Moapil sa Pagpangandam alang sa Pagbalik ni Kristo

Diha sa “kahalangdon niining higayona,“ samtang ang gingharian sa Dios magkalapad ug ang mga templo magkadaghan sa yuta, adunay magkadako nga panginahanglan alang sa andam nga mga kalag sa pag-apil sa buhat sa Dios. Ang dili hinakog nga pagserbisyo mao ang labing mahinungdanon sa Kristohanong pagkadisipulo. Apan ang pagserbisyo talagsa ra nga masayon. Mao kini nga ako nakadayeg kaninyo mga disipulo nga nagtuman sa pakigsaad nga gipadaplin ang inyong mga tinguha ug mga hagit aron moserbisyo sa Dios pinaagi sa pagserbisyo sa Iyang mga anak. Ang Dios “mahimuot sa pagpasidungog [kaninyo tungod sa pagserbisyo Kaniya] diha sa katarong.” Siya nagsaad, “Dako ang [inyong] ganti ug walay katapusan ang [inyong] himaya.” Kon kita mosanong sa pagserbisyo, kita mosanong ngadto ni Jesukristo. Ug kon kita mosanong ngadto ni Kristo, kita nagsanong ngadto sa labing abunda nga kinabuhi kutob sa mahimo.

Nakat-on ko niini samtang nagtrabaho ug nag-eskwela sa chemical engineering sa kolehiyo. Ako gihangyo isip ang tigplano sa mga kalihokan sa ward alang sa mga dili pa minyo. Mao kadto ang akong makaurom nga calling. Gidawat gihapon nako, ug sa sinugdanan laay kaayo. Dayon sa usa ka kalihokan dihay matahom nga babaye nga nakamatikod sa akong hinatagan og sorbetes. Siya nagbalik-balik og katulo sa pamasin nga makuha ang akong pagtagad. Kami nagkahigugmaay, ug mitanyag siya og kaminyoon mga duha lang ka semana human niana. Kuan, dili gyod tingali ingon ka paspas, ug ako ang mitanyag og kaminyoon, apan ang tinuod mao, dili gyod nako mahunahuna kon mahimamat ba nako si Heidi kon akoa pang gibalibaran kadto nga calling.

Moapil kita sa buhat sa Dios dili tungod kay ang Dios nagkinahanglan kanato apan tungod kay kita nagkinahanglan sa Dios ug sa Iyang gamhanang mga panalangin. Siya nagsaad, “Kay, tan-awa, Ako mopanalangin niadtong tanan kinsa naghago diha sa akong ubasan uban sa gamhanan nga panalangin.” Tugoti ko nga mopakigabahin og tulo ka baroganan nga magtudlo kon sa unsang paagi ang atong pag-apil sa buhat sa Dios makapanalangin ug makatabang kanato nga maandam sa pagsugat sa Manluluwas.

Una, kon kita moapil, kita mouswag ngadto “sa katuyoan sa [atong] paglalang”

Kita makakat-on niining sundanan diha sa asoy sa Paglalang. Human sa matag-adlaw nga paghago, ang Dios miila sa pag-uswag nga nahimo pinaagi sa pag-ingon og, “maayo kana.” Siya wala moingon nga ang buhat humana o perpekto na kini. Apan ang Iyang gisulti mao nga adunay pag-uswag, ug sa mga mata sa Dios, kana maayo!

Ang mga calling dili motino o mosukod sa bili o katakos sa tawo. Hinoon, samtang kita maghago uban sa Dios diha sa bisan unsa nga paagi nga Siya nagsugo, kita molambo ngadto katuyoan sa atong kaugalingong pagkalalang.

Ang Dios magmaya sa atong kauswagan, ug busa ingon gayod kita, gani kon aduna pa gihapoy mga buhat nga kinahanglang buhaton. Usahay kita lagmit magkulang og kalig-on o mga pamaagi sa pagserbisyo sa usa ka calling. Sa gihapon, kita makaapil diha sa buhat ug mopanalipod sa atong pagpamatuod pinaagi sa makahuloganong mga paagi sama sa pag-ampo ug pagtuon sa kasulatan. Ang atong Langitnong Amahan wala manghimaraot kanato kon kita andam apan dili makahimo sa pagserbisyo.

