Pāsa i te mau taime ato’a
’A fa’ariro i te Pāsa ’ei tau tīa’ira’a nā roto i te ha’afātatara’a a i te Fa’aora.
Fa’ahōho’ara’a nā Toby Newsome
I te Sābati Pāsa mātāmua, ’a haere ai Maria Magedalena ’e te tahi atu mau vahine i te mēnema o te Mesia, ’ua parau te mau melahi ia rātou, « Aore ’oia i ’ōnei, ’ua ti’afa’ahou a’e nei ïa » (Mataio 28:6). Fa’atupu a’enei teie parau i te tīa’ira’a rahi i roto i Tāna mau pipi i muri a’e i tō rātou ’oto i te ’itera’a i Tōna fa’asātaurora’a.
Te parau ’āpī maitai roa a’e ? Tē riro noa ra ā taua parau ra ’ei parau mau. E Mesia ti’afa’ahou noa nei ā i teienei. Tē upo’oti’a noa nei ā ’oia i ni’a i te pohe ’e te hara. ’E te tīa’ira’a nō roto mai i tōna ti’afa’ahoura’a, tē vai noa nei ā nō ’oe—’eiaha i te Pāsa noa, i te mau taime ato’a rā !
Te Pāsa, e’ita te reira ana’e te mahana e fa’atura ai ’oe i te ti’afa’ahoura’a. ’A tāmata i te tahi o teie mau mana’o nō te fa’ariro i te Pāsa—’e te mau fa’ahanahanara’a i te Fa’aora ’e i tāna Tāra’ehara ’e i tōna Ti’afa’ahoura’a—’ei tau nō te tīa’ira’a ’e te ’oa’oa.
Tuatāpapa i te orara’a o te Fa’aora
E mauha’a pūai te mau pāpa’ira’a mo’a nō te tauturu ’ia ’ite maite ’oe iho ia Iesu Mesia ’e ’ia rahi tō ’oe fa’aro’o Iāna. I te tau Pāsa, e nehenehe ’oe e tuatāpapa maite i te ’ā’amu nō ni’a i te hepetoma hope’a ’o tōna orara’a ’aore rā i tōna fāra’a i Amerika ’ei Fa’aora ti’afa’ahou o te ao nei. Te tai’ora’a i teie mau ’ā’amu rahi, e tauturu te reira ia ’oe ’ia ’ite i te here o te Fa’aora ia ’oe ’e ’ia māramarama roa atu ā i tāna tāra’ehara ’e tōna ti’afa’ahoura’a.
Mai te mea ’aita ’oe i pāpū e aha te tūha’a e tai’o maite, ’a tāmata i te pe’e i te arata’i tuatāpapara’a nō te Pāsa i roto i te Mai, pe’e mai ’aore rā te tahi atu mau arata’i ha’api’ira’a tei nene’ihia i ni’a ChurchofJesusChrist.org.
’Āmui i roto i te ’ohipa hiero
Te upo’oti’ara’a o te Mesia i ni’a i te pohe ’e te ’itera’a ē, e ti’afa’ahou ato’a tātou, ’o « te poro’i hanahana roa a’e ïa o te mau parau poro’i ato’a i tō te ao nei ». Nā roto i tāna tāra’ehara ’e tōna ti’afa’ahoura’a, e riro mai tō tātou mau ’utuāfare ’ei mau ’utuāfare mure ’ore, ’e e nehenehe tō tātou mau tupuna ato’a e rave i te mau fafaura’a mo’a nō rātou iho.
E nehenehe ’oe e fa’ahanahana i te ti’afa’ahoura’a o Iesu Mesia ’e e tāmau noa i tāna ’ohipa nō te fa’aorara’a i te feiā i roto i te vāhi tāpe’ara’a vārua (hi’o Petero I 3:18–20) nā roto i te ravera’a i te ’ohipa ’ā’amu ’utuāfare ’e te ’ohipa hiero. Nā tā ’oe tāvinira’a i te hiero e fa’ati’a i te reira mau vārua ’ia mā’iti i te fa’ari’i i te mau ha’amaita’ira’a ato’a o te tāra’ehara a te Mesia.
Tāvini ia vetahi ’ē mai ia te Mesia e nā reira
’Ua fa’ateitei ’e ’ua tāvini Iesu Mesia ia vetahi ’ē i te roara’a ’o tāna tāvinira’a i te tāhuti nei—ē tae roa atu i ni’a i te sātauro. E nehenehe ’oe e fa’atura i te peu i ravehia e ana nā roto i te tāvinira’a i te ta’ata nā pīha’i iho ia ’oe mai Iāna e nā reira. Nā roto ato’a i te mau mea iti ha’iha’i o te hāmani maita’i mai te mata ’ata’ata pinepine, te fa’atoro-maite-ra’a i te tāri’a ia vetahi ’ē, ’e te tauturura’a nā pīha’i iho io ’oe, e fa’atupu te reira i te hō’ē vāhi nō te here Mesia. ’Ia tāvini ’oe ia vetahi ’ē, e tupu i roto ia ’oe ’e ia rātou te tīa’ira’a ’e te hāmanimaita’i o te tau Pāsa.
Rave i te ’ōro’a mo’a mā te ’ā’au tae
Nā te Fa’aora iho i ha’amau i te hō’ē peu tumu nō te tauturu ia ’oe ’ia ha’amana’o maite Iāna i te tahi noa atu mau mea ri’i : te ’ōro’a mo’a. Tē ravera’a i te ’ōro’a mo’a, e fa’a’itera’a te reira ē, ’ua tae tō ’oe mana’o ’ia « ha’amana’o ā iāna ’e ’ia ha’apa’o i tāna mau fa’auera’a », ’e e fafau mai ’oia e « vai noa tōna Vārua i roto ia [’oe] » (Te Parau Ha’api’ira’a ’e te mau Parau Fafau20:77). E fafaura’a pūai te reira ! ’Ia rave ’oe i te ’ōro’a mo’a i te mau hepetoma ato’a, e ha’amata ’oe i te ’ite i roto ia ’oe iho te parau mau o taua fafaura’a ra i te Pāsa ’e i te mau taime ato’a.
’A tāmata i te feruri i te tāvinira’a a Iesu Mesia, te tāra’ehara ’e te ti’afa’ahoura’a ’a rave ai ’oe i te ’ōro’a mo’a. ’A pure ma te ’ā’au tae, ’e ’a tāmata i te feruri nāhea tāna tusia i te ha’amaita’ira’a ia ’oe iho.