Luk long God mo Stap Laef

I tru, kaonsel ia “Luk long God mo Stap Laef” hem i no se i gat mining nomo long yumi blong laef we i no save finis, be tu, i mekem bigfala jenis long fasin mo kwaliti blong laef blong yumi long wol ia. …

I nogat wan promes we oli ripitim plante taem insaed long skripja blong Buk blong Momon bitim hemia: “Folem hamas we yufala i obei ol komanmen blong mi bae yufala i kam antap gud long graon ia; be folem hamas we yufala i no obei ol komanmen blong mi bae mi katemaot yufala long fes blong mi.”… “Kam antap gud” i minim blong stap glad long daereksen mo ol blesing blong heven long laef blong olgeta. … “Stap kam antap gud” i tekem tu fasin blong winim hadtaem mo temtesen. …

… Ol komanmen mo kaonsel blong God oli stap insaed long ol skripja mo ol toktok blong ol wokman blong Hem. Ol prinsipol mo ol tingting we oli stap insaed long “Famli: Wan Ofisol Toktok I Go long Wol” oli ol gudfala eksampol. Nara wan hem i gaed buk ia we i Blong Ol Yut Oli Kam Strong. …

Luk olsem se i nogat en blong ol defren ples we ol pipol oli stap lukaot mining, hapines mo help. Plante “oli bin lukluk i go ova long mak.”… Taem yumi lukluk long God, yumi save faenem pis long ol hadtaem mo fet blong yumi i save gohed blong gro iven long ol taem blong tu tingting mo jalenj long saed blong spirit. Yumi save kasem paoa long fes blong enemi mo taem we yumi stap yumiwan. Yumi save stretem ol tingting wetem tru samting we stap hapen long laef naoia. …

Lukluk long God i minim se Hem i no wan long ol nambawan samting nomo long laef blong yumi, be, Hem i nambawan long laef blong yumi.