Te fa’anahora’a a te Metua i te ao ra nō te mau ’utuāfare

Nā Elder Dieter F. Uchtdorf

Nō te pupu nō te Tino ’Ahuru ma Piti ’āpōsetolo

E ha’amaita’i te mau ha’api’ira’a, te mau ’ōro’a ’e te mau fafaura’a o te hiero i te mau ’utuāfare ato’a o te fenua nei.

Tē moemoeā ra Iakoba i te ’ē’a i te ra’i ra

’Aita i maoro a’enei, ’ua haere māua te tuahine Uchtdorf i te bāpetizora’a o te hō’ē o tā māua hina. ’A hi’ohi’o ai māua e rave rahi u’i ma te ’oa’oa i teie ’ōro’a, ’ua māuruuru roa māua i tō tātou Metua i te Ao ra nō Tāna fa’anahora’a nō te fa’aorara’a nō Tāna mau tamari’i. ’Ua ’ite māua i te faufa’a rahi o te ’utuāfare ’e o te mau fafaura’a mo’a nōna mai te ha’amatara’a mai ā.

E ’itehia teie faufa’a rahi i roto i te ’ā’amu ’o Iakoba, te metua ha’apa’o maita’i, i roto i te Faufa’a Tahito ’o tei rave i te hō’ē tere roa ’e te rohirohi nō te ’imi i te hō’ē vahine fa’aipoipo, ’ia fa’aipoipo i roto i te fafaura’a ’e ’ia ha’amau i te hō’ē ’utuāfare. I te hō’ē pō, ’ua fa’afa’aēa Iakoba i te hō’ē vahi, e ’ōfa’i āna’e rā tō reira ’ei turu’a nōna. ’Ua rohirohi paha ’oia, ’aita ho’i i maoro roa, vare’a a’enei i te ta’oto—’e moemoeā atura.

’Ite atura Iakoba i « te hō’ē ’ē’a ’ua fa’ati’ahia i ni’a i te fenua nei, ’e ’ua tae roa te ’auru o taua ’ē’a ra i ni’a i te ra’i ; e inaha te pa’iuma ra te mau melahi a te Atua i ni’a, ’e te pou maira i raro i taua ’ē’a ra.

« E inaha, tē ti’a noa maira Iehova i ni’a a’e i te reira, ’e ’ua nā ’ō maira, ’o Vau ’o Iehova, o te Atua nō tō mētua ra nō Aberahama, e te Atua nō Isaaka » (Genese 28:12–13).

I muri iho, ’ua rave te Fatu i te tahi fafaura’a faufa’a rahi i parauhia ia Iakoba—tei parau-ato’a-hia i te metua tāne ’e i te metua tupuna ’o Iakoba, ’o Isaaka ’e ’o Aberahama, ’oia ato’a :

’Ua parauhia e riro mai Iakoba ’ei metua nō « e rave rahi roa ra » (Genese 28:3, 14).
Te fenua i parauhia nō te hua’ai ’o Iakoba (hi’o Genese 28:4, 13).
Te mau parau i parauhia ē, nā roto ia Iakoba ’e i tōna « hua’ai e ha’amaita’ihia ai » te mau ’utuāfare ato’a o te ao nei (Genese 28:14 ; reta tei fa’ahuru-’ē-hia).

Nō te mo’a o te ’ohipa i tupu i ni’a ia Iakoba i parau ai ’oia, « E riro tei ’ōnei Iehova […] E’ita te reira i te hō’ē mea ’ē noa atu maori rā « o te fare teie o te Atua; e o te ’ūputa teie o te ra’i » (Genese 28:16–17). E ma’iri ihora Iakoba i taua vaeha’a ra Betela, te aura’a « te fare o te Atua » (hi’o Genese 28:19, fa’ata’ara’a a).

Hōho’a te mau hiero i taua ’ē’a ra tā Iakoba i ’ite. Te mau ha’api’ira’a, te mau ’ōro’a ’e te mau fafaura’a o te fare o te Fatu, tē hono nei i te ra’i ’e te fenua. E fa’aauhia te mau fafaura’a i te māhāhā i ni’a i te hō’ē ’ē’a e ha’afātata ia tātou i te Fatu. ’E nā roto i tā tātou tāvinira’a i roto i te mau hiero mo’a, e ha’amaita’i tātou i « te mau ’utuāfare ato’a o te fenua nei »—i tahito ra, nō teienei ’e nō ananahi.

Te hō’ē hi’ora’a ’oa’oa o te ra’i

’O Elder Bruce C. Hafen, melo fa’aturahia nō te Hitu Ahuru, i te hō’ē meara’a ’ua niuniuhia ’oia e te hō’ē ta’ata nene’i ve’a o te fenua iho nō ni’a i te hō’ē buka tei tuatāpapa i te ’ā’amu o te paradaiso e parauhia nā roto i te mau ha’apa’ora’a rau.

Tē nā ’o ra Elder Hafen ē ; « ’Ua ’ite te ta’ata pāpa’i ē, tē porori nei te ta’ata i te parau nō te ra’i—te mau ’utuāfare i te ra’i ». Terā rā, « ha’iha’i roa te pāhonora’a nō roto mai i te rahira’a o te mau ’ēkālesia teresētiāno nō ni’a i teie pōrori rahi »—hō’ē noa rā i te mea ta’a ’ē roa : Te ’Ēkālesia a Iesu Mesia i te Feia Mo‘a i te Mau Mahana Hopea Nei.

