E Sega ni Gadrevi mo Dua na Kenadau

Droini mai na Getty Images

E levu vei keda sa vakila oti na kena sotavi e dua na tiki levu ni cakacakaniliga se veivakamarautaki ka qai vakasamataka: “Au diva meu rawa ni cakava oqori, ia e sega vei au na taledi meu yacova rawa.”

E vuqa na nomu cakacaka taleitaki era a cakava dina o ira na tamata e vuqa tu na nodra taledi. Ia o na kurabuitaka ni levu na gauna e dau dua ga na tamata ka a vakauqeti na nona vakasama.

Na “Let Easter Anthems Ring,” e dua vei ira na serenilotu vou se qai tabaka vou ga na Lotu, a vola e dua na Yalododonu Edaidai ka yacana o Larry A. Hiller. O koya e dua e kenadau vaka dauvolaivola ka edita (a mai vakacegu oqo), ia e sega ni dauvolasere. E sega talega ni daulagasere se dauvakatagi kilai levu o koya.

O koya e dua ga e dau taleitaka na sereivakatagi ka a vakila e dua na vakasama veivakauqeti.

Ena nona veiqaravi voli vaka dairekita ni matasere ena tabanalevu ena vica vata na yabaki sa oti, a tovolea o Baraca Hiller me vola na qaqana vou me baleta e dua na sere makawa a kunea o koya. A marautaka o koya na ka sotavi oya ka taroga e dua na itokani ka a cakacaka ena Lotu kevaka e kila e dua tale na sere e gadrevi kina na qaqana vovou. A mani dusimaki koya ki na dua na serenilotu ka volai ena 1800 vakacaca.

A kaya o Baraca Hiller, “Au a dabe sobu kei na sereivakatagi o ya ka ra sa vovotu saraga mai ki na noqu vakasama na veivosa: ‘Rise up, ye Saints, rejoice.’ Mai kea au a vakila kina na veitukutuku raraba kei na veika e gadrevi me vakataka—e dua na sere ni reki me baleta na iVakabula.”

Na serenilotu o ya a tabaki ena Ensign ena 2012. E a va na tikina ka baleta na Veisorovaki i Jisu Karisito. “E a vakanamata vakaukauwa ena ‘ko na raici ira tale na nomu daulomani; e dua na tucaketale,’” a kaya o Baraca Hiller. Ena gauna sa kacivaka kina na Lotu me baleta na serenilotu vou, a kerei o Baraca Hiller me raica tale vakatabakidua na nona qaqanisere ni Siganimate.

Ni sa veisautaki oti e vuqa na qaqana—ka dei tikoga na imatai ni laini, “Rise up, ye Saints, rejoice,”—sa mai vakadeitaka kina o Baraca Hiller e dua na serelotu e tolu na qaqana ka vakatokai na “Let Easter Anthems Ring.” Sa rawa ni o lagata ena soqoni ni sakaramede ena gauna ni Siganimate oqo!

A vakauqeti beka o Baraca Hiller ni a vola na kena veivosa eso?

“E veivakayalomalumalumutaki meu kaya,” a kaya o koya. “Ia, io. A yaco eso na gauna au vakila kina na taladrodro ni veivosa eso ki na noqu vakasama. E veivakamarautaki ka rekitaki malua. Kau rawa ni vakila vakawasoma na voqa ni reki oya niu vakawilika tale e dua na ka a vakauqeti au ena gauna oya. Oqori walega e kauta lesu mai na yalo ni ivakadinadina oqori. E voleka ni vaka meu bulataka tale tiko na veika e sotavi oya.”

Era na taleitaka beka na tamata na serenilotu oqo, ia e vaka dina ga ni tamata a tubu vakalevu duadua mai kina (vadugu ni dramu) … sai koya ga a vola! Ni da vakayagataka na noda taledi kei na veivakasama vakauqeti e sega walega ni vakalougatataki ira eso—e vakalougatataki keda talega.