Mau tao’a i hunahia
Hi’o mai i te tāra’ehara a te Fa’aora i roto i te Faufa’a Tahito
’A hi’o maita’i ; ’e ’a ha’api’i ma te hōhonu mau.
E mana’o paha te tahi mau ta’ata ē, te Faufa’a Tahito, tei pāpa’ihia hou te Fa’aora i fānauhia mai ai ’e ’aita te reira e fa’ahiti nei i te i’oa o Iesu Mesia, ’aita ïa e parau rahi nō te Pāsa. Terā rā, mai tā te Buka a Moromona e ha’apāpū mai nei, ’ua ’ite ’e ’ua fa’aro’o ato’a te mau ta’ata i te Fa’aora (hi’o Iakoba 4:4).
’Ua ha’api’ihia te mau ’āti ’Īserā’ela ē, te fā o te ture a Mose ’o te fa’atoro ïa ia rātou i ni’a i te Mesia. ’Ei hi’ora’a, i te fa’aorara’ahia rātou i te ’ōphi taero nā roto i te hi’ora’a i te ’ōphi veo tā te Fatu i fa’aue ia Mose ’ia rave, ’ua ha’api’i ’o Mose ia rātou ē, e tāpa’o teie nō te Fa’aora, ’o tē haere mai ’e ’o tē fa’aora ia rātou i tā rātou mau hara (hi’o Nūmera 21:7–9 ; Alama 33:18–20).
Te mea pe’ape’a roa, e rave rahi o te reira māramarama tei ha’amo’ehia mai roto mai i te Bibilia o tā tātou e fa’ari’i nei i teie mahana, nō te mau tauiuira’a—hina’arohia ’e tei ’ore—i roto i te mau tenetere e rave rahi (hi’o 1 Nephi 13:23–27).
Mai te mea rā e hi’o ’oe, e ’ite iho ā ’oe e rave rahi mau fa’ahorora’a nō te Fa’aora ’e tāna tāra’ehara i roto i te Faufa’a Tahito. ’A paraparau ana’e tātou nō te tahi mau tumu !
Sābati Tāmara, Getesemāne ’e te tāmatara’a
« Tē haere mai ra tō ari’i ia ’oe ra : e parauti’a tāna, ’e tē ora ho’i ’oia ; haeha’a tōna, i te parahira’a i ni’a i te ’āsini, ’e te pinia, te fanau’a o te ’āsini » (Zekaria 9:9).
’Ua tupu te reira i ni’a i te mea tei parauhia i teienei, e hitu mahana hou te Pāsa, ’a tomo ai ’o Iesu ma te poupou i roto ia Ierusalema (hi’o Mataio 21:15).
« ’Ua rave mau rā ’oia i tō tātou paruparu, ’e ’ua hōpoi ’ē ’oia i tō tātou ’oto ; ’ua parau rā tātou iāna ē, tā’iri utu’a tōna ; mai te ta’ata tā’irihia e te Atua, i pohe ai ra » (Isaia 53:4).
I roto i te ’ō Getesemāne, ’ua mamae te Fa’aora nō te tā’āto’ara’a o te mau hara—’e ’ua fa’ari’i i te ’oto, te māuiui, te mau ma’i ’e te mau ’ati—o te mau ta’ata ato’a tei ora na ’e ’aore rā tei ora mai i ni’a i te fenua nei. Nō te reira, ’ua ’ite ’oia e nāhea ’ia tāmāhanahana ia tātou i roto i tō tātou mau tāmatara’a (hi’o Alama 7:11–13 ; hi’o ato’a Mataio 8:17).
« ’Ua rave-ino-hia ho’i ’oia, ’e ’ua fa’ahaeha’ahia mai ra ; ’aita rā tōna vaha i parau : i arata’ihia ’oia mai te fanau’a māmoe ra i te taparahira’a ra, e mai te māmoe e māmū i te aro o te feiā e pā’oti i tōna huruhuru ra, ’aita ato’a tōna vaha i parau » (Isaia 53:7).
’Ua māmū noa ’o Iesu i te taime a ui ai te tahu’a rahi Iāna (’a hi’o Mareko 14:60–61).
Te fa’asātaurora’a
« ’Ua ha’atihia vau e te urī ra ; ’ua ha’apunihia vau i te ’āmuira’a ta’ata ’ino ra : ’ua puta o’u pue rima ’e o’u pue ’āvae ia rātou ! » (Salamo 22:16).
« ’Ua tufa rātou i tā’u mau ’ahu nō rātou, e te ha’a-mairi-kelero nei i tā’u perēue » (Salamo22:18).
« ’Ua hopoi mai rātou i te au-’ava’ava ei mā’a ; e tā’u poihāra’a ra, ’ua hōpoi mai i te vinega e inu » (Salamo 69:21).
’Ua riro te fa’asātaurora’a ’ei rāve’a mātauhia nō te fa’autu’ara’a i taua taime ra, terā rā, e mea ri’ari’a roa te mau fa’ehau Roma i roto i tō rātou fa’ao’ō’ora’a ’e te māuiui o te Fa’aora (hi’o Ioane 19:1–3 ; Mataio 27:34–35, 48).
Te ti’afa’ahoura’a
« E nāna e ha’amou roa i te pohe e a muri noa atu ; e na te Fatu ra, nā Iehova, e horoi i te roimata i te mau mata ato’a ra ; e fa’a’ore ho’i i te fa’aino i tōna ta’ata i ni’a i tōna ta’ata, i ni’a i te fenua atoa nei : ’o Iehova ho’i teie e parau » (Isaia 25:8).
« ’Ua ’ite ho’i au ē, te ora ra tē fa’aora ’iā’u, e ’ia tae i te hope’a ra e ti’a mai ai ’oia i ni’a i te fenua nei : e ’ia pohe tā’u ’iri nei i teie nei ma’i, e hi’o ā vau i te Atua i roto i tā’u tino nei » (Ioba 19:25–26).
’Ua ti’afa’ahou mai te Fatu ’o Iesu Mesia. Tē ora nei ’oia i teienei ! E rave rahi mau pāpa’ira’a mo’a ’e te mau ’itera’a pāpū tei ha’apāpū nei i te reira. E aha atu ā, ’ua ’ite tō tātou Metua i te ao ra mai te ha’amatara’a ē, e hina’aro tātou i te hō’ē Fa’aora, ’e ’ua fa’aineine ’oia i tāna mau tamari’i ’ia fa’ari’i i te Fa’aora mai te tau mai ā o te Faufa’a Tahito.