I roto i te ’Ēkālesia i fa’aho’i-fa’ahou-hia mai a te Fa’aora, tē vai nei tā tātou mau hiero mo’a. E fa’aipoipora’a mure ’ore tā tātou, ravehia nā roto i te tura o te tā’atira’a, ’o tē ha’amaita’i tae roa atu i te tahi a’e pae o te pohe tāhuti nei. ’Ua parauhia nō tātou te hō’ē ananahi mure ’ore i pīha’i i tei herehia e tātou, i mua i te aro o te Metua ’e o te Tamaiti. ’Ia au i teie mau mea atoa, ’ua fa’aoti te mau ta’a pāpa’i buka ē, te atamanava a te feiā mo’a i te mau mahana hope’a nei nō ni’a i te parau o te paradaiso te mea rahi a’e—’e e ’āpiti ato’a atu vau i te parau ē, e mea ’oa’oa a’e.

Mai tei ha’api’ihia e peresideni Russell M. Nelson, « ’Ua rahu te Fatu […] i te fenua nei ’ia roa’a ia tātou te mau tino tāhuti nō te fa’atupu i te mau ’utuāfare. ’Ua fa’ati’a ’oia i Tāna ’Ēkālesia nō te fa’ateitei i te mau ’utuāfare. Tē hōro’a nei ’oia i te mau hiero ’ia tāhō’ēhia te mau ’utuāfare ē a muri noa atu ».

Parepare i te ’Utuāfare

E’ita tātou e māere ē, e pāto’ihia te hō’ē mea faufa’a rahi i roto i te fa’anahora’a a te Atua. ’Ua parau te peresideni M. Russell Ballard (1928-2023) ē : ’Ua ’ite Satane ē, te rāve’a pāpū ’e te maita’i roa a’e nō te ha’ataupupu i te ’ohipa a te Fatu, ’o te fa’aitira’a ïa i te pa’ari o te ’utuāfare ’e te mo’ara’a o tōna fare ».

Nō tō tātou ’ite i teie mau mea, ’ia ti’a tātou ’ei feiā itoito roa a’e i te ao nei nō te pāruru i te ’utuāfare.

Nāhea tātou ’ia rave i te reira ?

E nehenehe tātou e rave i « te mau rāve’a iti » (Alama 37:6) ’o tē ha’apūai i te mau aura’a ’utuāfare. ’Oia ho’i te pe’era’a i te mau parau tumu i ha’apāpūhia i roto i te poro’i nō ni’a i te ’utuāfare : « te fa’aro’o, te pure, te tātarahapa, te fa’a’orera’a hara, te fa’atura, te here, te aroha, te ’ohipa, ’e te mau fa’a’oa’oara’a maita’i ». E aha noa atu te huru o tō ’oe orara’a ’utuāfare i teienei, e fa’a’ite ’oe nā roto i tā ’oe mau ’ohipa ē, e mea faufa’a te mau aura’a ’utuāfare nō ’oe e a muri noa atu.

Nā roto i te fa’a’ohipara’a, te pārurura’a ’e te fa’a’itera’a i te mau parau mau mure ’ore nō ni’a i te mau ’utuāfare, e tauturu tātou ia vetahi ’ē ’ia ’ite ē « ’E pū te ’utuāfare nō te ’ōpuara’a a Tei Hāmani nō te hope’a mure ’ore o tāna mau tamari’i » ’e « nā roto i te mau hiero mo’a e nehenehe te mau ta’ata e ho’i fa’ahou i mua i te aro o te Atua ’e nō te mau ’utuāfare ’ia tāhō’ēhia ē a muri noa atu ».

« Tei pīha’i ato’a iho vau ia ’oe »

’Ia hi’o māua te tuahine Uchtdorf i te mau melo o tō māua ’utuāfare ’ia rave i te mau fafaura’a mo’a ’e tō tātou Metua here i te Ao ra ’e te mure ’ore, i tō roa tō māua ’ā’au i te ’oa’oa ’e te māuruuru. Tē ’oa’oa nei māua i tā māua mau tamari’i, i tā rātou mau tamari’i, i tō māua ato’a rā mau metua ’e i tō rātou mau metua. Tē feruri nei māua ma te here hōhonu i te rāve’a e tāhō’ē ai te mau fafaura’a o te ’evanelia ia mātou nā roto i te mau u’i ato’a.

Te mau ha’amaita’ira’a i parauhia a te Fatu ia Aberahama, Isaaka, ’e ia Iakoba i roto i tāna moemoeā, tē vaira te mau mea ato’a e rave ’e te mau ’utuāfare. ’E tē fa’atorohia nei te reira i ni’a i tāna mau tamari’i ato’a nō te fafaura’a —mai ia ’oe ’e o vau nei. Nā ’ō atura te Fatu ē, « E inaha, tei piha’i-ato’a-iho vau ia ’oe, ’e nā’u ’oe e tīa’i i tō ’oe na mau haere’a ato’a […] e ’ore ho’i au e fa’aru’e ia ’oe » (Genese 28:15).

Tē parau atu nei au ia ’oe ē, ’a pe’e ’e ’a fa’a’ite ai ’oe i te fa’anahora’a a tō tātou Metua i te ao ra nō te mau ’utuāfare, e pārahi mai ’oia i rotopū ia ’oe, i te mau taime ihoa rā e fa’aruru ai ’oe ’e te feiā i herehia e ’oe i te mau tāmatara’a. Nāna e amo ia ’oe, e fa’ateitei ia ’oe i ni’a, ’e e arata’i ia ’oe i te ’īra’a o te ’oa’oa ’e ’ōna, ’e o tāna Tamaiti ’o Iesu Mesia, i pīha’i i tō ’oe ’utuāfare—e a muri noa atu.