E tere i te hiero

Fa’ahōho’ara’a nā Katelyn Budge

I te hō’ē tau, ’aita vau i haere e māta’ita’i i te hiero, ’a ono matahiti te maoro. E mau matahiti fifi roa a’e te reira ’o tō’u orara’a; inaha ’ua fa’aru’e ato’a mai tō’u māmā i te reira tau. ’Ua hina’aro vau e haere i te hiero, hō’ē hora rā te ātea i tō’u fare, ’aita ho’i tā’u e moni nō te ’aufau i te tarahu pereo’o ’e ’aita ato’a e ta’ata nō te fa’ahoro iā’u.

’E i te matahiti i ma’iri a’e nei, pi’ihia vau ’ei peresideni nō te piha a te Feiā ’Āpī Tamāhine. I te anira’a mai tō’u peresideni nō te Feiā ’Āpī Tamāhine ’ia tauturu iāna ’ia fa’anaho i te mau ’ātivite matahiti, ’ua parau vau iāna, te ’ohipa mātāmua tā tātou e rave, o te haerera’a ïa tātou i te hiero, ’ei piha. I tō’u fa’aarara’a i te reira i te feiā ’āpī tamāhine, ’ua ’oa’oa roa rātou ! Nō te rahira’a o rātou, o te taime mātāmua ïa nō rātou te haerera’a i te hiero. ’Ua pure au ’e ’ua ha’apae pinepine i te mā’a ’a fa’aineine ai mātou nō te tere. ’Aita vau i hina’aro ’ia tupu noa mai te hō’ē fifi.

I roto i te hiero, ’ua iho mai te māmā i ni’a iā’u i te mau teimaha ato’a. Ua fafau vau e haere pinepine i te hiero. ’Ua riro te reira ’ei ’itera’a fa’ahiahia ’e ’ei ha’amaita’ira’a. Nō tō’u ’oa’oa rahi, ’ua ’āmui ato’a mai tō’u mau hoa taure’a i roto i te ’ohipa rahi a tō tātou Metua i te Ao ra.

’Ua ’ite au ē, e fare mo’a te hiero o te Fatu, te vāhi e ravehia ai te mau ’ōro’a mo’a. I reira, e pi’i tātou ma te pure i tō tātou Metua i te Ao ra, ’e e fa’a’āfaro ’oia i te mau mea i Tōna ra tau, e fa’a’ī ia tātou i te here, ’e e hō mai i te hau mure ’ore nō tātou. ’Ua ’ite au ē, ’ia hi’o tātou i ni’a i te Mesia, e ’ite tātou i te mau temeio e au nō tātou. E mau tamari’i herehia tātou e tō tātou Metua i te Ao ra, ’e e ’ohipa rahi tāna e hina’aro ia tātou ’ia rave—te ha’aputuputura’a ia ’Īserā’ela i nā pae e piti o te pāruru.