Ukuramya
Ese kuramya Imana bisobanuye iki kuri wowe nanjye?
“Yesu amaze kuvukira i Betelehemu mu gihugu cy’i Yudaya ku ngoma y’Umwami Herode, haza abanyabwenge baturutse iburasirazuba bajya i Yerusalemu,
“Barabaza bati, Umwami w’Abayuda wavutse ari hehe? Ko twabonye inyenyeri ye turi iburasirazuba, none tukaba tuje kumuramya.”
Abanyabwenge, nk’uko rimwe na rimwe bitwa, barashishozaga mu gushakisha bagamije kubona no kuramya Mesiya. Kuri bo, kuramya byari bisobanuye kunamira imbere Ye maze bakamutura impano z’izahabu n’icyome n’ishangi.
Kuramya Imana bisobanuye iki kuri wowe nanjye?
Iyo dutekereje ku kuramya, mu busanzwe ibitekerezo byacu byerekeza ku buryo twerekana ukwimarira mu iyobokamana kwacu twaba twiherereye no mu materaniro mu Itorero. Nk’uko natekereje byimbitse ku bijyanye no kuramya Data wo mu Ijuru n’Umwana We w’Igikundiro, Umukiza wacu, nagize ibitekerezo bine : icya mbere, ibikorwa bigize ukuramya kwacu; icyakabiri, imyifatire n’ibyiyumviro bigira ingaruka mu kuramya kwacu; icya gatatu, umwihariko w’ukuramya kwacu; maze icya kane, guharanira kumera nka Data wo mu ijuru n’Umwana We Yesu Kristo.
Icya mbere, Ibikorwa Bigize Ukuramya Kwacu
Bumwe mu buryo bumenyerewe kandi bw’ingenzi bwo kuramya ni uguteranira ahantu heguriwe Imana ngo hakorerwe ibikorwa by’ukuramya Imana. Nyagasani aravuga ati: “Kandi kugira ngo mushobore kurushaho kwirinda kwanduzwa n’isi, muzajya mu nzu y’isengesho maze muture amasakaramentu yanyu ku munsi wanjye mutagatifu.” Ibi, mu by’ukuri, ni ibidutera ishyaka by’ibanze mu kubaka insengero. Ariko, bibaye ngombwa, ahantu hateguriwe Imana hazahinduka ahabikwiriye nidushobora kuhashora urwego runaka rw’ubukiranutsi.
Icy’ingenzi ni ibyo dukora igihe twateranye ku munsi wa Nyagasani. Mu by’ukuri, twambara neza uko tubishoboye bijyanye n’ubushobozi bwacu—tudakabije ahubwo twikwije kandi twiyorohereje mu buryo bwo kwerekana icyubahiro n’ugushengerera duha Imana. Imyitwarire yacu n’iyogushengerera no kubaha. Turamya twifatanyije mu masengesho; turamya turirimba indirimbo (atari ukuzitega amatwi gusa ahubwo no kuziririmba); turamya duhugurana ndetse twigishanya. Yesu aravuga ati: “Mwibuke ko kuri uyu munsi mutagatifu wa Nyagasani, muzatura musumba byose [bisobanura, amaturo yanyu … y’igihe, impano, cyangwa ubushobozi, mu gukorera Imana no mugenzi wanyu’] n’amasakaramentu yanyu mwaturira ibyaha byanyu abavandimwe banyu, n’imbere ya [Nyagasani].” Ntabwo duterana kugira ngo dushimishe cyangwa twidagadure—urugero, nk’itsinda ry’abanyamuziki—ahubwo duterana ngo tumwibuke kandi “dushobore kwigishwa birushijeho gutungana” mu nkuru nziza Ye.
Mu giterane giheruka, Umukuru Patrick Kearon yatwibukije ko “tudaterana ku Isabato gusa ngo byitwe ko twitabiriye iteraniro ry’isakaramentu maze tugenzure urutonde rw’abitabriye. Duterana ngo turamye. Hari itandukaniro rikomeye hagati y’ibyo bintu bibiri. Kwitabira bisobanuye kuba uhari. Ariko kuramya ni uguhimbaza no gusingiza Imana tubigambiriye mu buryo buduhindura!”
