Marautaki ni Siganimate: Na Kena Dina Ga
Oqo eso na ka o na sega beka ni kila tu me baleta na marautaki ni Siganimate.
Curu Vakatui ki Jerusalemi na Karisito, mai vei Harry Anderson
Na cava o kila me baleta na Siganimate? O na kila beka na tikina bibi duadua: E sa dua na marautaki ni solibula veisorovaki i Jisu Karisito kei na Tucaketale.
Ena so beka na nomu taro me baleta na Siganimate kei na kena dau marautaki mai vei ira e vuqa na tamata, vakakina na vuna eda vakanamata tiko kina ena sala eda qarava kina. Oqo na isau ni vica na taro vakaoqori.
Na cava na Sigatabu ni Gone kei na Macawa Tabu?
Na Macawa Tabu e marautaka na iotioti ni macawa ni nona veiqaravi o Jisu Karisito ena bula oqo. Na Sigatabu ni Gone sa imatai ni siga ni Macawa Tabu. E marautaka na siga ni nona curu vakatui o Jisu Karisito ki Jerusalemi, ni vodo voli ena dua na asa gone, ena kena vakataucokotaki na parofisai. Era a tevuka yani na tamata na tabani kau kei na isulu e gaunisala e Matana, ni ra kailavaka tiko, “Osana.” (Raica na Maciu 21:6–11.) A yaco oqo ni vo sara ga e dua na macawa ni bera na Tucaketale nei Jisu Karisito, ka dau marautaki ena Siganimate, ena iotioti ni siga ni Macawa Tabu. E okati talega ena macawa oqo na Siganimate ena Vakaraubuka (vakananumi ni Vakoti ena Kauveilatai kei na bulu nei Karisito).
Jisu e Kecisemani, mai vei Dan Burr
Na gauna cava era a tekivu marautaka taumada kina na Siganimate na lotu Vakarisito?
Na ivolatukutuku taumada e tiko ni kena marautaki na Siganimate a yaco mai ena lomaloma ni ikarua ni senijiuri (ena maliwa ni 160 kei na 170 A.D.). Ia, o ira na Lotu Vakarisito era rairai dau vakananuma na Vakoti ena Kauveilatai kei na Tucaketale i Jisu Karisito ena so na kena ivalavala mai na veigauna taumada sara. Baleta o ira era muri Jisu Karisito era vakabauta ni Nona cakacaka ni veisorovaki, ka tinia ena Tucaketale, sa dua na ka bibi duadua ena itukutuku ni kawatamata kecega, e kena ibalebale kina ni ra a marautaka na veika a yaco oqo me tekivu mai na veisiga taumada sara ni Lotu Vakarisito. Nikua eda rawa ni marautaka na Veisorovaki i Karisito kei na Tucaketale ena vei Sigatabu ni da vakaivotavota ena sakaramede.
Na cava e dau veiveisau kina e veiyabaki na tikinisiga ni Siganimate?
E via verevereya vakalailai, ia na kena cakacakataki taumada na Sigatabu ni Siganimate sa ikoya: na imatai ni Sigatabu ni oti na “vula levu ni lakosivia,” oqori na imatai ni vula levu ni oti na tu donu ni matanisiga ena Vualiku kei Vuravura (21 ni Maji). (E verevereya cake vakalailai mai na kena oqori, ia sa na rauta madaga oqo.)
Na kena cakacakataki vakaoqo e vu mai na rua na ka dina oqo: (1) a yaco na Nona Vakoti ena Kauveilatai na iVakabula ena Gauna ni Lakosivia, kei na (2) Nona Tucaketale a yaco ena imatai ni siga ni macawa (Sigatabu).
Era a veibataka na Lotu Vakarisito taumada se a bibi cake me marautaki na Siganimate ena Lakosivia se ena dua na Sigatabu. Na Lakosivia e dua na kanavata ni Jiu ka semati ki na ivolanivula vaka-Iperiu, sa ikoya e dua na ivolanivula vaka‑vula ka sega ni salavata kei na ivolanivula vaka‑siga era dau vakayagataka e vuqa na tamata. Ena ivolanivula ni Iperiu, na Lakosivia e dau marautaki ena ika 14 ni siga, ena ikavitu ni vula. Kena ikuri, ena vei ya rua se tolu na yabaki, e dau vakuri kina e dua tale na vula me veiyaloni kaya tiko na draki eso. O koya gona, na semati ni Siganimate ki na Lakosivia e kena ibalebale ni na veiladeyaki vakalevu toka na tikinisiga ka na vakavudua sara me yaco ena dua na Sigatabu.
Me sauma vinaka na taro, a lewa kina e dua na matabose Vakarisito ena 325 S.K. me vakaduavatataki na tikinisiga e marautaki kina na Siganimate.
O koya gona, me vakalekalekataka na italanoa: Ni yavutaki ena kena icakacaka era vakayagataka e vuqa na Lotu Vakarisito, ena rawa ni yaco mai na Sigatabu ni Siganimate ke totolo ni se bera na ika 22 ni Maji se me yacova na ika 25 ni Epereli ke bera sara.
Mo Dou Vakananumi Au Kina, mai vei Walter Rane
A yaco vakacava me ra mai veisemati kei na Siganimate na rapete kei na yaloka?
Na nodra dausoli yaloka na rapete ni Siganimate (se so tale na manumanu) a tekivu me vakaraitaki mai e Iurope ena ika 17 ni senijiuri. Na veika oqo a sega ni yaco wasoma me yacova na ika 19 ni senijiuri. E vakabauti ni o ira na tamata era a lai kerea oqo mai na ivakatakarakara tawa-Vakarisito eso ni vulaitubutubu, na veivakavoui, kei na bula ka qai semati ira ki na Siganimate kei na Tucaketale i Jisu Karisito.
Sa Lako Tani mai na iBulubulu ko Jisu, mai vei Dan Burr
Na cava eda vakanamata vakalevu kina ki na Siganimate?
Eratou sa kerei keda na Mataveiliutaki Taumada me da laveta cake na noda marautaka na Siganimate. “Se mani vakacava na ka era vakabauta ka cakava na tani, e dodonu meda marautaka na Tucaketale ni noda iVakabula bulatiko, ena noda vulica na Nona ivakavuvuli ka veivuke me vakadeitaki ena keda maliwa na ivakarau tudei ni Siganimate, vakabibi ena loma ni noda veimatavuvale. Keitou sa bolei kemuni mo ni cakava vakakina” (Dallin H. Oaks, “Sa Tucaketale o Koya!: E Dua na iTukutuku Digitaki ni Gauna ni Siganimate mai na Mataveiliutaki Taumada” [vidio], Valenivola ni Kosipeli).