Tā tātou Pāsa a te ’āti Iuda—te ’ōro’a mo’a

Nā David A. Edwards

Te mau ve’a a te ’Ēkālesia

Tē vai ra te tahi taura tā’amu i rotopū i te Pāsa i tahito ra ’e tā tātou ’ōro’a i te mau hepetoma tāta’itahi.

Hou te ’āti ’Īserā’ela i tahito ra i fa’aru’e ai i tē tītīra’a i Aiphiti, ’ua anihia ia rātou i te ha’apa’o i te mau arata’ira’a ta’a ’ē nō ’ō mai i te Fatu ra ’ia fa’aherehere te melahi ha’amou ia rātou, ’e ’aore rā ’ia nā ni’a iho ia rātou (hi’o Exodo 12). I muri a’e i tō rātou fa’aru’era’a ia Aiphiti, ’ua ha’apa’o te ’āti ’Īserā’ela i te tahi ’ōro’a i te mau matahiti ato’a, tei pi’ihia te Pāsa, nō te ha’amana’o e mea nāhea tō te Fatu fa’aorara’a i tōna nūna’a.

I te hepetoma hope’a o tōna orara’a tāhuti nei, tei te tahi tāmā’ara’a Pāsa ’o Iesu Mesia. Tē parau nei tātou i teienei tāmā’ara’a i te ’ōro’a tāmā’ara’a hope’a. ’Ua fa’a’ohipa te Fa’aora i taua taime ra nō te fa’aō mai i te ’ōro’a mo’a, tā tātou e ’āmui nei i te mau hepetoma ato’a. (Hi’o Mataio 26:26–28 ; Luka 22:19–20 ; Te Ha’api’ira’a Tumu ’e te mau Fafaura’a 20:77, 79.)

Teie e piti taura i rotopū i te Pāsa mātāmua, te tāmā’ara’a hope’a a te Fatu, ’e te ’ōro’a mo’a i teie mahana tei nehenehe e tauturu ia tātou ’ia ha’amana’o i tō tātou fa’aorara’a nā roto i te Fa’aora.

Te faraoa

Pāsa a te ’Ati Iuda : E hitu mahana te maoro, ’ua ’amu te ’āti ’Īserā’ela i te pane fa’a-hōpue-’ore-hia (mea vitiviti ’ia hāmani ’e ’ia ’ore ’ia ha’apē ’e tū’ino).

Tāmā’ara’a hope’a : ’Ua ha’amaita’i ’o Iesu Mesia ’e ’ua ’ōfati ’oia i te pane fa’a-hōpue-’ore-hia a te Pāsa, ’e ’ua hōro’a ’oia i te reira i te mau pipi. ’Ua parau ’oia ia rātou ’ia ’amu i te reira ’ei ha’amana’ora’a i tōna tino, tāna i ’ite ē, e ’ōfatifatihia ’e e pohe ’oia, ’e e ti’afa’ahou mai rā ’oia.

’Ōro’a mo’a : E ’amu tātou i te pane ’ei ha’amana’ora’a i te tino ’o Iesu Mesia.

’O Iesu Mesia te Pāne ora. Nā roto i tōna ti’afa’ahoura’a, e ti’afa’ahou mai tātou pā’āto’a ma te tino maita’i roa ’e te hape ’ore ’e te tāhuti ’ore. ’Ua fa’aora ’oia ia tātou mai te pohe.

Te toto o te ’Ārenio

Pāsa a te ’Ati Iuda : ’Ua riro te ’ārenio o te Pāsa ’ei fanau’a ’ārenio ’ino ’ore ’e e oni matahiti hō’ē. ’Ua ha’apohe hia, e ’ua ha’aputuhia tōna toto i roto i te ’āu’a. Hītope (e ’aihere) ’e tūtauhia i roto i te ’āu’a ’e e tā’irihia te reira nō te ha’aparare i te toto i ni’a iho i te pou fare o te ’ūputa ’e te te’a i ni’a a’e. Teie ïa te tāpa’o i rāpae’au ia ’itehia i te nūna’a fafauhia a te Fatu ’ia nā ni’a iho te melahi ha’amou i tō rātou fare tāpa’ohia e te toto ’ia nehenehe ia rātou ’ia fa’aorahia i te tītīra’a i Aiphiti.

Tāma’ara’a hope’a : ’Ua fa’a’ohipa ’o Iesu Mesia i te uaina ’ei hōho’a nō tōna toto. ’Ua parau ’oia i tāna mau pipi ’ia inu i te reira ’ei ha’amana’ora’a i tōna toto, tei ha’amani’ihia nō rātou nō te mātarara’a o te hara ’e ’ei tuha’a nō te tahi fafaura’a ’āpī.

’Ōro’a mo’a : E inu tātou i te pape ’ei ha’amana’ora’a i te toto o Iesu Mesia.

’O Iesu Mesia te ’ārenio a te Atua. ’Ua ha’amani’ihia tōna toto ’a māuiui ai ’oia nō tā tātou mau hara ’e tō tātou mau paruparu. Tōna toto—tāna tusia—e tāmā ia tātou. ’Ua fa’aora ’oia ia tātou i te hara.