E Pāsa fa’atumuhia i ni’a i te Fa’aora

’Ua ho’o ato’a vau i te tahi ’āfata rahi nō te mau ti’i na’ina’i ’o Iesu Mesia nō te Pāsa. ’I te ’ōmuara’a, ’ua mana’o vau i te huna i te tā’āto’ara’a i roto i tā’u fare ha’api’ira’a. ’Ia ’ite ra te mau ta’ata i te fare ha’api’ira’a i te ’āfata, ’ua ’ani mai rātou i teie mau ti’i na’ina’i. ’Ua ha’amata ato’a te mau ’orometua ha’api’i i te ani mai. ’E i muri iho, ’ua hina’aro ato’a te mau tamari’i tā’u i mana’o ē ’aita rātou e hina’aro, e ani ato’a mai rātou i te tahi ti’i na’ina’i nō Iesu nā rātou. ’E nō reira ’ua hōro’a vau nā rātou tei ’itehia e au.

’Aita te Fa’aora i mata’u i te paraparau ia vetahi ta’ata, ’oia ato’a te mau ta’ata fa’a’oroma’i roa a’e i roto i tāna sōtaiete. E hoa ’oia nō rātou. ’Ua fa’aea ’oia i pīha’i iho ia rātou. ’Ua tāma’a ’oia i pīha’i iho ia rātou. Nā te hōro’ara’a i te mau ti’i na’ina’i i ha’api’i iā’u ’ia paraparau atu ā, mai te Fa’aora ra i te huru. ’Ua ha’api’i ato’a mai te reira iā’u ē, noa atu ’o vai ’oe, noa atu te huru o tō ’oe ferurira’a, tē vai noa ra te tuha’a nō Iesu Mesia i roto i tō ’oe ’orara’a.

I roto i tō’u orara’a tā’āto’a, ’ua uiui au, nāhea vau i te fa’ari’i i te tāra’ehara a te Fa’aora ? I teie rā Pāsa, ’ua ha’api’i au ē, mai te mea e rave au i te mau tauira’a i roto i tō’u ’orara’a nō te riro hau atu mai te Fa’aora ra i te huru, tē ’ohipa ra tōna aroha tāra’ehara i roto i tō’u ’orara’a. ’E mai te mea e tāmata vau i te mahana tāta’itahi nō te taui i te mau mea iti ha’iha’i, e ha’amata ïa vau i te riro ’ei ta’ata maita’i roa atu.

Tau matahiti i roto i tō’u ’orara’a, ’ua tāfifi au i te fa’a’ohipara’a i te hōho’a faufau. I muri mai i te tahi ha’api’ira’a i roto i te piha ha’api’ira’a ’evanelia, ’ua fa’auruhia vau ’ia paraparau i tō’u ’episekōpo. E mea ’ōhie a’e ’ia ha’amata i te upo’oti’a i ni’a i tā’u ’arora’a i te taime ’a parau ai au i tō’u ’episekōpo ’e tō’u nā metua, nō te mea e mea fifi roa ’ia haere ’ōtahi noa nā roto ana’e i te reira.

’Ua ha’amata vau i te tāmata i te pure ’e i te tai’o i tā’u mau pāpa’ira’a mo’a i te mau mahana tāta’itahi, ’e ’ua tāmata vau i te hāmani maita’i atu ā i te fare ha’api’ira’a. ’Ua tauturu te reira iā’u nō te mea tē ha’atumu rahi nei au i ni’a i te Fa’aora ’eiaha rā i tā’u mau hara. ’Ua fāriu atu vau i ni’a iāna hau atu i te vāhi tei reira vau i te mātāmua ra.

Nā roto i te tāra’ehara a Iesu Mesia, ’ua upo’oti’a vau i ni’a i tā’u ’arora’a i te hōho’a faufau. ’Ua rahi atu ā tō’u rirora’a mai ’o vai tā te Atua e hina’aro iā’u ’ia riro mai. I teienei, ’ua ti’a iā’u ’ia ha’amaita’i i te ’ōro’a mo’a nō te mea ’ua taui te Fa’aora iā’u ’e ’ua tāmā iā’u. Tē māuruuru nei au ’ia vai ti’amā vau nō te fa’a’ohipa i te autahu’ara’a nō te ha’amaita’i i te orara’a o te feiā e ’āua ha’ati iā’u nei.

I teie matahiti i roto i te piha ha’api’ira’a ’evanelia, ’ua fa’ari’i au i te tahi ’itera’a mau ’a paraparau ai mātou i ni’a i te tusia a te Fa’aora. ’Ua mana’o vau ē, ’a māuiui ai ’oia, ’ua nehenehe iāna i te tāpe’a i te reira i te mau taime ato’a. I muri iho rā, ’ua feruri au iāna i te ferurira’a ē : « ’Aita, tītauhia iā’u ’ia tāmau noa i te rave i te reira. Tītauhia iā’u ’ia rave i te reira nō Ben. E hina’aro ’oia i te reira. » Nō’u nei, ’ua tū’ati mau te reira mana’o i tō’u aura’a ’e te Fa’aora i te Pāsa.

Pāsa e haere mai nei, e ’ohipa paha vau i ni’a i te tahi atu hōho’a pirīti nō Iesu. ’Ua hina’aro roa vau ’ia horo’a fa’ahou atu i te mau ti’i na’ina’i. Noa atu te huru, e feruri au i te māuiui ’o te Mesia ’e i tāna tāra’ehara nō’u. Maoti ’oia, e nehenehe au e tātarahapa i tā’u mau hara ’e e fa’aho’i i te reira iāna ra ’e i te Metua i te ao ra i te hō’ē mahana.

’Ua ’ite au ē, ’ua ora ’e ’ua pohe te Fa’aora nō tātou tāta’itahi, ’e ’ua ’ite ’oia ’o vai tātou ’e e aha tā tātou e hina’aro nei. Mai te mea e tāmata mau tātou, e nehenehe tātou e fa’ari’i i tōna mana tāmāhanahana ’e te tauira’a, ’e e nehenehe tātou e riro mai ’ei mau ta’ata maita’i atu ā.