Stap Sapotem Wanwan Iong Yumi

Yumi nidim wanwan long yumi. Tabu paoa i kam tru long fasin blong stap wan, mo hemia i from wanem Setan i wantem tumas blong stap seraotem yumi.

Be nomo se, blong sam long yumi, samtaem blong stap atendem jos i save had from ol defren risen. …

Eksperiens blong yumi long jos i blong givim ol impoten koneksen wetem Lod mo wetem wanwan long yumi, we spirit mo bodi blong yumi i nidim tumas. …

Fasin blong Kraes blong soem lav mo kea oli hae mo tabu. …

… Yumi evriwan i pat blong famli blong God, mo Hem i lavem yumi evriwan ol pikinini blong Hem. Hem i wantem se ol pikinini blong Hem i lavem Hem mo tu wanwan long olgeta.

Laef blong Sevya i wan eksampol blong lav, kam tugeta, mo stap leftemap olgeta we sosaeti i jajem olgeta se oli no klin mo oli sakemaot olgeta. Hem i eksampol we oli givim komanmen long yumi blong folem Hem. …

Bae i gat ol taem long laef blong yumi wanwan we bae yumi nao yumi nidim help mo toktok blong leftemap tingting. Letem yumi komitim yumi naoia blong oltaem mekem hemia long wanwan long yumi. …

Long yufala we i filim se yufala i stap biaen long resis blong laef ia, rod ia blong laef, plis, yufala i gohed blong go. Sevya nomo i save jajem yu fulwan long wea ples yu sud stap long hem long taem ia, mo Hem i fasin blong sore mo kaen we i stret gud. …

Stap lukluk nomo long Sevya. Hem i aean rel blong yu. Yu no lego Hem. Mi testifae se Hem i laef mo se yu save trastem Hem. Mi testifae se Hem i stap sapotem yu i go.