Noqu Osana

E dua na noqu iwase taleitaki ena Veiyalayalati Vou e tukuna me baleta na nona curu vakatui o Jisu Karisito ki Jerusalemi. Era a kailavaka na tamata, “Osana vua na Luve i Tevita: Sa kalougata ko koya sa lako mai ena yaca ni Turaga; Osana ki cake sara” (Maciu 21:9). E veigauna niu wilika oqo, au dau vakasamataka: Na cava na noqu Osana?

Au dau kaka voli ena noqu bula taucoko. Ena so na gauna au dau yalolailai sara baleta niu sega ni rawa ni vakamacalataki au ena sala au vinakata meu cakava kina. Au a diva meu vosa vakavinaka tu se meu sega ni qai vosa rawa tale. Au dau lomaleqa niu vosa e matanalevu se ena gauna mada ga au dau masu kina e cake. Au dau masuta lo me baleta na vosota, vakacegu, ka veivuke ena vuqa na gauna. Oqo e dua vei ira na noqu osana vakai au—na noqu tagi meu sereki.

Me vaka ga a sega ni vakawalena na Karisito na nodra tagi na tamata e Jerusalemi, a sega vakadua ni bau vakawalena o Koya na noqu. E sega ni se kauta tani o Koya na noqu dau kaka, ia sa vaqaqacotaki au ena veisala au sega ni namaka. E sa vukei au o Koya meu vakila na vakacegu ena gauna ni nuiqawaqawa ka vakila ni domoqu, e sega tu beka ni taucoko, e sa veirauti vei Koya.

O keda yadua e tiko e dua na ka ena noda bula ka dau kauti keda ki na duruda. Ena so na gauna, eda na vakila beka ni sega ni saumi mai na noda tagi. Ia, e dau rogoca o Koya na Osana kecega. Ka ena Nona sala kei na gauna uasivi duadua, ena lako mai kina o Koya me vukei keda.

Mai Kecisemani, a sotava na Karisito na noda ivalavala ca ka vakila kina na noda mosi kei na veika dredre. E tomana tikoga o Koya me dusimaki ka vakacegui ira kece era gole Vua kei na Tamada Vakalomalagi. Na Karisito vata ga ka a vakararawataki ena vukuda e Kecisemani ka vakakina ena kauveilatai a tucake talega mai na ibulubulu, ka vakamalumalumutaka na mate me rawa kina vei keda na inuinui. Na Nona Tucaketale sai koya na isaunitaro cecere duadua ki na Osana yadua.