Famli: Wan Ofisol Toktok—Ol Toktok blong God

Mi laekem famli ofisol toktok. … Ofisol toktok ia hem i kam long wan tabu ples, mekem se yumi mas tritim wetem respek ol toktok we oli kam long God. …

Taem ofisol toktok ia i kamaot, hem i no bin folem tingting blong plante long wol ia. I no long taem ia. I no naoia I gat olgeta we oli harem nogud from ofisol toktok ia long famli, mared, mo jenda. Sam oli talem se Jos i tekemaot, lukluk long hem bakegen, o iven blong stopem ofisol toktok ia.

Ofisol toktok ia blong famli i olsem we Presiden Hinckley i talem, i doktrin, ol dia brata mo sista blong mi. Ol prinsipol ia oli no aotsaed long rod, be oli folem gud ol wei blong Lod mo kavenan rod blong Hem. Ol tijing blong ofisol toktok ia, Lod blong yumi Jisas Kraes nao i soem long ol Aposol blong hem long taem ia mo naoia. …

Long olgeta we ol gat wari, save se yu yu wan pikinini blong papa mo mama long heven, yu yu pat blong famli blong Papa long Heven. I nogat wan i save gud yu o kea moa long yu bitim Hem. Tanem yu i go long Hem, talemaot hat blong yu long Hem; trastem Hem mo ol promes blong Hem. …

Yumi faenem long famli ofisol toktok:

“Long ol tabu wok ia, papa mo mama, tufala i mas helpem wanwan long tufala, olsem we tufala i semmak.”

Semmak hem i wan toktok we i impoten. …

Taem yumi laef wetem wan ae we i lukluk nomo long glori blong God, yumi respektem yumi wanwan mo sapotem yumi wanwan. …

Papa blong yumi long Heven i givim ofisol toktok long famli blong help gaedem yumi i go hom long Hem, blong helpem yumi lanem mo fulap wetem lav, paoa, stamba tingting, mo andastaning we i no save finis.