Ma Lenei Ua Ou Vaai

O le mataupu lona iva o le Ioane o loo tusia ai le aafiaga o Iesu ma Ona soo ina ua latou tau atu i se tagata ‘aisi, na tauaso lava i lona fanau mai. …

Na tuuina mai e Iesu le uluai faauigaga i lenei fetufaa’iga, na ta’u atu ai i Ona soo o nei mea uma na tutupu “ina ia faaalia ai galuega a le Atua ia te ia.” …

O se tasi upumoni ua manino mai ii, o meafaigaluega na faaaoga e le Foafoa o le lagi ma le lalolagi ma mea uma ua i ai ua saunia ai lenei vavega: o le feanu ma se luuga palapala! O nei lava elemene ua tautino mai ai e mafai e le Atua ona faamanuia i tatou i soo se metotia Na te filifilia. …

E a la pe afai e tali mai a tatou tatalo i ni ala faigofie pe lavelave foi? Pe ua tatou loto ea e faaauau, ma ia taumafai pea e ola i le talalelei a Keriso tusa lava pe o le a le tele o feanuga ma le palapala e moomia ai? …

O la’u uluai feiloaiga lea na maua ai le ola ma pupula ai mata i faamaoniga moni o le upu moni, e le’i sau faatasi ma ni palugā palapala pe i le taelega o Seloa. E leai, o le meafaigaluega o le mea moni, lea na aumaia lo’u faamalologa mai le Alii na oo mai i itulau o se tusi, ioe, le Tusi a Mamona: O Se Tasi Molimau ia Iesu Keriso. …

… Po o le a lava, o le aafiaga o le Tusi a Mamona i lo’u olaga e le itiiti ifo le ofoofogia ia te a’u nai lo le faaaogaina o le feanuga ma le palapala na tuu i luga o mata o le tauaso. Ua avea, mo a’u, o se tootoo o le saogalemu mo lo’u agaga, o se malamalama maoae ma āti o faaaliga, o se malamalama mo le ala lea e tatau ona ou savali ai pe a oo mai puao o le pogisa. Ma e mautinoa lava sa avea ai, ma o le a avea ai.