No Gat Wan I Sidaon Hemwan

Long parabol blong gudfala man Samari, Jisas i invaetem yumi blong kam wan wetem yumi wanwan mo long Hem long hotel blong Hem—we i Jos blong Hem. …

“Rum long hotel” i go wetem “no gat wan i sidaon hemwan.” Taem yu kam long jos, sapos yu luk wan i stap hemwan, ?plis yu save go talem halo mo sidaon wetem hem? …

“Nogat wan i sidaon hemwan” i minim tu se nogat wan i stap hemwan long saed blong filing mo spirit. Wantaem mi bin go wetem wan papa we hat blong hem i brok, blong visitim boe blong hem. Sam yia bifo, boe ia i bin hapi tumas blong kam wan niu dikon. Long spesel taem ia, famli blong hem i bin pem fas niu sus blong hem.

Be long jos, ol dikon oli laf long hem mo ol sus blong hem. Ol sus blong hem oli niu, be stael blong sus ia i no naes tumas. Yangfala dikon ia i bin sem mo harem nogud mo i talem se bae hem i neva go long jos bakegen. Hat blong mi i brok yet from hem mo famli blong hem. …

Long Jos blong Hem we i kambak, yumi evri i kam moa gud taem i nogat wan i stap sidaon hemwan. Yumi no tekem o letem nomo. Letem yumi welkamem, luksave, givhan, lavem. …

Tedei plante oli filim se oli stap olgetawan. …

I gat plante risen we i mekem yumi filim se yumi no stap pat gud wetem ol narawan long jos—hemia nao wanem i minim blong sidaon yumiwan. …

Mosaea 18:21 i invaetem yumi blong joenem hat blong yumi i kam wan long lav. Mi invaetem yumi blong no wari tumas, no jaj tumas, no askem tumas long ol narawan—mo taem we i gat nid, yumi no strong tumas long yumiwan. …

Kavenan blong stap pat i kam moa bigwan taem yumi kam wan wetem yumi wanwan mo long Lod long hotel blong Hem. Lod i blesem yumi evriwan taem i no gat wan i sidaon hemwan.