Marautaki ni Siganimate

1. Yaloka ni Siganimate

Yaloka, yaloka, yaloka. E veiyasai vuravura, na yaloka ni Siganimate e dau ukutaki, vakasaqarai, vaqiqici, voroki, ka laukana. Mai Jamani kei Austria, era dau vakaliligi tu na yaloka ni Siganimate ena veivunikau (Ostereierbaum). E Mexico, e dau nimati na yaloka ka vakasinaiti yani ena confetti (cascarones) ka qai vorolaki ena dela ni ului dua.

E dina sara, ni vuqa na tamata era vakayagataka na yaloka me ra marautaka kina na Siganimate ka sega ni rai vakatabakidua tiko vua na iVakabula. E sa vakatau sara ga vei keda meda vakanamata vua na iVakabula ena noda itovo dei eso ni Siganimate. E rawa ni ivakatakarakara ni bula vou na yaloka, e dua na isema totolo ki na tucaketale. Sa dau vakayagataki na kesa damudamu ena so na vanua me matataka na solibula ni iVakabula. Ni sa voroki oti e dua na yaloka, sa rawa ni vakananuma vei keda na qana na ibulubulu lala kei na iVakabula sa Tucake tale. Kevaka o se bera ni semata tiko na nomu itovo dei ni Siganimate ki Vua, oqo na gauna mo tekivu kina!

2. Bukawaqa ni Siganimate

Na soqo ni bukawaqa e sa dua na itovo dei ni Siganimate, vakabibi e Jamani, na Netherlands, Croatia, kei Finiladi.

Na bukawaqa ena gauna ni Siganimate e rawa ni vakananumi keda meda rai kivua na iVakabula, o koya e kauta mai na rarama kei na veivakatakatai ki vuravura ka, sa dina sara, ni sa Rarama kei Vuravura Vakataki Koya (raica na Joni 8:12).

3. Kakana Digitaki

Ena veiyasai vuravura ena Siganimate, e rua na kakana ivakatakarakara e dau laukana e veigauna kei na veigauna: na lami kei na madrai.

Na Lami e rawa ni dusia na Lami ni Kalou—na iVakabula Vakataki Koya. Na madrai e rawa ni vakananumi keda vei Jisu Karisito, o koya na Madrai ni Bula (raica na Joni 6:35).

4. Tali Drauniniu

Ena so na vanua, me vakataki Itali, Sipeni, na Yatu Filipaini, Mexico, Ijipita, kei Iciopia, era dau talia na drauniniu se na kau tale eso na tamata ena Sigatabu ni Gone.

Na Sigatabu ni Gone sai koya na Sigatabu ni bera na Siganimate ka dau rekitaki kina na nona curu vakatui o Jisu ki Jerusalemi, ni ra tevuka yani na tamata na drauniniu e Matana.

5. Vakavuka Kaite

E Bermuda ena Siganimate, era dau vakavuka kaite duiroka na tamata!

Na itovo dei oqo sa dua na ivakananumi lasa ni Nona Tucaketale na iVakabula kei na Nona lako cake ki lomalagi ni oti oya.

6. Sokalou ena Lotu

Kakua ni guilecava e dua vei ira na itovo dei bibi duadua ni Siganimate—na lako ki lotu! Eda lako ki Lotu ena Sigatabu ni Siganimate meda vakaivotavota ena sakaramede ka nanuma na iVakabula. (Kevaka e yaco tiko na koniferedi raraba ena Siganimate, e rawa ni da nanumi Koya ena noda vakarorogo kina—ka qai vakayagataka tale na sakaramede ena macawa ka tarava.)

Ni da maroroya noda veiyalayalati ka vakavouiya ena sakaramede, eda sa vakalougatataki me na dau tikoga kei keda na Yalotabu. Oqo ena rawa ni vukei keda meda semati kivua na iVakabula ena Siganimate kei na veisiga tale eso.