Sauniga o le Taeao o le Aso Toonai

O Le Faatomuaga

O Fuaitau

Saunia e Peresitene Dallin H. Oaks

Peresitene o le Korama a Aposetolo e Toasefululua

alt text — O le Maota Autu mo Konafesi, ISA

Sii mai le PDF

O’u uso e ma tuafafine pele, ua tatou potopoto a o tatou faanoanoa i le tuumalo o lo tatou Peresitene pele o Russell M. Nelson. Ou te tautala atu ia te outou o le Peresitene o le Korama a le Toasefululua, o le tofiga lea ua uma ona lagolagoina ai a’u i uarota, ma siteki taitasi ma le konafesi aoao i le fitu ma le afa tausaga ua mavae.

Tatou agai i luma ma taualumaga o le konafesi aoao faaleafatausaga faatasi ai ma le au failauga ma musika na tofia e Peresitene Nelson i le mavae ai o masina o tapenaga. …

… Na malamalama Peresitene Nelson i le tāua o le konafesi aoao e tuu atu ai le taitaiga i le Au Paia i masina a sau. Tatou te faamamalu ia te ia e ala i le mulimuli i le faasologa fuafuaina o le konafesi na ia faamaoniaina. …

O la’u lava saafiafiga puupuu—e talafeauga ma lenei konafesi ma saafiafiga ua uma ona tuuina atu—o lenei: Sa ou alofa ia Russell M. Nelson ma e tele atu mea na ou aoao mai e uiga i le talalelei ma le taitaiga o le talalelei mai i la ma’ua faigauo umi ma le mafutaga ma ia nai lo se isi lava taitai ua ou iloaina patino. O ia o lo tatou faaa’oa’o ma o se auauna ma se soo o le Alii o Iesu Keriso.

“O Le A Se Mea Na Aoao Mai e Peresitene Nelson Na Suia Ai Lou Olaga?”

“Sa ia aoaoina a’u e faamagalo atu e tusa lava pe faigata tele. Sa ou tauivi e faamagalo atu i nisi o tagata o lo’u aiga lautele mo mea na latou fai mai ai. Ae ina ua uma ona ou faalogo i se tasi o lauga a Peresitene Nelson, sa mafai ona ou faamagaloina i latou. Sa matuai pupula ai lava ou mata.”

Whitney L., 17, Texas, ISA

“O nisi taimi ou te lagona ai e pei e galo i le Alii lo’u tagata, ae na aoao mai e Peresitene Nelson ia te a’u e silafia ma popole le Alii mo i tatou uma. E tofu i tatou uma ma se faamoemoega.”

Nyah B., 15, Siamani

“Ina ia faaopoopo le mama i o’u mafaufauga, faaali atu le alofa mama i tagata uma, faamuamua lo’u avea ma soo, ma mafaufau faaselesitila.”

Jacob Z., 17, Morelos, Mekisiko

“Sa ou aoaoina le tāua tele o malumalu. Soo se taimi lava ou te faia ai se faaiuga, ou te taumafai e manatua pea le malumalu. Ou te faia soo se mea ou te mafaia e faatumauina ai lo’u agavaa, auā ou te manao ia ou agavaa.”

Elina S., 18, Thuringia, Siamani

“Na aoao mai e Peresitene Nelson ia te a’u e faapea, i le avea ai ma se soo o Keriso, e manaomia ona ou taumafai e le aunoa ia avea ma sē e faatupuina le filemu, ia onosai atili i isi, ma aua le tau ina ia sa’o. Ia, ou te taumafai ia aua nei ou le fiafia pe ita. ”

Laura J., 15, Pasila

“Ou te faafetai na taulai atu Peresitene Nelson i malumalu. A o ou faia le malumalu o se mea e faamuamua, ua ou tuputupu a’e i se molimau e le maluelue, maua faaaliga, ma manao e alu soo. Ou te faapelepele i le tele o lo’u lagonaina o le alofagia ma le tausia e lo’u Tama Faalelagi i totonu o le malumalu.”

Jarom P., 18, Arisona, ISA

“‘O se tasi o ala aupito faigofie e iloa ai se soo moni o Iesu Keriso o le ala e taulima ai ma le agaalofa e lena tagata isi tagata.’ Talu mai le tatalo e uiga i lenei upusii a Peresitene Nelson, ua mafai ai ona ou auauna atu i a’u uo e fesoasoani ia latou lagonaina le alofa o lo’u Faaola.”

Brayden H., 18 tausaga, Colorado, ISA

“Sa ou feagai ma se taimi faigata tele lea na lagona ai e pei ua tele naua le onosaia. O le mafaufau faaselesitila na fesoasoani ou te manatua ai o o’u faafitauli e na o sina taimi le tumau. Sa fesoasoani tele lena mea ia te a’u e ola ai i lena taimi i lou olaga.”

Sophie A., 15, Arisona, ISA

Sa le manaia tele le ma mafutaga ma lo’u uso. Ina ua uma ona tuuina mai e Peresitene Nelson lana saunoaga ‘Ua Manaomia e e Faatupuina le Filemu,’ sa mafai ona ou lafoai lo’u ita. Ua sili atu ona lelei le ma mafutaga i le taimi nei.”

Roman D., 18, Oregon, ISA