Evri Man, I Jaj Blong Hemwan Nomo

Stamba tingting blong Kriesen mo laef blong yumi long wol ia i blong givim long yumi wan janis blong tekem aksen blong kam ol man we Lod i invaetem yumi blong kam olsem. …

… Yumi kasem blesing blong fridom blong mekem joes long wol ia, i no blong mekem eni samting we yumi wantem long eni taem we yumi mekem. Be, folem plan ia blong God, yumi bin kasem fridom blong mekem joes long wol ia blong lukaotem mo tekem aksen folem trutok we i no save finis. …

Presiden Dallin H. Oaks i bin tokbaot se gospel blong Jisas Kraes i invaetem yumi blong save wan samting mo blong kam wan samting tugeta, tru long fasin blong eksasaesem stret fridom blong mekem joes long wol ia. …

[Be yet] ol wok mo samting we yumi wantem oli no save sevem yumi. “Afta long evri samting we yumi save mekem,” yumi stretem yumi wetem God tru long sore mo gladhat we i stap tru long paoa blong sakrifaes blong Sevya we i no save finis. …

Plante long yumi, yumi ting se wei we man bae i luk yumi long fored blong Jaj we I No Save Finis bae i hapen olsem loa blong kot blong wol ia. Wan jaj bae i prisaed. Bae oli soem ol pruf. Long en, bae i gat wan las desisen. Mo i tru bae yumi no sua stret mo fulap wetem fraet kasem yumi faenemaot risal long en. Be mi biliv se fasin blong yumi tingting olsem, i no stret. …

Fraet long God i no blong fraet blong stanap long fored blong Hem mo kasem jajmen. Be, hem i hop ia long en we i blong akseptem ol samting abaot yumiwan olsem “ol samting we oli stap,” mo “olsem we bae oli kam olsem.” …

Long en, yumi nao yumi ol jaj blong yumiwan nomo. I no gat wan bae i nid blong talem long yumi weaples blong go. Long ples we God i stap, bae yumi luksave wanem we yumi bin jusum blong kam olsem long laef blong wol ia mo save long yumiwan weaples yumi mas stap long hem blong taem we i no save finis.