Ang Sistema sa Atong Langitnong Giya
Samtang atong ipunting ang atong mga kinabuhi diha ni Jesukristo, makaplagan nato ang atong dalan pauli, maglahutay ug magmaya hangtod sa kataposan.
Si Jesukristo miusab sa akong kinabuhi sa dihang gibunyagan ko sa edad nga 26 didto sa akong minahal nga Frutillar, Chile. Nianang higayona, ang akong trabaho midala nako tabok sa dagat, mga sapa, ug mga linaw, sa maanindot nga Chilean Patagonia. Human sa akong bunyag, nakita nako ang akong trabaho ug ang akong kinabuhi sa usa ka bag-o ug lahi nga paagi, tinud-anay nga nakaamgo nga ang “tanang butang nagpaila nga adunay Dios.”
Sa kinaiyahan, ang salmon matawo diha sa tinubdan sa mga sapa. Adunay higayon sa ilang kinabuhi, nga kinahanglan nga mosalom sila padulong sa lawod, diin ilang makaplagan ang pagkaon ug mga kondisyon nga gikinahanglan sa ilang pagtubo.
Apan ang lawod makuyaw usab nga dapit diin ang mga manunukob nagpahipi ug diin ang mga mananagat mosulay sa pagdakop sa salmon gamit ang taga nga adunay imitasyon nga pagkaon nga dili makapahimsog nila. Kon ang salmon makasugakod niini nga mga hulga, andam silang mogamit sa ilang gamhanan nga sistema nga giya balik ngadto sa sapa sa samang dapit diin sila natawo, mag-atubang og bag-o ug pipila ka pamilyar nga mga hagit. Ang mga siyintipiko nagtuon sa ilang kinaiya sa paglalin sulod sa daghang katuigan ug nakadiskobre nga mogamit sila og matang sa magnetic nga mapa, susama sa GPS, sa paggiya nila ngadto sa ilang kataposang destinasyon nga adunay talagsaong pagkatukma.
Kitang tanan makabalik sa umaabot ngadto sa langitnong panimalay diin kita gikan. Ug sama sa salmon, kita adunay atong kaugalingong magnetic nga mapa, o Kahayag ni Kristo sa paggiya nato didto. Si Jesus mitudlo sa Iyang mga disipulo, “Ako ang dalan, ang kamatuoran ug ang kinabuhi: walay makaadto sa Amahan kon dili moagi kanako.”
Samtang atong ipunting ang atong mga kinabuhi diha ni Jesukristo, makaplagan nato ang atong dalan pauli, maglahutay ug magmaya hangtod sa kataposan. Si Presidente Nelson mitudlo nga, “ang hingpit nga kalipay nga atong gibati dili kaayo konektado sa mga sitwasyon sa atong kinabuhi apan konektado kaayo sa gitutokan sa atong kinabuhi.”
Atong Balaang Kinaiyahan ug Padulngan
Gikan sa pamahayag sa pamilya, atong mabasa nga “ang matag usa [kanato] hinigugmang espiritu nga anak nga lalaki o babaye sa langitnong mga ginikanan, ug, sa ingon, ang matag usa adunay balaan nga kinaiya ug kapalaran. … Sa kinabuhi nga wala pa dinhi sa yuta, ang espiritu nga mga anak nga lalaki ug babaye nakaila ug nagsimba sa Dios ingon nga ilang Amahan sa Kahangtoran ug midawat sa Iyang plano nga naghatag og higayon sa Iyang mga anak nga makaangkon og pisikal nga lawas ug makaangkon og yutan-on nga kasinatian sa paglambo ngadto sa kahingpitan ug sa kataposan makakab-ot sa ilang balaan nga kapalaran ingon nga mga manununod sa kinabuhing dayon.”
Sa wala pa ang Iyang pagkatawo sa pagkamortal, si Jesukristo nagpakita ngadto ni Moises ug namulong ngadto kaniya alang sa Amahan. Iyang gisultihan si Moises nga Siya adunay buhat nga ipabuhat kaniya. Atol niana nga miting, ang Ginoo mitawag kaniya nga “akong anak” sa makadaghang higayon.
Human niana nga kasinatian, si Satanas miabot nga nagtental kaniya, nag-ingon, “Moises, anak sa tawo, simba kanako.”
