Faamalosiau Atu i le Tasi ma le Isi

Tatou te manaomia le tasi ma le isi. E maua le malosiaga faalelagi mai le lotogatasi, ma o le mafuaaga lena o loo fuafua ai Satani e faafevaevaeai i tatou.

Ae paga lea, o nisi o i tatou, e mafai ona faigata i nisi o taimi le auai i le lotu mo le tele o mafuaaga eseese. …

O o tatou aafiaga i le lotu ua fuafuaina e tuuina atu ai ni fesootaiga tāua ma le Alii ma faatasi ma le tasi ma le isi lea e matuā manaomia mo lo tatou soifua manuia faaleagaga ma faalelagona. …

O le alofa ma le tausiga faaKeriso e maualuluga ma paia atu. …

… O i tatou uma o se vaega o le aiga o le Atua, ma e alofa o Ia i Ana fanau uma. E finagalo o Ia ia alolofa Ana fanau ia te Ia ma alolofa foi i le tasi ma le isi.

O le soifuaga o le Faaola sa o se faataitaiga o le alofa, faapotopotoina, ma le siitia e oo lava ia i latou na faamasinoina e tagata lautele o ni tagata ua faanofoesea ma lē mamā. O Ia o se faataitaiga ua poloaiina i tatou e mulimuli ai. …

O le a i ai taimi i o tatou olaga taitasi, o le a tatou manaomia ai le fesoasoani ma le faamalosiauga. I na tatou tautino nei loa e faia i taimi uma mo le tasi ma le isi. …

Ia te outou taitoatasi atonu ua lagona ua tou mamao i tua i lenei tuuga o le olaga, i lenei malaga i le olaga nei, faamolemole ia faaauau pea. E na o le Faaola e mafai ona faamasino atoatoa le mea ua tatau ona e i ai i lenei taimi, ma e mutimuti alofa o Ia ma faamaoni. …

Taulai lau vaai i le Faaola. OIa o lou ai u’amea. Aua lava ne’i faamamulua o Ia. Ou te molimau atu o loo soifua o Ia ma e mafai ona e faatuatuaina o Ia. Ou te molimau atu foi o loo Ia patipatia ma faamalosiauina oe.