Alltaf páskar
Gerið páskana að tíma vonar með því að færast nær frelsaranum.
Myndskreyting: Toby Newsome
Á fyrsta páskasunnudeginum, þegar María Magdalena og fleiri konur vitjuðu grafar Krists, sögðu englarnir við þær: „Hann er ekki hér. Hann er upp risinn“ (Matteus 28:6). Þessi boðskapur færði lærisveinum hans svo mikla von, eftir örvæntingu þeirra að verða vitni að krossfestingu hans.
Bestu fréttirnar? Þessi boðskapur er enn sannur. Kristur er enn upprisinn. Hann sigrar enn dauða og synd. Vonin sem kemur frá upprisu hans stendur ykkur enn til boða – ekki aðeins um páskana, heldur alltaf!
Páskarnir eru ekki eini dagurinn sem þið getið heiðrað upprisuna. Reynið nokkrar þessara ábendinga til að gera páskana – og hátíðir frelsarans og friðþægingar hans og upprisu – að heilli árstíð vonar og gleði.
Lærið um líf frelsarans
Ritningarnar eru öflugt verkfæri til að hjálpa ykkur að kynnast Jesú Kristi persónulega og styrkja trú ykkar á hann. Á páskatímanum getið þið beint ritningarnámi ykkar að síðustu viku lífs hans eða að heimsókn hans til Ameríku sem hinn endurreisti frelsari heimsins. Lestur þessara áhrifamiklu frásagna getur hjálpað ykkur að finna elsku frelsarans til ykkar og skilja betur friðþægingu hans og upprisu.
Ef þið eruð ekki viss um hvaða ritningarhluta þið leggið áherslu á, gætuð þið prófað að fylgja leiðarvísinum fyrir páskanám í Kom, fylg mér eða öðrum leiðarvísum sem gefnir eru út á ChurchofJesusChrist.org.
Takið þátt í musterisstarfi
Sigur Krists yfir dauðanum og vitneskjan um að við munum einnig rísa upp, er „dýrðlegastur alls boðskapar sem ætlaður er mannkyni“. Vegna friðþægingar hans og upprisu, getur fjölskylda okkar verið eilíf og allir áar okkar geta fengið tækifæri til að gera helga sáttmála.
Þið getið haldið upp á upprisu Jesú Krists og haldið því verki hans áfram að endurleysa þá sem eru í andavarðhaldi (sjá 1. Pétursbréf 3:18–20) með því að vinna ættarsögu og musterisverk. Þjónusta ykkar í musterinu gerir þessum öndum kleift að velja að taka líka á móti öllum blessunum friðþægingar Krists.
Þjónið öðrum eins og Kristur myndi gera
Jesús Kristur uppörvaði aðra og þjónaði þeim í allri sinni jarðnesku þjónustu – jafnvel þegar hann var á krossinum. Þið getið heiðrað fordæmi hans með því að þjóna fólkinu í kringum ykkur á þann hátt sem hann myndi gera. Einföld góðverk, eins og að brosa oft, hlusta af einlægni á aðra og hjálpa til á heimilinu, geta jafnvel skapað kristilegar kærleiksaðstæður. Þegar þið þjónið öðrum, getið bæði þið og þau skynjað von og gæsku páskanna.
Meðtakið sakramentið markvisst
Frelsarinn sjálfur kom á hefð til að hjálpa ykkur að muna eftir honum betur en nokkuð annað: sakramentið. Að meðtaka sakramentið sýnir að þið eruð fús til að „hafa hann ávallt í huga og halda boðorð hans“ og í staðinn lofar hann að „andi hans sé ætíð með [ykkur]“ (Kenning og sáttmálar 20:77). Þetta er kraftmikið loforð! Þegar þið meðtakið sakramentið í hverri viku, getið þið byrjað að finna sannleika þessa loforðs um páskana og alltaf.
Reynið að íhuga þjónustu Jesú Krists, friðþægingu hans og upprisu er þið meðtakið sakramentið. Biðjið af einlægni og reynið að íhuga hvernig fórn hans hefur blessað ykkur persónulega.