Naoia Mi Save Lukluk

Long japta naen long buk blong Jon, hem i raetem abaot eksperiens blong Jisas wetem ol disaepol blong Hem, we oli wokbaot pas kolosap long man ia we oltaem i stap askem mane, mo hem i blaen taem hem i bon. …

Jisas i talem fas mining we i go wetem stori ia mo i talem long ol disaepol blong Hem se, evri samting ia i hapen “blong mekem se God i save soemaot paoa blong hem.”…

Wan nara trutok we i klia long ples ia hem i ol tul we Krieta blong heven mo wol mo evri samting we i stap insaed long hem, oli yusum blong givim merikel ia: !spet mo han we i fulap long graon! O ingridien we i no stret tumas blong yusum, i talemaot se God i save blesem yumi long eni kaen wei we Hem i jusum. …

?Olsem wanem, sapos ol ansa blong ol prea blong yumi i kam long ol wei we oli simpol, o had lelebet? ?Yumi glad blong traehad blong gohed blong laef folem gospel blong Kraes nomata hamas spet mo sofmad we i nidim blong tekem?…

Fastaem we ol ae blong mi i open mo laef blong mi i jenis tru long pruf blong trutok, i no bin kam olsem sofmad we oli putum long ae, o wota blong Saeloam. No, tul blong trutok we i bin givim mi hiling long Lod, i bin kam olsem ol pej insaed long wan buk, !yes, Buk blong Momon: Wan Nara Testeman blong Jisas Kraes! …

… Long eni situesen, paoa blong Buk blong Momon long laef blong mi, i wan merikel semmak olsem spet mo graon ia we oli putum long ol ae blong blaen man ia. Long mi, hem i bin wan sefti rod long sol blong mi, wan strong laet blong revelesen we i klia, wan laet we i saenem rod ia we bae mi mas wokbaot long hem taem tudak i kam. Mo laet ia i bin saen mo bae i gohed blong saen.