O Perofeta a le Atua

Na molimau atu le Alii i le fafine i Sunema e faapea, o Elisaia o se perofeta a le Atua, ma sa ia faatino e ala i le tatalaina o lona fale e tali ai o ia.

E mafai foi e i tatou ona maua se molimau patino o perofeta a le Atua i aso nei ma tatala atu o tatou loto ma mafaufau—o tatou fale—i le savali a lo tatou Tama Faalelagi mo i tatou i nei aso e gata ai. …

O le a se perofeta? O se perofeta o se tamalii ua valaauina e le Atua e saunoa mo Ia. …

O perofeta o tagatavā’ai ma talifaaaliga. O lona uiga e mafai ona latou vaai i mea e le mafai e isi ona vaai i ai, ma e mafai ona latou valoia mea e tutupu i le lumanai. … E maua e perofeta ia poloaiga ma faaaliga mai le Alii. …

E folafola atu foi e perofeta le talalelei ma o ni faiaoga ma avefeau musuia a le Atua i tagata uma i le fogaeleele. …

E molimau atu perofeta e uiga ia Keriso—Lona soifua ai, Lana misiona, ma Lona paia. …

Na aoao mai i tatou e le fafine o Sunema, e mafai ona tatou maua lena molimau e ala i le Agaga Paia. Ou te folafola atu ia te outou o le taimi lava tatou te iloa ai o i latou ua faauuina e le Atua, o le a faigofie atu o tatou olaga e ui lava i o tatou luitau faifaipea, a o tatou usiusitai i o latou leo ma le talitonu, faatuatua, ma le faamoemoe. O le faalogo atu ma usitai i le leo o le perofeta e tāua i le taofimau i mea lelei uma seia oo i le Afio Mai Faalua o lo tatou Faaola. …

Ou te faafetai mo le taitaiga ma taumafaiga faapaiaina a perofeta soifua. … O le Alii lava ia e filifilia Ana auauna.