iYau Vunitaki
Kunea na Veisorovaki ni iVakabula ena Veiyalayalati Makawa
Rai vakavoleka; vulica vakatitobu.
Eso era nanuma beka ni Veiyalayalati Makawa, ka a volai ni bera ni sucu na iVakabula ka sega ni cavuti kina o Jisu Karisito ena yacana, e sega soti ni levu na ka e tukuni kina me baleta na Siganimate. Ia me vaka e vakamatatataka na iVola i Momani, o ira na tamata ena gauna makawa era a kila ka vakabauta talega na iVakabula (raica na Jekope 4:4).
Era a vakavulici na Isireli ni inaki ni lawa i Mosese me dusimaki ira vei Karisito. Me kena ivakaraitaki, ni gauna era vakabulai kina mai na gata parasa ena nodra raica na gata parasa ka a vakarota na Turaga vei Mosese me cakava, a vakavulica vei ira o Mosese ni oqo a ivakatakarakara ni iVakabula, o koya ena lako mai ka vakabulai ira mai na nodra ivalavala ca (raica na Tiko Mai na Lekutu 21:7–9; Alama 33:18–20).
Ka ni rarawa, ni levu na veika matata oya e sa yali mai na iVolatabu me vaka sa tu vei keda nikua, ena vuku ni veiveisau ruarua—na kena e nakiti kei na kena e vakacala ka—ena veisenijiuri (raica na 1 Nifai 13:23–27).
Ia kevaka o raica, e rawa ni o se kunea tikoga e vuqa na itukutuku e vakaibalebaletaki vua na iVakabula kei na Nona Veisorovaki ena Veiyalayalati Makawa. Meda veitalanoataka mada e vica!
Sigatabu ni Gone, Kecisemani, kei na Veivakatovolei
“Ena lako mai vei iko na nomu Tui: sa yalododonu, a sa ia na veivakabulai ko koya; sa yalomalua, ka sa vodo lako ena asa, io, ena luve ni asa” (Sakaraia 9:9).
A yaco oqo ena ka sa vakatokai tu nikua me Sigatabu ni Gone, vitu na siga ni bera na Siganimate, ni a curu vakatui kina o Jisu ki Jerusalemi (raica na Maciu 21:15).
“E dina sa colata ko koya na noda rarawa, ka sa colata na rarawa ni lomada; ia eda a vakalewa vua ni sa yaviti ka cudruvi mai vua na Kalou, ka vakararawataki” (Aisea 53:4).
Mai Kecisemani, a vakararawataki na iVakabula me baleta na ivalavala ca kecega—ka vakila na rarawa, mosi, tauvimate, kei na vakararawataki—me baleti ira kece na tamata era a bula se era na mai bula e vuravura. Ena vuku ni ka oqo, e kila o Koya na ivakarau me vakacegui keda kina ena noda vakatovolei (raica na Alama 7:11–13; raica talega na Maciu 8:17).
“Sa vakasaurarataki, ka sa vakamalumalumu ga ko koya, ia sa sega ni vosa mai ko koya; me vaka na lami sa tuberi me vakamatei, ka vaka na sipi sa galu ena matai koya sa kotiva, sa galu vakakina ko koya” (Aisea 53:7).
A galu tu ga o Jisu ni a vakatarogi Koya na bete levu (raica na Marika 14:60–61).
Mate ena Kauveilatai
“Era sa vakavolivoliti au nai soqosoqo ni tamata lomaca: Era sa coka na ligaqu kei na yavaqu” (Same 22:16).
“Era sa vota vei ira na noqu isulu, ka ra sa vota na noqui tutuvi ena vakawiri madigi” (Same 22:18).
“Era sa solia talega na ka gaga me qau kakana; kei na wai wiwi meu gunuva niu a viagunu” (Same 69:21).
Na lauvako ena kauveilatai e a dua na ivakarau matau ni veivakamatei ena gauna o ya, ia era a veivakalolomataki sara vakalevu na sotia ni Roma ena nodra vakalialia kei na nodra vakararawataka na iVakabula (raica na Joni 19:1–3; Maciu 27:34–35, 48).
Na Tucaketale
“Ena vakaotia sara na mate o koya; ia na Turaga ko Jiova ena tavoya na wainimata mai na matadra na tamata kecega; kei na nodra vakalialiai na nona tamata ena kauta tani ko koya mai na delai vuravura taucoko: ni sa tukuna ko Jiova” (Aisea 25:8).
“Niu sa kila sa bula tiko na noqu iVakabula, ena tu talega e vuravura ena siga mai muri: Ia ni sa rusa sara na kuliqu oqo, kau na kunea ga na Kalou ena yagoqu” (Jope 19:25–26).
A vakaturi cake tale mai na mate na Turaga ko Jisu Karisito. Sa bula sara tu ga oqo o Koya! E sega ni wili rawa na ivolanikalou kei na ivakadinadina e vakadeitaka na ka oqo. Na ka e levu cake, sa kila tu na Tamada Vakalomalagi mai na ivakatekivu ni da na gadreva e dua na iVakabula, ka sa vakarautaki ira tiko na Luvena o Koya me ra ciqoma na iVakabula mai na gauna ni Veiyalayalati Makawa.