Ikaduha, ang pagserbisyo makapabayaw sa atong mga panimalay ug mga simbahan ngadto sa balaan nga mga dapit diin kita makapraktis sa pagsunod sa pakigsaad.

Pananglitan, ang atong pakigsaad nga kanunayng mohinumdom ni Kristo gihimo sa indibidwal nga paagi, apan kini nga pakigsaad nasunod samtang kita moserbisyo. Ang mga calling naglibot kanato og mga oportunidad sa “pagdala … sa palas-anon sa usag usa, ug busa tumana ang balaod ni Kristo. Kon kita moserbisyo tungod kay nahigugma kita sa Dios ug gustong mosunod sa atong mga pakigdaad, ang serbisyo nga daw makahago ug makaluya mahimong malipayon ug makapausab.

Ang mga ordinansa dili moluwas kanato tungod kay kini nakatuman sa langitnong buluhaton. Hinoon, kon kita mosunod sa mga pakigsaad niining mga ordinansa, kita mahimong matang sa tawo nga gustong maanaa sa presensya sa Dios. Kini nga panabot mobuntog sa mga pagduha-duha sa pagserbisyo o sa mga pagpili nga dili moserbisyo. Ang atong pagpangandam sa pagsugat ni Jesukristo mopaspas kon mohunong kita sa pagpangutana kon unsa ang tugotan sa Dios ug magsugod og pangutana kon unsa ang gusto sa Dios.

Ikatulo, ang pag-apil sa buhat sa Dios motabang kanato nga madawat ang gasa sa grasya ug mabati ang Iyang mas dakong gugma.

Kita wala makadawat og pinansiyal nga bayad alang sa pagserbisyo. Hinoon, ang kasulatan nagtudlo nga alang sa atong “paghago [kita] magdawat sa grasya sa Dios, nga [kita] unta magmalig-on diha sa Espiritu, ingon nga nakaangkon og kahibalo sa Dios, [ug]… makapanudlo uban sa gahom ug sa pagtugot nga gikan sa Dios.” Kana usa ka maayo kaayo nga pagbinayloay!

Tungod sa grasya sa Dios, ang atong mga abilidad o kawalay abilidad dili ang nag-unang basehanan alang sa paghatag o pagdawat og usa ka calling. Ang Dios wala maglaom og kahingpit sa pagbuhat o talagsaong talento aron makaapil sa Iyang buhat. Kon mao, si Rayna Ester wala unta makaluwas sa ilang nasod, si Pedro wala unta makapangulo sa nahaunang Simbahan, ug si Joseph Smith wala unta mahimong propeta sa Pagpahiuli.

Kon kita molihok inubanan sa pagtuo sa pagbuhat og butang lapas sa atong mga abilidad, ang atong kahuyang madayag. Kini dili gayod komportable, apan kini gikinahanglan aron “masayod nga pinaagi sa grasya [sa Dios], … nga [kita] adunay gahom sa pagbuhat niini nga mga butang.”

Kita mapukan og kadaghan samtang moapil diha sa buhat sa Dios. Apan sa atong paningkamot, si Jesukristo motabang kanato. Siya sa hinayhinay mobayaw nato aron makasinati og kaluwasan gikan sa atong mga kapakyasan ug kahadlok ug gikan sa pagbati nga kita dili gayod igo. Kon atong itutok ang atong gamay apan labing nindot nga paningkamot, ang Dios mopadako niini. Kon kita mosakripisyo alang ni Kristo, Siya mobalaan kanato. Mao kini ang makapausab nga gahom sa grasya sa Dios. Kon kita moserbisyo, kita molambo diha sa grasya sa Dios hangtod nga kita andam na nga “ituboy pinaagi sa Amahan, sa pagbarog sa atubangan ni [Jesukristo].”

Wala ko makahibalo sa tanang ipangutana sa Manluluwas kanako kon ako mobarog sa Iyang atubangan, apan tingali usa ka pangutana mao ni, “Kinsa ang imong gidala uban nimo?” Ang mga calling sagradong mga gasa gikan sa mahigugmaong Langitnong Amahan aron sa pagtabang nga atong madala ang uban ngadto ni Jesukristo. Ako modapit sa mga lider ug sa matag usa kanato nga mas motuyo sa pagpangita niadtong walay mga calling. Awhaga ug tabangi sila nga maapil diha sa buhat sa Dios aron matabangan sila nga maandam alang sa pagbalik ni Kristo.

