O I Latou o O Latou Lava Faamasino

O se faamoemoega autu o le Foafoaga ma lo tatou i ai i le tino, o le saunia lea o le avanoa mo i tatou e gaoioi ai ma avea ma ē ua valaaulia i tatou e le Alii ia avea ai. …

… E lei faamanuiaina i tatou i le faitalia e filifili tatau e fai ai soo se mea tatou te mananao ai i soo se taimi. Nai lo lena, e tusa ai ma le fuafuaga a le Tama, ua tatou maua le faitalia e filifili tatau ai e saili ma gaoioi e tusa ai ma upumoni e faavavau. …

Na faamamafa mai e Peresitene Dallin H. Oaks e faapea, o le talalelei a Iesu Keriso ua valaaulia ai i ta’ua uma ia iloa se mea ma ina ia avea ai o se mea e ala i le faaaogaina ma le amiotonu o le faitalia e filifili tatau ai. …

[Ae ui i lea] o a tatou galuega ma naunautaiga lava ia e le mafai ona faaolaina ai i tatou. “A uma mea tatou te mafaia,” tatou te faaleleia ai ma le Atua e ala i le na o le alofa mutimutivale ma le alofa tunoa e maua e ala i le taulaga togiola e le gata ma faavavau a le Faaola. …

O le toatele o i tatou atonu e manatu faapea o le tatou tutu i luma o le pa o le Faamasino Faavavau, o le a pei o se taualumaga i se faamasinoga faalelalolagi o le tulafono. O le a pulefaamalumalu ai se faamasino. O le a tauaaoina atu faamaoniga. O le a tuuina mai se faaiuga. Ma atonu o le a tatou le mautonu ma fefefe seia vagana ua tatou iloa le taunuuga faaiu. Ae ou te talitonu e lē sa’o lena faauigaga. …

O le mata’u i le Alii e le o se atuatuvale musuā e uiga i le alu atu i Lona afioaga ina ia faamasinoina. Ae, o se vaaiga o le faailoaga laualuga e uiga ia i tatou lava “o mea e pei ona i ai moni lava” ma “e pei o le a i ai moni lava.” …

I le faaiuga, o i tatou lava la o ō tatou faamasino. O le a lē moomia se tasi e ta’u maia po o fea tatou te o i ai. I le afioaga o le Alii, o le a tatou faailoa atu ai mea na tatou filifili e avea ai i le olaga faitino, ma iloa mo i tatou lava le mea e tatau ona tatou i ai i le faavavau.