Siganimate e Veigauna Kecega
Cakava na Siganimate me dua na gauna ni inuinui ena nomu toro voleka yani vua na iVakabula.
Droini mai vei Toby Newsome
Ena imatai ni Sigatabu ni Siganimate, ni ra sikova yani o Meri Makitalena kei na so tale na marama na ibulubulu nei Karisito, na agilosi e tukuna vei rau, “Sa sega eke ko Koya: sa tucake tale” (Maciu 28:6). Na itukutuku oqo a kauta mai na inuinui levu vei iratou na Nona tisaipeli ni oti na yaluma ni vakadinadinataki ni Nona Vakamatei ena Kauveilatai.
Na itukutuku vinaka duadua? Na itukutuku o ya e se dina tikoga. Se tucaketale tikoga na Karisito. E se qaqa tikoga o Koya mai na mate kei na ivalavala ca. Kei na inuinui e lako mai na Nona Tucaketale e se tikoga vei iko—sega walega ena Siganimate, ia ena veigauna kecega!
Na Siganimate e sega ni siga duadua ga o rawa ni doka kina na Tucaketale. Tovolea eso na vakatutu oqo me vakayacori ena Siganimate—kei na kena marautaki na iVakabula kei na Nona Veisorovaki kei na Tucaketale—me dua taucoko na gauna ni inuinui kei na reki.
Vulica na Bula ni iVakabula
Sa iyaragi kaukauwa sara na ivolanikalou me vukei iko mo kilai Jisu Karisito kina vakai iko ka vaqaqacotaka na nomu vakabauti Koya. Ena gauna ni Siganimate, o na vakanamata beka ki na nomu vuli ivolanikalou ena iotioti ni macawa ni Nona bula se nona veisiko ki Amerika vaka iVakabula kei vuravura sa vakaturi cake mai na mate. Ni o wilika na veitukutuku kaukauwa oqo ena rawa ni vukei iko mo vakila na loloma ni iVakabula vei iko ka kila vakavinaka cake na Nona Veisorovaki kei na Tucaketale.
Kevaka o sega ni kila na tikina mo vakanamata kina, o na rairai tovolea mo muria na idusidusi ni vuli ni Siganimate ena Lako Mai, Mo Muri Au se na idusidusi ni vuli tale eso ka tabaki ena ChurchofJesusChrist.org.
Vakaitavi ena Cakacaka ni Valetabu
Na qaqa nei Karisito mai na mate kei na kila ni o keda talega eda na tucaketale sai koya “na itukutuku lagilagi duadua ni itukutuku kece ki na kawatamata.” Ena vuku ni Nona Veisorovaki kei na Tucaketale, sa rawa me tawamudu kina na noda matavuvale, ka rawa vei ira kece na noda qase e liu me ra vakayacora na veiyalayalati tabu.
E rawa ni o marautaka na Tucaketale i Jisu Karisito ka tomana na Nona cakacaka ni nodra vueti o ira era tu ena valeniveivesu (raica na 1 Pita 3:18–20) ena nomu cakava na tuva kawa kei na cakacaka ni valetabu. Na nomu veiqaravi ena valetabu ena rawa kina vei ira na yalo oqori me ra digitaka me ra ciqoma talega na veivakalougatataki kece sara ni Veisorovaki i Karisito.
Qaravi Ira na Tani me Vaka na Karisito
A dau veilaveti ka qaravi ira na tani o Jisu Karisito ena Nona gauna taucoko ni veiqaravi ena bula oqo—ena kauveilatai sara mada ga. E rawa ni o rokova na Nona ivakaraitaki ena nomu qaravi ira na tamata era tu wavoliti iko ena sala e vakayacora kina o Koya. Na ivalavala rawarawa mada ga ni yalovinaka me vaka na matadredredre wasoma, na vakarorogo vakaidina vei ira na tani, kei na veivuke wavoki e vale e rawa ni tauyavutaka e dua na ituvaki ni loloma va-Karisito. Ni o qaravi ira na tani, o iko kei ira e rawa ni vakila na inuinui kei na vinaka ni gauna ni Siganimate.
Vakayagataka Vakainaki na Sakaramede
Na iVakabula vakataki Koya a tauyavutaka e dua na ivakarau me vukei iko mo dau nanumi Koya vakavinaka cake kina mai na veika tale eso: na sakaramede. Na tauri ni sakaramede e vakaraitaka ni sa lomamu mo “dau nanumi Koya tikoga, ka muria na nona ivakaro,” ka me kena isau sa yalataka o Koya ni na “tikoga kina kei [iko] na Yalona” (Vunau kei na Veiyalayalati 20:77). Oqori e dua na yalayala kaukauwa sara! Ni o vakayagataka na sakaramede ena veimacawa, sa rawa ni o tekivu vakila na dina ni yalayala oya ena Siganimate kei na veigauna kecega.
Tovolea mo vakananuma na veiqaravi nei Jisu Karisito, Veisorovaki, kei na Tucaketale ni o taura na sakaramede. Masu ena yalodina, ka tovolea mo vakasamataka na sala sa vakalougatataki iko kina na Nona solibula.