Si John dili aktibo sa Simbahan sa dihang ang iyang bishop mibisita ug misulti kaniya nga ang Ginoo adunay ipabuhat kaniya. Gidapit niya si John sa pag-undang sa pagpanigarilyo. Bisan og si John naningkamot sa makadaghang higayon sa pag-undang, niining higayona nabati niya ang dili makita nga gahom nga nagtabang kaniya.

Tulo lang ka semana ang milabay, ang presidente sa stake mibisita ni John. Siya mitawag ni [John] sa pagserbisyo diha sa bishopric. Nakalitan si John. Gisultian niya ang presidente sa stake nga bag-o lang siya nga mibiya sa pagpanigarilyo. Kon kini nagpasabot nga iyang biyaan ang iyang tradisyon sa pagtambong og mga dula sa propesyonal nga football sa Dominggo, nan, murag sobra ra sad na nga hangyo. Ang dinasig nga tubag sa presidente sa stake yano ra: “John, wala ko maghangyo nimo; ang Ginoo.”

Diin si John mitubag, “Kon mao na, moserbisyo ko.”

Si John misulti nako niining mga sakripisyo sa pagserbisyo diin mao ang espirituhanong pag-usab alang kaniya ug sa iyang pamilya.

Naghunahuna ko kon kita dunay dili masigpatan, mapakyas sa paghatag og mga calling ngadto sa mga indibidwal kinsa, nga sa atong pagtan-aw, ingon og dili angayan o dili takos. O kita tingali mas mabalaka sa unsay gilaoman sa uban kay sa doktrina sa pag-uswag, magbaliwala kon unsaon sa Manluluwas sa pagpadako sa kapasidad sa dili angayan ug sa wala pa masulayi pinaagi sa paghatag nila sa mga oportunidad sa pagserbisyo.

Si Elder David A. Bednar nagtudlo sa kaimportante sa mandato diha sa kasulatan “himoa ang matag [babaye ug] lalaki nga makakat-on sa [ilang] katungdanan, ug [mo]buhat.” Gibuhat ba nato kini? Kon ang mga lider ug mga ginikanan motugot nga ang uban magkat-on ug mobuhat alang sa ilang kaugalingon, sila molambo ug molipang. Samtang ang mas sayon nga dalan tingali ang paghatag sa matinud-anong mga miyembro og ikaduhang calling, ang mas nindot nga paagi mao ang pagdapit sa wala kaayo laomi nga moserbisyo ug tugoti silang makat-on ug molambo.

Kon si Kristo pisikal nga anaa dinhi, Siya mobisita sa masakiton, motudlo sa klase sa Sunday School, motupad og lingkod sa magul-anong batan-ong babaye, ug mopanalangin sa mga bata. Siya makahimo sa Iyang kaugalingong buhat. Apan Siya nagsunod niining baroganan sa pagtugot kanato nga molihok ug makat-on, busa Siya mipadala kanato puli Kaniya.

Sa pag-apil sa buhat sa Dios moabot .”ang matarong, prebilihiyo, ug responsibilidad sa pagrepresentar sa Ginoo [Jesukristo].” Kon kita moserbisyo sa paghimaya ni Kristo ug dili sa atong kaugalingon,, ang atong pagserbisyo mahimong malipayon. Kon ang uban mobiya sa atong klase, miting, mga pagbisita sa pagpangalagad, o kalihokan nga mas maghinumdom ni Kristo kay sa maghinumdom kanato, ang buhat makapagana.

Sa mahinangpon nga pagtinguha sa pagrepresentar sa Manluluwas, kita mas mahisama Kaniya. Kana ang labing maayong pagpangandam alang sa sagradong takna kon ang matag usa kanato moluhod ug mokumpisal nga si Jesus mao ang Kristo, diin ako mosaksi nga Siya gayod, ug nga si Presidente Russell M. Nelson mao ang Iyang “tingog … ngadto sa kinatumyan sa yuta” sa pagtabang kanato nga maandam … alang nianang moabot.” Sa sagradong ngalan ni Jesukristo, amen.