O E Taumanatunatu Pe Tatau Ona E Mauaina Lou Faamanuiaga Faapeteriaka?

E leai se tausaga patino mo oe e "tatau" ona maua ai lou faamanuiaga faapeteriaka. O le a fesoasoani ia te oe e tusa lava po o le a le taimi e te mauaina ai! Fai mai lena mea, o le taimi saoe maua ai lou faamanuiaga o le taimi lea ua "lava ai lou talavou e tele faaiuga taua i le olaga o loo i luma atu pea," lea o loo faamatalaina ai le tulaga o loo e i ai.

I le iuga, a e mauaina lou faamanuiaga faapeteriaka e i le va o oe ma le Tama Faalelagi. O se faailoilo lelei o le saunia o le taimi lea e i ai sou manao e maua lou faamanuiaga faapeteriaka ma malamalama po o le a lena mea—ae e te le tau iloaina mea uma! E mafai ona e tatalo mo se faamautinoaga ma talanoa i lou epikopo po o le peresitene o le paranesi e uiga i au fesili.

Ina ua maea se lesona a Tamaitai Talavou e uiga i faamanuiaga faapeteriaka, sa ou maua lenei lagona e tatau ona ou mauaina e a’u, e iloa ai le taitaiga a le Tama Faalelagi o loo teuina mo a’u. Sa ou tatalo soo ma suesue mo ni masina.

Ona oo lea i se tasi aso i le Aoga Sa, sa fai mai lo’u faiaoga ia te au, "Afai o loo e mafaufau i lou faamanuiaga faapeteriaka, atonu ua oo i le taimi mo oe e maua ai." O lena mea na musuia ai au ou te alu i ai, ma ou te matua faafetai lava sa ou faia. Ona o lo’u faamanuiaga faapeteriaka, ua ou iloa ai e silafia e le Tama Faalelagi po o ai au.

Acadia L., 16 tausaga, Baden-Württemberg, Siamani

E le o poloaiina i tatou e mauaina se faamanuiaga faapeteriaka, ae o se manatu lelei tele! O lou faamanuiaga o le a avea ma se punavai o le malosi, faamafanafanaga, ma faaaliga ma se punaoa taua tele pe a e faia ni faaiuga tetele po o le feagai ma se taimi faigata.

Mo se faataitaiga, na saunoa Elder Randall K. Bennett o le Fitugafulu o le mauaina o lona faamanuiaga faapeteriaka na fesoasoani ia te ia e malamalama ai i lona "faasinomaga moni e faavavau—o ai moni lava [o ia] ma po o ai e mafai ona avea ai [o ia]." O lenei mea na faateleina ai lona faatuatua i le Tama Faalelagi ma Iesu Keriso, lea na fesoasoani ia te ia e tumau malosi ai ina ua tatala le faaipoipoga a ona matua mulimuli ane.

Afai e te le o mautinoa lava pe e te manaomia pe manao i se faamanuiaga faapeteriaka, fesili i ou matua, tei, isi tagata o le aiga, po o taitai o le Ekalesia pe na faapefea ona fesoasoani o latou faamanuiaga ia i latou.

Ina ua ou faatoa mauaina lo’u faamanuiaga faapeteriaka, sa ou aoaoina ni mea se tele e uiga ia te a’u lava ia. Ou te fiafia e toe faitauina ia le itiiti ifo ma le faatasi i le vaiaso, ma o taimi uma ou te faia ai, ou te aoaoina ai se mea fou. E fesoasoani ou te toe mafaufau ai i lo’u olaga e ala i se tioata faaleagaga ma iloa ai pe na faapefea ona fesoasoani ma taialaina a’u e le Alii i vaega uma o lo’u olaga.

Dmitri P., 17 tausaga, Minnesota, ISA

Afai e te popole o lou faamanuiaga faapeteriaka o le a le taulimaina ai ou faamoemoega uma, miti, ma fesili e uiga i le lumanai—pe o le a talanoa ai i se auala e te le fiafia i ai—ia manatua o se faamanuiaga, ae le o se valoaga auiliili. O le a le ta’u atu ai ia te oe mea uma o le a tutupu i lou olaga (pe o le auala tonu foi o le a tupu ai), ae o le ata’u atu ia te oe faamanuiaga e mafai ona e maua e ala i le mulimuli i le taitaiga a le Tama Faalelagi.

O le mea e sili ai, o lou faamanuiaga faapeteriaka o se savali o le alofa o le Atua mo oe. E finagalo le Tama Faalelagi ia e manuia ma toe foi atu i le aiga ia te Ia. O lou faamanuiaga faapeteriaka ua na o se tasi lea o le tele o punaoa ua Ia tuuina atu ia te oe e fesoasoani ai ia te oe i lau malaga.

Sa masani ona faigata ia te au ona iloa faaaliga, ae e ala i lo’u faamanuiaga faapeteriaka, na faaali mai ai e le Tama Faalelagi ia te a’u Ana faamanuiaga folafolaina ma Lona alofa mo a’u. Na faamalosia ai a’u ma fesoasoani ia te a’u e taulai atu i mea e sili ona taua. Sa tuputupu ae lo’u faatuatua ma faalolotoina lo’u alofa mo lo’u Faaola ma le Tama Faalelagi.

Bree-Ell R., 16 tausaga, Aukilani, Niu Sila