iTuvatuva nei Tamada Vakalomalagi me baleta na Matavuvale

Mai vei Elder Dieter F. Uchtdorf

Ena Kuoramu ni iApositolo Le Tinikarua

Na ivakavuvuli, cakacaka vakalotu, kei na veiyalayalati ni valetabu e vakalougatataki ira kece na matavuvale e vuravura.

Tadra tiko o Jekope na ikabakaba ki lomalagi

Wale tikoga qo, keirau a tiko kei Sisita Uchtdorf ena papitaiso ni dua na makubui keirau vakarua. Ni keirau sarava na veitabatamata ka rekitaka na ka e yaco oqo, keirau vakila na vakavinavinaka titobu vua na Tamada Vakalomalagi ena Nona ituvatuva ni veivakabulai me baleti ira na Luvena. Keirau a vakila na kena bibi Vua na matavuvale kei na veiyalayalati tabu mai na ivakatekivu saraga.

Na kena bibi oya e rawa ni laurai ena itukutuku ni Veiyalayalati Makawa baleti Jekope, ka a lakova e dua na ilakolako balavu ka dredre me kunea e dua na watina, vakamau ena veiyalayalati, ka tauyavutaka e dua na matavuvale.

Ena dua na bogi, a mai vakacegu toka o Jekope me moce ia a kunea ga na vatu me nona ilokoloko. A rairai oca sara vakalevu o koya, baleta ni a se moce rawa ga—ka qai tadra.

A raica o Jekope “e dua na ikabakaba sa tu e vuravura, a sa yacovi lomalagi na muana: ka raica, sa kaba cake ka kevu sobu tiko kina ko ira na agilosi ni Kalou.

“Ka, raica, sa tu mai muana ko Jiova, a sa kaya, Koi au ko Jiova na Kalou i Eparaama na tamamu, kei na Kalou i Aisake” (Nai Vakatekivu 28:12–13).

A qai cakava na Turaga eso na yalayala bibi vei Jekope—na yalayala a vakayacora talega vei tamai Jekope kei na tukai Jekope, o Aisake kei Eparaama, oka kina:

Na yalayala ni na yaco o Jekope me tamadra na “tamata lewevuqa sara” (Nai Vakatekivu 28:3, 14).
E dua na vanua yalataki vei ira na kawa i Jekope (raica Nai Vakatekivu 28:4, 13).
Na yalayala ni, mai vei Jekope “ena kalougata vei iko kei na nomu kawa na veimataqali kecega e vuravura” (Nai Vakatekivu 28:14; vakamatatataki).

A ka tabu dina sara na veika a sotava o Jekope ka tukuna kina o koya, “Sa tiko vakaidina ko Jiova ena yasana oqo. … Sa sega ni ka tani oqo, a vale ga ni Kalou, kei na matamata‑ni‑koro kei lomalagi” (Nai Vakatekivu 28:16–17). O koya gona, a vakatoka kina na tikina ko ya o Jekope me o Peceli, kena ibalebale “a vale ni Kalou” (raica Nai Vakatekivu 28:19, ivakamacala e botona a).

Na valetabu era sa tautauvata vakalevu kei na ikabakaba oya a raica o Jekope. Na ivakavuvuli, cakacaka vakalotu, kei na veiyalayalati ni vale ni Turaga e semati lomalagi kei vuravura. Na veiyalayalati e rawa ni vakatauvatani ki na ibutubutu ena dua na ikabakaba ka toroi keda voleka yani vua na Turaga. Ka ena noda veiqaravi ena valetabu, eda vakalougatataki ira kina “na veimatavuvale kecega e vuravura”—veigauna sa oti, gauna oqo, kei na veisiga ni mataka.

E Dua na Rai Marautaki kei Lomalagi

O Elder Bruce C. Hafen, e dua na lewe ni Vitusagavulu vakaemeritesi, a ciqoma e dua na qiri mai vua na edita ni dua na mekasini ni itukutuku raraba me veivosakitaka e dua na ivola ka a dikeva na itukutuku makawa ni vakabauta ni veimatalotu duidui eso me baleti lomalagi.

“E ratou a raica na dauvolaivola ni o ira na lewe ni veivanua era vakila tu na viakana raraba me baleti lomalagi—na matavuvale mai lomalagi,” a kaya o Elder Hafen. Ia “e vuqa na veimatalotu Vakarisito era vakamamautaka vakalailai ga na viakana e loma oqo”—vakavo ga e dua: Na Lotu i Jisu Karisito ni Yalododonu Edaidai.