Si Moises mitubag sa tentasyon pinaagi sa paghinumdom sa iyang balaan nga kinaiyahan, nag-ingon, “Kinsa ikaw? Kay tan-awa, Ako mao ang usa ka anak sa Dios.” Ang kamatuoran nakapalingkawas ni Moises gikan sa pag-ataki sa kaaway.
Mga kaigsoonan, ang mga taga sa pagka-mortal tinuod. Kiini sa kasagaran makahaylo, apan nagtinguha lang kini og usa ka target, sa pagbira nato gikan sa agianan sa buhing tubig nga paingon ngadto sa Amahan ug kinabuhing dayon.
Ako nasayod unsa ka tinuod ang mga taga sa pagka-mortal. Usa ka Dominggo, isip usa ka bag-ong kinabig, ako nagtudlo og klase sa pagkapari sa dihang miabot sa dili maayo nga panagsultihanay. Ako naningkamot sa pagtapos sa akong leksiyon. Ako nasilo ug mibati nga ako ang biktima. Walay gisulti, mipaingon ko sa gawasanan, uban sa ideya nga ako dili na una mobalik sa simbahan.
Nianang higayona usa ka nabalaka nga tighupot sa pagkapari nagbarog sa akong atubangan. Siya mahigugmaong midapit nako sa pagtutok ni Kristo ug dili sa sitwasyon nga among nasinati sa klase. Samtang mahinumdom ko sa kasinatian uban kaniya, gipakigbahin niya nako nga nakadungog siya og tingog nga nagsulti kaniya, “Adtoa siya; importante siya kanako.”
Akong minahal nga mga higala, kitang tanan importante ngadto Kaniya. Si Presidente Nelson mitudlo nga “tungod sa atong pakigsaad uban sa Dios, Siya dili gayod kapoyon sa Iyang mga paningkamot sa pagtabang kanato, ug kita dili gayod makabsan sa Iyang maluluy-on nga pailob ngari kanato.” Ang atong balaanong kinaiya ug relasyon sa pakigsaad kauban sa Dios naghatag natog katungod nga modawat og balaanong tabang.
Ang Panginahanglan sa Pag-amuma
Sama nga ang salmon kinahanglan nga amumahon didto sa lawod aron motubo, kita usab kinahanglan nga moamuma sa atong mga kaugalingon sa espirituwal nga paagi aron makalikay nga mamatay sa kakulang sa espirituwal nga nutrisyon. Ang pag-ampo, ang mga kasulatan, ang templo, ug ang atong kanunay nga pagtambong sa mga miting sa Dominggo importante sa atong espirituwal nga pagkaon.
Niadtong Nobyembre 1956, si Ricardo Garcia, misulod sa mga tubig sa bunyag didto sa Chile, nahimong unang mga miyembro sa Simbahan sa akong nasod. Usa ka adlaw na lang sa wala pa siya mamatay, siya mipahayag sa atubangan sa iyang pamilya ug mga higala, “Daghang tuig na ang milabay ang mga misyonaryo midapit nako nga magmalipayon kauban sa akong pamilya. Ako usa ka malipayon nga tawo. Sultihi ang tanan sa Chile nga ang ebanghelyo mao ang kalipay.”
Human maamumahan sa ebanghelyo ni Jesukristo, si Ricardo mipahinungod sa iyang tibuok kinabuhi sa pagserbisyo sa Dios ug sa iyang silingan inubanan sa gugma. Ang iyang ehemplo sa pagkadisipulo nakapanalangin sa mga henerasyon, lakip nako. Si Propeta Joseph Smith mitudlo nga ang “usa ka tawo nga puno sa gugma sa Dios, dili kontento nga mopanalangin sa iyang pamilya lamang, apan molakip sa tibuok kalibotan, naghinamhinam sa pagpanalangin sa tibuok kaliwatan sa tawo.”
Mobalik ngadto sa Atong Langitnong Panimalay
Gibati sa matag usa kanato ang tinguha nga mobalik ngadto sa atong langitnong panimalay, ug si Jesukristo mao ang atong sistema sa langitnong giya. Siya mao ang dalan. Ang Iyang maulaong sakripisyo nakapaposible nato nga mohimo og sagrado nga mga pakigsaad uban sa Dios. Kon makahimo na kita og mga pakigsaad, makaplagan nato ang atong mga kaugalingon nga naglangoy sugat sa sulog. Kakuyaw, kahigawad, tentasyon, ug kasakit mosulay sa atong hugot nga pagtuo ug espirituwal nga kalig-on. Pangayo og tabang. Si Jesukristo nakasabot ug kanunay nga madasigon nga moambit sa atong mga salagubangon.