Kwegurira Amasabato yacu Nyagasani n’intego Ze ubwabyo ni igikorwa cyo kuramya. Mu myaka yashize, Umukuru Russell M. Nelson yaritegereje: “maze arabaza ati: Ese ni gute dutagatifuza umunsi w’Isabato? Nkiri muto cyane, nigaga umurimo w’abandi babaga barakoze intonde z’ibintu bikorwa n’ibintu bidakorwa ku Isabato. Nyuma yaho nibwo namenyeye mu byanditswe byera ko imyitwarire n’imyifatire byanjye ku Isabato byari ikimenyetso hagati yanjye na Data wo mu Ijuru [reba Kuva 31:13; Ezekiyeli 20:12, 20]. Hamwe n’uko gusobanukirwa, sinkikeneye intonde z’ibikorwa n’ibidakorwa ku Isabato. Ubwo nagombaga gufata icyemezo niba igikorwa runaka ari ngombwa cyangwa kitari ngombwa gukorwa ku Isabato, naribazaga gusa nti: ‘Ese ni ikihe kimenyetso nshaka guha Imana?’”
Kuramya ku munsi wa Nyagasani bigaragazwa no kwibanda by’umwihariko ku gitambo cy’impongano ya Yesu Kristo. Twizihiza Izuka Rye kuri Pasika mu buryo bukwiye kandi bwihariye, ariko nanone buri cyumweru uko dufata isakaramentu nk’ibimenyetso by’Impongano Ye, harimo n’Umuzuko We. Ku bantu bihana, gufata isakaramentu ni ikimeyetso kiranga kuramya ku Isabato.
Kuramiriza hamwe nk’“umubiri wa Kristo” bifite ububasha n’inyungu byihariye uko twigisha, dufasha, kandi tugashyigikirana. Birashimishije ko ubushakashatsi bwakozwe vuba aha bwerekanye ko abantu batekereza ko ubuzima bwabo bwo muri roho ari ibanga ni gake cyane bashyira imbere ugukura muri roho, cyangwa bakavuga ko ukwizera kwabo ari ingenzi cyane, cyangwa bakagira igihe gihoraho cyo kuramya Imana. Mu bikorwa byacu nk’umuryango w’Abera, dukomezanya mu kuramya no mu kwizera.
Icyakora, ntidushobora kwibagirwa ibikorwa bya buri munsi byo kuramya twisangamo umuntu ku giti cye ndetse no murugo. Umukiza aratwibutsa ati: “Icyakora imihigo yanyu izaturwa mu bukiranutsi mu minsi yose n’ibihe byose.” Mushiki wacu umwe yarebanye ubushishozi, aravuga ati: “sinshobora gutekereza kurushaho uburyo bwimbitse bwo kuramya Imana buruta guha ikaze abana bato Be mu buzima bw’abanyamuryango b’Itorero bakabitaho kandi bakabigisha umugambi We kuri bo.”
Aluma na Amuleki bigishije Abazoramu bari barabujijwe kuramya Imana mu masinagogi yabo na rimwe mu cyumweru gusa, ahubwo bakayiramya buri gihe n’“ahantu aho ari ho hose bashobora kuba.” Bavuze ku byerekeye isengesho nk’uburyo bwo kuramya bagira bati:
“Mugomba gufungurira roho zanyu mu byumba byanyu musengeramo, n’ahantu hose hanyu hihishe, no mu gasi kanyu.
“Koko, kandi igihe cyose mudatakambiye Nyagasani, mureke imitima yanyu yuzure, imwiyegurire mu isengesho ry’ubudahwema.”
Bavuze nanone ku gushakisha ibyanditswe bitagatifu, gusangiza ubuhamya bwa Kristo, ibikorwa by’urukundo ruhebuje no gufashanya, kwakira Roho Mutagatifu, kandi no kubaho batanga amashimwe buri munsi. Tekereza kuri kiriya gitekerezo: “kubaho mutanga amashimwe buri munsi.” Bivuga ku gitekerezo cyanjye cya kabiri:
Imyifatire n’Ibyiyumvo Bigize Ukuramya kwacu
Kwiyumva no gushimira Imana, ni byo mu by’ukuri, bidutera kuramya dufite umunezero uvuguruye bitandukanye no kubibona nk’indi nshingano y’inyongera.