Ena nona Lotu vakalesuimai na iVakabula, e tu kina na noda valetabu vakalou. Sa tu vei keda na lewa ni vakamau tawamudu, kei na veivauci ka lako sivita sara yani na mate vakayago. E tu vei keda na yalayala ni dua na veisiga ni mataka tawamudu vata kei ira noda daulomani ena iserau ni Tamada kei na Luvena. Ena veika kece oqo, era a tinia kina na dauvolaivola ni ivakavuvuli ni Yalododonu Edaidai e sa ka taucoko duadua sara—ka, au na vakuria, e ka marautaki duadua sara.

Me vaka sa vakavuvulitaka o Peresitedi Russell M. Nelson, “Na Turaga … a bulia na vuravura me rawa ni da vakayago ka vakamatavuvale. A tauyavutaka na Nona Lotu me bula vakacerecerei kina na matavuvale. E vakarautaka o Koya na valetabu me rawa ni ra tiko tawamudu vata kina na matavuvale.”

Taqomaki ni Matavuvale

E sega ni dodonu meda kurabui kina ni dua na ka e bibi sara ki na ituvatuva ni Kalou ena sotava na veisaqasaqa. A kaya o Peresitedi M. Russell Ballard (1928–2023), “E kila tu o Setani na sala dina ka veirawai duadua me vakacala na cakacaka ni Turaga sai koya me vakayalia na dina kei na vakatabui ni matavuvale ena noda itikotiko.”

Ni da kila na veika eda sa kila, sa dodonu kina meda tu maliwai ira na dautaqomaka gugumatua duadua na matavuvale e vuravura.

Meda cakava vakacava oqo?

E rawa ni da cakava na “veika lalai ka rawarawa” (Alama 37:6) e vaqaqacotaka na veimaliwai vakamatavuvale. Oqo e oka kina na ivakavuvuli e tuvai ena ivakaro ni matavuvale: “vakabauta, masumasu, veivutuni, veivosovosoti, veidokai, veilomani, yalololoma, cakacaka, kei na golevi ni itaviqaravi vinaka.” Se cava ga na ituvaki ni nomu matavuvale ena gauna oqo, e rawa ni o vakaraitaka ena nomu ivalavala ni veiwekani vakamatavuvale e ka bibi tawamudu vei iko.

Ni da bula, taqomaka, ka wasea na dina tawamudu me baleta na matavuvale, e rawa ni da vukei ira na tani me ra raica ni “sa itakele ni Nona ituvatuva na Dauniveibuli ena nodra icavacava tawamudu na Luvena na matavuvale” kei na “veicakacaka vakalotu tabu era tu ena loma ni valetabu ena rawa kina vua na tamata me lesu tale ki na iserau ni Kalou, ka vakaduavatataki na matavuvale me tawamudu.”

“Au sa Tiko Vata Kei Kemuni”

Ni keirau sarava kei Sisita Uchtdorf na neirau matavuvale ena nodratou caka veiyalayalati tabu vata kei na Tamada Vakalomalagi dauloloma ka tawamudu, sa vakasinaiti na yaloi keirau ena reki kei na vakavinavinaka. Keirau sega walega ni rekitaki ira na luvei keirau kei ira na luvedra ia kei rau talega na neirau itubutubu kei na nodratou itubutubu. Keirau vakasamataka vakatitobu ena loloma bibi na kena vakaduavatataki keda yani na veiyalayalati ni kosipeli ena veitabatamata.

Na veivakalougatataki a yalataka na Turaga vei Eparama, Aisake, kei Jekope ena nona tadra e sa baleta kece sara na matavuvale. Ka ra tete yani kivei ira kece sara na Luvena ni veiyalayalati—oka kina o iko kei au. “Ka raica,” a kaya na Turaga, “Kau na tiko vata kei iko, ka vakabulai iko ena nomui lakolako kecega, … niu na sega ni biuti iko” (Nai Vakatekivu 28:15).

Au yalataka ni ko muria ka wasea na ituvatuva nei Tamada Vakalomalagi me baleta na matavuvale, ena tiko vata kei iko o Koya, vakabibi ni yaco mai vei iko na veivakatovolei se vei ira na nomu daulomani. Ena kauti iko cake o Koya, laveti iko cake, ka na tuberi iko ki na taucoko ni reki vata kei Koya, vata kei na Luvena o Jisu Karisito, kei na nomu matavuvale—me tawamudu.