubay sa atong kabubut-on ngadto Kaniya.

Kon ang atong labing matinguhaong mga paningkamot dili makaabot sa atong mga pangandoy tungod sa mga sirkumstansiya nga dili nato mapugngan, ang Ginoo modawat gihapon sa mga tinguha sa atong kasingkasing isip usa ka takos nga halad. Si Presidente Dallin H. Oaks mitudlo nga, “Mapanalanginan kita sa matarong nga mga tinguha sa atong kasingkasing bisan kon ang ubang sirkumstansiya sa gawas nakapahimong imposible nga atong malihok kana nga mga tinguha.”

Samtang si Propeta Joseph Smith naguol mahitungod sa iyang igsoong lalaki nga si Alvin, kinsa namatay nga wala makadawat sa kinahanglanon nga mga ordinansa sa ebanghelyo, nakadawat siya niining makahupay nga pagpadayag: “Tanan kinsa namatay, nga walay kahibalo [sa ebanghelyo], kinsa unta makadawat niini kon sila gitugotan pa sa pagpabilin, mahimo nga manununod [sa celestial nga gingharian sa Dios].” Midugang ang Ginoo, “Kay Ako, ang Ginoo, mohukom sa tanan nga mga tawo sumala sa ilang mga buhat, sumala sa tinguha sa ilang mga kasingkasing.”

Ang mahinungdanon sa Ginoo dili lamang kon kita makahimo apan kon kita andam nga mobuhat sa tanan nga atong mabuhat aron mosunod sa atong Manluluwas.

Usa ka higala sa usa ka higayon mihupay sa usa ka batan-ong misyonaryo nga naguol sa iyang sayo nga pagkahuman tungod sa mga problema sa kahimsog, bisan pa sa iyang sinsero nga mga pag-ampo ug matinud-anong tinguha sa pagserbisyo. Kini nga higala mipakigbahin og kasulatan diin ang Ginoo mipahayag nga kon ang Iyang mga anak “molihok sa tibuok nilang kusog” ug “dili mohunong sa ilang kakugi” sa pagtuman sa Iyang mga sugo, “ug ang ilang mga kaaway [nga tingali maglakip sa sukwahi nga mga sirkumstansiya sa atong kinabuhi] mopugong kanila sa paghimo niana nga buhat, tan-awa, akong kabubut-on nga dili na mangayo niana nga buhat gikan sa mga kamot sa [mga tawo], hinuon dawaton ang ilang mga halad

Ang akong higala mipamatuod ngadto nianing batan-ong lalaki nga ang Dios nahibalo nga iyang nahatag ang labing maayo sa pagtubag sa tawag sa pagserbisyo. Siya mipasalig kaniya nga ang Ginoo midawat sa iyang halad ug nga ang mga panalangin nga gisaad ngadto sa matinud-anong mga misyonaryo dili ihikaw.

Ang iganti sa Ginoo nga mga panalangin sa kasagaran moabot pinaagi sa kabuotan ug serbisyo sa uban nga motabang nato sa paghimo nianang dili nato mahimo nga kita ra. Nakahinumdom ko sa panahon nga, nagpuyo nga layo sa usa sa among mga anak nga babaye didto sa France, gibati namo nga walay mahimo sa pagtabang niya human sa malisod nga pagpanganak. Sa samang semana ang among ward sa Utah nangayo og tabang alang sa usa ka inahan nga bag-ohay lang nanganak og kaluha. Ang akong asawa, si Valérie, miboluntaryo nga magdala og pagkaon para niya—nag-ampo sulod sa iyang kasingkasing alang niining bag-ong inahan ug sa among anak nga babaye nga nanginahanglan. Sa wala madugay, nahibaloan namo nga ang mga sister sa ward sa among anak didto sa France nag-organisar aron sa paghatag og mga pagkaon sa iyang pamilya. Para namo, ang Dios mitubag sa among mga pag-ampo, nagpadala og mga anghel aron modala og kahupay nga dili namo mahimo.

Kon mag-atubang og mga limitasyon ug mga hagit, hinaot nga atong pasalamatan ang atong kaugalingong mga panalangin—atong mga gasa, mga kapanguhaan, ug panahon—ug gamiton kini aron sa pagserbisyo niadtong nanginahanglan. Sa pagbuhat niini, dili lamang kita makapanalangin sa uban apan magdapit og pagkaayo ug ganti ngadto sa atong kaugalingong kinabuhi.

Usa sa labing gamhanan nga mga paagi nga makasalmot kita sa iganti nga mga panalangin sa Dios mao ang pinaagi sa pangrepresentar nga buhat nga atong himoon alang sa atong mga katigulangan sulod sa balay sa Ginoo. Samtang magpahigayon kita og mga ordinansa alang kanila, kita aktibong makaapil sa dakong buhat sa Ginoo alang sa kaluwasan, gamit ang atong mga gasa ug mga abilidad sa paghatag og mga panalangin niadtong wala makabaton og kahigayonan nga makadawat niini atol sa ilang mortal nga kinabuhi.

Ang mahigugmaon nga serbisyo nga atong gihalad diha sa balaan nga mga templo mopahinumdom nato nga ang grasya sa Manluluwas magpadayon lapas niining kinabuhia. Sa kinabuhi nga umaabot, mahimong hatagan kita og bag-ong mga oportunidad sa pagtuman nianang dili nato mahimo niining mortal nga kinabuhi. Namulong ngadto sa mga sister nga wala pa makakaplag og mahangtorong kauban, si Presidente Lorenzo Snow mahigugmaong miingon: “Walay Santos sa Ulahing mga Adlaw kinsa human sa pagpuyo og matinud-anon nga kinabuhi nga namatay nga mawagtangan og bisan unsa tungod sa kapakyas sa pagbuhat og piho nga mga butang kon ang mga oportunidad wala mahatag kaniya. … Sila makadawat sa tanang panalangin, kahimayaan ug himaya nga madawat ni bisan kinsa nga lalaki o babaye nga aduna niini nga oportunidad.”

Kini nga mensahe sa paglaom ug kahupayan alang kanatong tanan, mga anak sa Dios. Walay usa kanato nga makalingkawas sa mga hagit ug mga limitasyon sa mortalidad. Human sa tanan, kitang tanan natawo nga nakapanunod og kakulangan sa kapasidad sa pagluwas sa atong kaugalingon. Sa gihapon kita adunay mahigugmaong Manluluwas, ug “[kita] nasayod nga pinaagi sa [Iyang] grasya [kita] maluwas, human sa tanan nga atong mabuhat.”

Ako mopamatuod nga samtang daghang sirkumstansiya sa kinabuhi dili nato makontrolar, walay usa kanato nga dili maabot sa walay kinutoban nga mga panalangin sa Ginoo. Pinaagi sa Iyang maulaon nga sakripisyo, ang Manluluwas mohatag og tabang alang sa matag kakulangan sa abilidad ug kawalay kaangayan kon atong ihalad ang atong tibuok nga kalag ngadto Niya. Sa ngalan ni Jesukristo, amen.