Sandei Moning Sesen
Ol Profet blong God
Samfala Pat
Gana
Lod i testifae long woman Sunem ia se Elisa i wan profet blong God, mo hem i tekem aksen taem hem i openem haos blong hem blong welkamem profet ia.
Yumi tu yumi save kasem wan testemoni blong yumiwan abaot ol profet blong God tedei mo openem ol hat mo maen blong yumi—haos blong yumi—long mesej we Papa long Heven i gat blong yumi tedei long ol lata dei. …
?Wanem i wan profet? Profet i wan man we God i singaotem hem blong toktok long bihaf blong Hem. …
Ol profet oli ol sia mo reveleta. Hemia i minim se oli save luk wanem we ol narawan oli no save luk, mo oli save profesae abaot ol samting we bae oli hapen long fiuja. … Ol profet oli kasem ol komanmen mo revelesen we i kam long Lod. …
Mo tu, ol profet oli talemaot gospel mo oli ol tija we oli gat insperesen mo ol man blong pasem mesej blong God i go long evriwan long wol. …
Ol profet oli testifae abaot Kraes—laef blong Hem, ministri blong Hem, mo tabu fasin blong Hem.…
Woman blong Sunem i tijim yumi se yumi save gat testemoni ia tru long Tabu Spirit. Mi promes se taem yumi save se olgeta ia God i bin jusumaot olgeta, laef blong yumi bae i kam moa isi nomata ol jalenj we yumi stap fesem, taem bae yumi obei long ol voes blong olgeta wetem tras, fet mo hop. Blong lisin mo obei long voes blong wan profet hem i impoten tumas blong stap hang strong long evri gud samting kasem Seken Kaming blong Sevya blong yumi. …
Mi glad tumas long gaed mo ol tabu efot blong ol profet we oli stap laef. … Oltaem bae Lod i jusum ol wokman blong Hem.