Ukuramya k’ukuri gusobanura gukunda Imana no kuyiyegurira—ari yo mpano y’agaciro dushobora gutanga. Igihe yabazwaga itegeko rya mbere risumba ayandi mategeko yose, Yesu yarasubije ati: “Ukundishe Nyagasani Imana yawe umutima wawe wose, n’ubugingo bwawe bwose, n’ubwenge bwawe bwose.” Yaryise kandi itegeko rya mbere.
Ubu bwari uburyo bwihariye bwa Yesu bwo kuramya Data. Ubuzima Bwe n’igitambo cy’impongano Ye byeguriwe ikuzo rya Data. Mu gihe twibutse ugutakamba kwavuye mu ndiba y’umutima wa Yesu hagati y’ububabare n’agahinda birenze imyumvire bitugiraho ingaruka: “Data, niba bishoboka iki gikombe kindenge,” ariko noneho mu kuganduka Kwe ati: “ariko bye kuba uko njyewe nshaka, ahubwo bibe uko wowe ushaka.”
Ukuramya ni uguharanira gukurikiza uru rugero rutunganye. Ntabwo tuzagera ku butungane vuba na bwangu binyuze muri iyi mihate, ariko buri munsi ni “[tumutambira] igitambo cy’umutima umenetse na roho ishengutse,” azatubatiza nanone na Roho We kandi atwuzuze inema Ye.
Icya gatatu, Umwihariko w’Ukuramya Kwacu
Mu gice cya mbere cy’Inyigisho n’Ibihango, Nyagasani ashinja abantu b’isi batamwumvira ati:
“Bateshutse ku migenzo yanjye, kandi batatiriye igihango cyanjye gihoraho;
“Ntibasaba Nyagasani gushyiraho ubukiranutsi bwe, ahubwo buri muntu agendera mu nzira ye bwite, n’inyuma y’ishusho y’imana ye bwite, ifite ishusho isa n’isi.”
Ni byiza kuri twe kwibuka urugero rw’abasore batatu b’abayahudi, Ananiya, Mishayeli na Azariya, bajyanywe bunyago i Babuloni nyuma gato Lehi n’umuryango we bavuye i Yerusalemu. Umuyobozi w’i Babuloni yabahinduriye amazina abita Saduraka, Meshaki na Abedenego. Nyuma yaho, igihe abo bombi batatu bangaga kuramya igishushanyo cyari cyakozwe n’Umwami Nebukadinezari, yategetse ko babajugunya mu itanura ry’umuriro ugurumana, ababwira ati: “Mbese Imana iri bubakize amaboko yanjye ni iyihe?”
Muribuka igisubizo cyabo gishize amanga:
“Imana yacu dukorera ibasha kudukiza mu itanura ry’umuriro ugurumana, kandi izadukiza ukuboko kwawe mwami.
“Ariko naho itadukiza, umenye ko … tutari bukorere imana zawe, habe no kuramya icyo gishushanyo cy’izahabu wakoze.”
Itanura ryari rishyushye cyane ku buryo ryishe abo mu ngabo babajugunyemo, ariko Saduraka, Meshaki, na Abedenego ntacyo babaye. “Nebukadinezari aravuga ati “Imana ya Saduraka na Meshaki na Abedenego ishimwe, ni yo … yakijije abagaragu bayo bayiringiye, … bagahara amagara yabo, kugira ngo batagira indi mana yose bakorera cyangwa basenga itari Imana yabo.” Biringiye muri Yehova ko ari bubakize, “ariko naho atabakiza,” mu yandi magambo, naho Imana mu bushishozi Bwayo itabarinda gupfa, nubundi bari gukomeza bakaba abanyakuri kuri Yo.