Hinumdomi nga Siya nailhan nga “nakasinati siyag mga kagul-anan ug mga pag-antos.” Ang Manluluwas namahayag, “Paantoson kamo sa kalibotan apan ayaw kahadlok kay nabuntog ko na ang kalibotan.” Ang Iyang maulaong sakripisyo nakapahimo nga mapasaylo ang atong mga sala hangtod sa punto nga Siya dili na mahinumdom niini.
Kita dili tingali hingpit nga makalimot sa atong mga sala isip kabahin sa atong mortal nga pagkat-on aron kita mahinumdom nga dili sublion kini. Hinuon, kita mahinumdom Kaniya samtang moambit kita sa sakramento didto sa simbahan matag Dominggo. Kini nga ordinansa usa ka importanteng bahin sa pagsimba ug sa espirituwal nga kalamboan. Ang hingpit nga kalipay moabot kon kita makasabot nga kini dili lang lain nga adlaw. “Ang adlawng igpapahulay gibuhat alang sa tawo” uban sa tinguha sa paghatag nato og kapahulayan gikan sa kalibotan ug pagbag-o sa atong lawas ug espiritu.
Kita usab mahinumdom Kaniya kon kita moadto sa templo—ang balay sa Ginoo. Ang mga templo mohatag nato og mas lawom nga kahibalo ni Jesukristo isip ang sentro sa pakigsaad nga mogiya nato ngadto sa kinabuhing dayon, ang labing mahinungdanon sa … mga gasa sa Dios.
Ang pagtambong sa templo nakahatag nako og kahupayan ug dakong paglaom mahitungod sa atong mahangtorong kapalaran. Ako nakasinati og langitnong mga koneksiyon uban sa mga tawo sa duha ka habig sa tabil. Ako nakakita og makapaayo nga mga milagro sa mga kinabuhi sa akong gagmay nga mga anak, ang duha nila nagpakabuhi nga adunay wala makita nga mga sakit nga nagkinahanglan og inadlaw nga pag-atiman sa tibuok niini nga kinabuhi.
Ang among pamilya magmaya samtang mopakigbahin kami mahitungod sa plano sa kalipay. Ang mga nawong sa akong mga anak mohayag kon sila makadungog niana, salamat ni Jesukristo, ang ilang “mga kasakitan sulod lamang sa mubo nga higayon.” Kami nagmahal pag-ayo sa among mga anak, ug kami nasayod nga sa umaabot, sama sa gitudlo ni Presidente Jeffrey R. Holland, sila “mobarog sa among atubangan nga mahimayaon ug halangdon, sa makapatingala nga hingpit nga lawas ug hunahuna.” Ang atong mga pakigsaad mas mopaduol nato ngadto sa Dios ngadto sa punto sa paghimo sa imposible nga posible, butangan ang matag luna sa kangitngit ug pagduhaduha sa kahayag ug kalinaw.
Salamat ni Jesukristo, adunay paglaom ug maayong pagkahimo nga mga rason sa pagpadayon sa paghigugma, pag-ampo, ug pagsuporta niadtong atong giampingan.
Nasayod ko nga Siya buhi. Siya nakaila kanato ug nahigugma kanato. Siya mao ang dalan, ang kamatuoran, ug ang kinabuhi sa kalibotan.
Akong gidapit kitang tanan karon sa pagsentro sa atong mga kinabuhi diha ni Jesukristo ug sa Iyang mga pagtulun-an. Ang pagbuhat sa ingon motabang nato nga makalikay sa pagpaak sa mga taga sa tentasyon, pagkasala, ug kaluoy sa kaugalingon. Kita mobarog ingon nga mga templo—balaan, lig-on, ug makanunayon. Kita mopahunong sa mga unos, ug kita mopauli, molahutay hangtod sa kataposan ug magmaya sa kataposan. Sa ngalan ni Jesukristo, amen.