Sega Vakadua ni Sega na iNuinui
Ni da vakasamataka na veika sa cakava vei keda na iVakabula, sa rawa ni da toso cake tikoga ni da kila ni sa dau tiko vata ga kei keda ko Koya.
Droini mai vei Albert Espi
Raitayaloyalotaka ni sa vesu tu e dakumu na ligamu, e vauci vata na yavamu, ka o sa qai viritaki ki na dua na tobu e ciwa na fute na kena titobu! Na cava beka o na cakava? Ko na sasaga li mo vude tikoga ka vakaocai iko, se o na malumu tu ga ka vaqara e dua na sala mo lako curuma kina na ituvaki dredre oqo?
Na veituberi oqori mo yaco me dua na Navy SEALs ni Amerika ena sotavi kina na bolebole saraga oqo. E vakatokai na “vakatovolei-luvu.” Na kena inaki sai koya me vakadinadinataki na nodra rawa ni bula e wai ena veimataqali ituvaki eso. Ni ra sa vauci ka biu yani ki wai, e dua na tiki ni veitarogi e gadrevi kina mera lutudromu ki na boto ni tobu ka kua ni taqaya, tekea ena yavadra na botona me biligi ira cake ki na delaniwai, ka qai taura vakatotolo e dua na icegu ni bera ni lutudromu tale. Oqo e dau tokaruataki me dua toka na gauna.
E vuqa vei keda ena sega ni lako curuma na veituberi ni Navy SEAL, ia ena so beka na ka eda rawa ni vulica mai kina—ka rairai eda na vakavinavinaka vakalevu cake kina vei Jisu Karisito kei na Nona Veisorovaki ena ilakolako.
Na Nomu iVakabula Ena Ka Kecega
Na SEALs era vakararavi ena nodra vuli kei na vakarautaki me lako curuma kina na veivakatovolei kaukauwa oqo—ka dodonu me ra vakacavara ga vakataki ira. Eda na lako curuma kece na bolebole ni bula, ia e sega ni tautauvata na SEALS ena nodra vuli, eda sega vakadua ni lako curuma duadua na noda bolebole.
Ni da vauci ena ivalavala ca, nuiqawaqawa, rarawa, se dua tale na bolebole ka vakila ni vaka eda sa lutudromu tiko, e rawa ni da vuki yani vei Jisu Karisito. Ni da vakila ni da sa tu e botona ka na sega ni lesu cake tale mai, eda rawa ni nanuma ni sa lesu oti mai kea na iVakabula, ka na solia vei keda o Koya na kaukauwa meda bili cake, cegu tale, ka toso tikoga. Vata kei Koya, eda na sega vakadua ni sega noda inuinui.
O Jisu Karisito sa nomu iVakabula mai na ivalavala ca kei na mate. O Jisu Karisito sa nomu Dauveivueti ni o yaco koso ka gadreva mo vakataucokotaki vakayalo. O Jisu Karisito sa nomu Dauvakabulai mai na mosi vaka vakasama, vakayalo ka so na gauna na mosi vakayago ka na rawa duadua ga Vua me vakabula. Na veiyaca oqo kei na yaca tale eso i Jisu Karisito e dusia na dina ni o Koya Duadua ga meda rai kina, vakabibi ni dau dredre na bula.
Ni roro tiko mai na Siganimate, eda marautaka na Tucaketale i Jisu Karisito. E bula tiko o Koya! Baleta ga ni bula tiko o Koya, eda na bula tale ka rawata na yalayala ni bula tawamudu. Ia ni bera na Nona Tucaketale, a vakararawataki na iVakabula mai Kecisemani ka mate ena kauveilatai ena vukuda baleta ni lomani keda o Koya. O Koya a “lako sobu mai ki ra sara”—mai vakararawataki ka sega walega ena noda ivalavala ca, ia sa sotava talega na veimataqali mosi, rarawa, vutugu, kei na veitemaki—me rawa kina Vua me kila na sala me vukei keda kina (Vunau kei na Veiyalayalati 88:6; raica talega na Alama 7:11).
Raica Na Nomu iNuinui Vua
Ni sa vakoti ki na kauveilatai na iVakabula, a sega na inuinui ni ka kecega. Eratou a vakaleqai na Nona tisaipeli. Eratou a daumuri Koya, vakabauti Koya—ia oqo sa lako tani o Koya. Ni sa vakadavori o Jisu ena dua na ibulubulu, eratou a sotava na rarawa kei na veilecayaki. Ia ni oti e tolu na siga, ena Sigatabu, a lala tu na ibulubulu. Sa tucaketale o Jisu Karisito! Na ka a vaka me sa yali ena gauna oqo sa vuki me inuinui!
Kevaka e vakilai na veika me butobuto ka veivakayalolailaitaki—me vaka na nomu viritaki ki na tobu ni vesu tu na ligamu kei na yavamu—ka o sega ni raica e dua na sala tani, taura e dua na gauna mo kunea kina na inuinui vei Jisu Karisito, ka nanuma tiko ni se bera madaga ni o se yacova na kena itinitini.
A sega ni yaco na iVakabula ki na Sigatabu ni Siganimate rekitaki oya ka sega mada ni vosota rawa e Kecisemani kei na kauveilatai ena tolu na siga sa oti. Koya gona, kevaka o lako curuma tiko e dua na gauna dredre, kakua ni soro! Me vaka a tukuna ena dua na gauna o Elder Joseph B. Wirthlin (1917–2008) ena Kuoramu ni iApositolo Le Tinikarua, “Ena butobuto ni noda rarawa, ena yaco mai na Sigatabu. … Se mani vakacava noda rarawa, ena yaco mai na Sigatabu.”
Ena Nona isoro ni veivakaduavatataki kei na Tucaketale, sa dau tu ga e kea o Jisu Karisito me vukei iko mo kunea vakalevu cake na vakacegu ka toso kina ki cake mai na kena o rawa ni nuitaka tu.