Lako mai, Mo Muri Au
Na Lako Yani 12
Noda Lakosivia—na Sakaramede
E tiko e dua na isema tautauvata ena maliwa ni Lakosivia makawa kei na noda sakaramede vakamacawa.
Droini mai vei Alyssa Tallent
Ni bera na nodra biuta na nodra veivakabobulataki na Isireli makawa mai Ijipita, era a kerei me ra talairawarawa ki na ivakaro matata eso mai vua na Turaga me rawa ni vakabulai ira na agilosi dauveivakarusai, se me lako siviti ira (raica na Lako Yani 12). Ni ra biuti Ijipita oti mai, era a dau kana magiti na Isireli ena veiyabaki yadua, ka vakatokai na Lakosivia, me ra dau vakananuma na sala a sereki ira kina na Turaga na Nona tamata ni veiyalayalati.
Ena iotioti ni macawa ni Nona bula vakayago, a tiko o Jisu Karisito ena dua na kanavata ni Lakosivia. Eda vakatoka ena gauna oqo na kanavata oya me iOtioti ni Vakayakavi. A vakayagataka na iVakabula na gauna oya me vakatakila kina na cakacaka vakalotu ni sakaramede, ka da sa vakaitavi tiko kina oqo ena veimacawa. (Raica na Maciu 26:26–28; Luke 22:19–20; Vunau kei na Veiyalayalati 20:77, 79.)
Oqo e rua na isema tautauvata ena imatai ni Lakosivia, na iOtioti ni Vakayakavi ni Turaga, kei na sakaramede ni gauna oqo ka rawa ni vukei keda meda nanuma na noda sereki ena vuku ni iVakabula.
Na Madrai
Lakosivia: Me vitu na siga, era a kania na Isireli na madrai sega ni vakaleveni (e totolo na kena caka ka berabera me bulagi ka luca yani).
iOtioti ni Kana Vata: A vakalougatataka ka dovia o Jisu Karisito na madrai sega ni vakaleveni ni Lakosivia, ka solia vei ira na tisaipeli. A tukuna vei ira me ra kania me vakananumi kina na Yagona, ka kila tu o Koya ni na dovilaki ka na mate ia ena qai tucake tale.
Sakaramede: Eda kania na madrai meda vakananuma kina na yagoi Jisu Karisito.
Ko Jisu Karisito na Madrai ni Bula. Ena Nona Tucaketale, eda na vakaturi cake kece kina mai na mate ena yago sa uasivi sara, e tawavuca rawa, ka tawamate rawa. E sereki keda o Koya mai na mate.
Na Dra ni Lami
Lakosivia: Na lami ni Lakosivia e a dua na lami sega ni vakacacani, ka lami tagane yabaki dua. A dau vakamatei, ka sovaraki na kena dra ena dua na beseni. Na Isopa (e dua na kau) a toni ena peseni ka vakayagataki me boroi kina na dra ena taudaku ni matanikatuba ni vale. Oqo a ivakatakilakila e tuba ka vakatakilakilataka tiko na tamata ni veiyalayalati ni Turaga ni ra lako sivita na agilosi veivakarusai me rawa kina ni ra sereki mai na veivakabobulataki e Ijipita.
iOtioti ni Kana Vata: A vakayagataka o Jisu Karisito na waini me matataka kina na Nona dra. A tukuna vei ira na Nona tisaipeli me ra gunuva me vakananumi kina na Nona dra, ni na vakadavei ena vukudra me bokoci na ivalavala ca ka tiki ni veiyalayalati vou.
Sakaramede: Eda gunuva na wai me vakananumi kina na dra i Jisu Karisito.
Ko Jisu Karisito na Lami ni Kalou. A vakadavei na Nona dra ni a vakararawataki ena vuku ni noda ivalavala ca kei na malumalumu. Nona dra—Nona solibula—e vakasavasavataki keda. E sereki keda o Koya mai na ivalavala ca.