Ikintu cyose turutisha kuramya Data n’Umwana kiba kibaye ikigirwamana. Abo bahakana Imana nk’isoko y’ukuri, cyangwa bakanga kugira ibyo babazwa na Yo, bakagira ibyo bayisimbuza ubwabo nk’ibigirwamana byabo. Umuntu uha agaciro kuba umwizerwa mu ishyaka impamvu kuruta ukuyoborwa n’Imana aba aramya ikigirwamana. Nanone kandi n’abo bigira nkaho baramya Imana ariko ntibakurikize amategeko Yayo baba bari kugenda mu nzira yabo ubwabo nk’uko Imana yagize iti: “N’iminwa yabo bavuga ko banyegereye, ariko imitima yabo imba kure.” Intego y’ukuramya kwacu ishingiye gusa ku “Mana y’ukuri yonyine, n’uwo yatumye ari we yesu Kristo.”
Icya nyuma, Ugukenera Kwigana Data n’Umwana
Hanyuma, uko tubayeho bishobora kuba uburyo bwiza bwo kuramya. Kugaragaza ukwimariramo kwacu bisobanura kwigana na Data n’Umwana, Ibinyabuzima Bitagatifu turamya, gushakisha no gukoresha muri twe ibibaranga. Niba, nk’uko bivugwa mu mvugo isanzwe, kwigana umuntu ari uburyo buvuye ku mutima bwo gushimisha, noneho twavugana ku bijyanye n’Imana icyubahiro, ukwigana bikaba uburyo buturutse ku mutima bw’ugushengerera Imana. Ibi bisobanuye umuhate ukomeye kandi uhozaho utuvuyemo kugira ngo dushakishe ubutagatifu. Ariko kuba nka Kristo nabyo bituruka ku bikorwa byacu bisanzwe byo kuramya. Amagambo y’Umukuru Kearon navuzeho kare ajyanye n’ukuramya aho agira ati: “mu buryo buduhindura,” ni ingenzi kandi akwiye kwitabwaho. Ukuramya kwa nyako kurahindura.
Inzira y’igihango ni nziza bihebuje kuko iduha inzira yo kuramya Imana, gukunda Imana no kuba indahemuka ku Mana. Twinjira muri iyo nzira, binyuze mu mubatizo, twiyemeza kwitirirwa izina rya Kristo no kubahiriza amategeko Ye. Twakira impano za Roho Mutagatifu, Roho Mutagatifu w’inema bw’Umukiza uducungura ndetse akatwezaho ibyaha uko twihana. Ndetse dushobora kuvuga ko mu kwihana tuba turimo kumuramya.
Nyuma y’aho hakurikiraho indi mihango y’ubutambyi y’inyongera n’ibihango byakorewe mu Nzu ya Nyagasani ari nabyo bidutagatifuza. Imihango n’imigenzo yo mu ngoro bigize uburyo bukomeye cyane bwo kuramya.
Umuyobozi Russell M. Nelson yashimangiye ko “buri mugabo n’umugore ugira uruhare mu mihango y’ubutambyi agakora kandi akubahiriza ibihango n’Imana ashyikira mu buryo butaziguye ububasha bw’Imana.” Ubu ntabwo ari ububasha gusa dushingiraho dufasha kandi duhesha abandi umugisha. Nanone ni imbaraga zituruka ku Mana zidukoreramo ngo zidutunganye kandi zitweze. Uko tugirana ibihango n’Imana n’uko dukomeza kubyubahiriza, “ububasha [butagatifuza] bw’ubumana bwigaragariza.” muri twe.
Ndiringira ko, nk’Abanefi n’Abalamani ba kera, “[tuzagwa] hasi ku birenge bya Yesu, nuko [tuka]muramya.” Ndiringira ko, nk’uko byategetswe na Yesu, “[tuzagwa] hasi nuko [tukaramya] Data mu izina [rya Mwana].” Ndiringira ko twakwakira Roho Mutagatifu maze tukegurira Imana imitima yacu, tudashyira izindi mana imbere Yayo, kandi nk’abigishwa ba Yesu Kristo, tukigana indangakamere Ye mu buzima bwacu bwite. Ndahamya ko ibyo nitubikora, tuzagirira umunezero mu kuramya. Mu izina rya Yesu Kristo, amena.