Tā’u Hōsānā

Te hō’ē o tā’u mau pene au roa a’e o te Faufa’a ’Āpī, nō ni’a ïa i te tomora’a hanahana a Iesu Mesia i Ierusalema. I tuō te ta’ata ē : « Hōsānā te Tamaiti a Davida ; ’ia ora ’oia ’o tei haere mai ma te i’oa o te Fatu. Hosana i te ra’i teitei ra » (Mataio 21:9). ’Ia tai’o vau i te reira, e feruri noa vau : E aha ra tā’u Hōsānā ?

E ’ū’ū tō’u mai te tamari’ira’a mai ā. I te tahi taime, e tupu tō’u ’ino’ino rahi ’e te mana’o paruparu nō te mea e’ita tā’u e nehenehe e parau i tā’u e hina’aro e parau. ’Ahani vau e paraparau maita’i roa, ’aore rā e ’ore roa e paraparau. E ha’ape’ape’a noa vau ’ia paraparau ana’e i mua i te ta’ata, ’aore rā ’ia pure ha’apūai vau. ’Ua tāparu mū noa vau i te fa’a’oroma’i, te hau ’e te tauturura’a, e rave rahi taime. Teie te hō’ē o tā’u iho mau hosana—tā’u ti’aorora’a nō te fa’aorara’a.

Mai tā te Mesia i ’ore i tāu’a ’ore i te ti’aorora’a a te mau ta’ata i Ierusalema, ’aita roa atu ’oia i tāu’a ’ore i tā’u. ’Aita ’oia i ’īriti ’ē atu i tō’u ’ū’ūra’a, ’ua ha’apūai rā ’oia iā’u ma te rāve’a ’aita vau i mana’o a’e. ’Ua tauturu mai ’oia iā’u ’ia ’ite i te mana’o hau i te taime ahoaho, ’e ’ia ’ite ē, noa atu te hapehape o tō’u reo, ’ua nava’i nōna.

Tātou tāta’itahi e ’ohipa i roto i tō tātou orara’a ’o tē fa’atopa ia tātou i ni’a i tō tātou turi ’āvae. I te tahi taime, e mana’o paha tātou ē, ’aita tā tātou ti’aorora’a i pāhonohia mai. Tē fa’aro’o nei rā ’oia i te mau hōsānā ato’a. ’E i tāna rāve’a maita’i roa ’e tāna tārena, e haere mai ’oia e tauturu ia tātou.

I Getesemāne, ’ua mamae te Mesia nō tā tātou mau hara ’e ’ua ’ite i tō tātou mau māuiui ’e tā tātou mau tāfifira’a. Tē tāmau noa nei ’oia i te arata’i ’e i te tāmāhanahana i te mau ta’ata ato’a e fāriu atu i ni’a iāna ’e i te Metua i te ao ra. Terā iho Mesia tei mamae nō tātou i Getesemāne ’e i ni’a i te sātauro, ’ua ti’a mai mai roto mai i te mēnema, ma te rē i ni’a i te pohe, ’ia roa’a tā tātou tīa’ira’a. ’O tōna ti’afa’ahoura’a te pāhonora’a hope i te mau hōsānā ato’a.