Satedei Moning Sesen

Fas Toktok

Samfala Pat

I kam long Presiden Dallin H. Oaks

Presiden blong Kworom blong Olgeta Twelef Aposol

jenisim teks — Konfrens Senta, YSA

Daonlodem PDF

Ol dia brata mo sista blong mi, yumi kam tugeta long taem ia we yumi stap krae from ded blong Presiden Russell M. Nelson we yumi lavem tumas. Mi toktok long yufala olsem Presiden blong Kworom blong Olgeta Twelef, we hem i posisen we oli bin sastenem mi finis long hem long evri konfrens long wod, stek, mo jeneral konfrens blong seven mo haf yia we i pas.

Yumi gohed wetem medel yia jeneral konfrens, wetem ol spika mo miusik we Presiden Nelson i bin asaenem long plante manis i pas, taem hem i stap rere from konfrens ia. …

… Presiden Nelson i andastanem valiu blong jeneral konfrens blong givim daereksen long Ol Sent long ol manis we i stap kam. Mifala i givim ona long hem taem mifala i stap gohed wetem konfrens ia we hem i apruvum olsem we hem i plan from. …

Sot toktok blong respek blong mi—we i stret blong konfrens ia mo ol nara toktok blong respek we oli talem finis—i hemia: Mi lavem Russell M. Nelson mo mi bin lanem moa abaot gospel mo gospel lidasip aot long longfala frensip mo wokbaot blong mi wetem hem, bitim eni nara lida we mi savegud olgeta. Hem i wan eksampol long yumi olsem wan wokman mo man blong folem Lod Jisas Kraes.

“?Wanem Wan Samting We Presiden Nelson I Bin Tijim We I Bin Jenisim Laef blong Yu?”

“Hem i bin tijim mi blong fogiv, iven taem i had tumas. Mi traehad blong fogivim sam long ol famli blong mi from ol samting we oli bin talem. Be afta we mi lisin long wan long ol toktok blong Presiden Nelson, mi bin save fogivim olgeta. I bin openem gud ol ae blong mi.”

Whitney L., 17 yia, Texas, USA

“Samtaem mi filim se ating Lod i fogetem huia mi, be Presiden Nelson i bin tijim mi se Lod i stap luk mo kea long yumi evriwan. Yumi evriwan i gat wan stamba tingting.”

Nyah B., 15 yia, Germany

“Blong ademap klin fasin long ol tingting blong mi, soem lav blong Kraes long evriwan, mekem fasin blong stap wan disaepol i kam nambawan, mo blong tingting selestial.”

Jacob Z., 17 yia, Morelos, Mexico

“Mi bin lanem hamas ol tempol oli impoten. Eni taem mi mekem wan desisen, mi traem blong tingbaot tempol oltaem. Mi mekem wanem mi save mekem blong stap klin inaf, from se mi wantem blong stap klin inaf.”

Elina S., 18 yia, Thuringia, Germany

“Presiden Nelson i tijim mi se olsem wan disaepol blong Kraes, mi nidim blong oltaem stap olsem wan man blong putum pis, save wet long taem moa wetem ol narawan, mo no faet from nomo se mi mi raet. Naoia, mi traem blong no harem nogud o kros.”

Laura J., 15 yia, Brazil

“Mi glad tumas we Presiden Nelson i lukluk moa long ol tempol. Taem mi bin mekem tempol i kam wan impoten samting long laef blong mi, mi stat blong gat wan testemoni we i no save brok, mi kasem revelesen, mo mi wantem blong go long tempol moa. Mi talem tangkyu tumas long hamas Papa blong mi long Heven i lavem mo kea tumas long mi, insaed long tempol.”

Jarom P., 18 yia, Arizona, USA

“‘Wan long ol isi wei blong faenemaot wan tru man o woman blong folem Jisas Kraes, hem i tru long hamas lav mo sore we hem i soem taem hem i stap tritim ol narawan.’ Stat long taem we mi bin stap prea abaot kwot ia we i kam long Presiden Nelson, mi bin save givhan long ol fren blong mi blong helpem olgeta blong filim lav blong mi long Sevya.”

Brayden H. 18 yia, Colorado, USA

“Mi bin stap gotru wan hadtaem we i had tumas, mo mi filim se hem i tumas blong mi save stanap strong kasem en. Blong stap tingting selestial i bin helpem mi blong tingbaot se ol problem blong mi oli blong smol taem nomo. Hemia i bin helpem mi blong go tru taem ia long laef blong mi.”

Sophie A., 15 yia, Arizona, USA

“Rilesensip blong mi wetem brata blong mi i no gud tumas. Afta we Presiden Nelson i givim toktok blong hem ‘I Nidim Ol Man blong Putum Pis,’ mi bin save lego kros blong mi i go. Rilesensip blong mitufala naoia i kam moa gud.”

Roman D., 18 yia, Oregon, USA