Dua na iLakolako ki na Valetabu

Droini mai vei Katelyn Budge

Ena dua na gauna au a sega tu ni gole ki na valetabu me ono na yabaki. Na veiyabaki oqori a gauna butobuto duadua ni noqu bula baleta ni a mai yali talega kina vei au na tinaqu ena loma ni gauna oqo. Au a vinakata meu gole ki valetabu, ia e rauta toka ni dua na auwa mai vale, ka sega vei au na ilavo meu lako kina ka sega ni dua me kauti au.

Ia ena yabaki sa oti au a qai kacivi meu peresitedi ni kalasi ni Goneyalewa. Ni kerei au na noqu iliuliu ni Goneyalewa meu vukea nona tuvanaka na itaviqaravi ni yabaki, au a tukuna vua na imatai ni ka me keimami cakava oya me keimami gole ki na valetabu. Niu kacivaka oqo vei ira na goneyalewa, sa dua na ka na nodra marautaka! E vuqa vei ira, oqo me imatai ni gauna me ra lako kina. Au a masu ka lolo vakalevu sara ni keimami vakavakarau tiko ki na ilakolako o ya. Au a sega ni vinakata me na cala e dua na ka.

Ena valetabu, au a vakila niu vakacegui mai na icolacola kece sara. Au a yalataka niu na dau gole vakawasoma cake ki na valetabu. E a dua dina na ka totoka ka veivakalougatataki. Au a marautaka vakalevu ni keimami a vakaitavi tiko kei ira na noqu itokani itabagone ena cakacaka cecere nei Tamada Vakalomalagi.

Au kila ni valetabu sa vale savasava ni Turaga, na vanua e dau vakayacori kina na cakacaka vakalotu tabu. E kea, e rawa ni da tagi vua na Tamada Vakalomalagi ena masu, ka na cakava o Koya me donu na veika eso ena Nona gauna, vakasinaiti keda ena loloma, ka solia vei keda na vakacegu tawamudu. Au kila ni gauna eda rai kina vei Karisito, eda na raica na cakamana eda gadreva. Eda sa luvena lomani na Tamada Vakalomalagi, ka sa tu Vua na cakacaka cecere me da cakava—na vakasoqoni Isireli ena yasa ruarua ni ilati.