“E rawa vakacava niu vakanamata vakalevu cake vua na iVakabula ena gauna ni Siganimate?”

“Au saga meu vakanamata vua na iVakabula ena noqu vakarorogo ki na ivakatagi veilaveti, vakasamataki Koya vakalevu cake, dau raici Koya cake ena noqu bula ena veisiga, ka masu vakalevu. Au taleitaka na wilika talega na ivolanikalou, meu vulica kina na Nona Tucaketale kei na inuinui e kauta mai vei au.”

Maxwell R., 16, Missouri, Amerika

“Vakaraica na ivolanikalou me wiliki vata vakamatavuvale e veisiga yadua se veimacawa me vakananumi iko ena gauna bibi oqo ni nona bula na iVakabula. Vakasaqara na madigi ena veisiga mo qaravi ira na tani ena sala Vakarisito.”

Ahonima A., 15, Togatapu, Toga

“Au rawa ni vakanamata vakalevu cake vei Karisito ena noqu wasea e dua na ka me baleti Koya ena initaneti e veisiga yadua.”

Caleb F., 17, Arizona, Amerika

“Wilika na ivolanikalou e vakatakarakarataka na Nona bula, vakabibi ena iotioti ni macawa ni bera na Nona Vakoti ena Kauveilatai. Na noqu veitikina taleitaki na Maciu 21–27. Na wiliki ni ivolanikalou e vukei au meu vakila niu voleka cake vua na noqu iVakabula ka kila vakavinaka cake na Nona Veisorovaki.”

Grace M., 15, Alberta, Kenada

“Na Siganimate kei na Veisorovaki i Jisu Karisito e vakananumi au me baleta na itekitekivu vou. Niu vakavoutaka na noqu ituvatuva ni veisiga ka veidutaitaka na noqu lalawa e solia vei au e dua na madigi meu vakatabakiduataka noqu bula vei Karisito ka dau nanumi Koya vakalevu cake ena gauna bibi ni yabaki oqo.”

Lilly H., 17, California, Amerika