Sauniga o le Afiafi o le Aso Toonai
O Le Alofa Togiola o Iesu Keriso
O Nai Vaega
Talitha Cumi, saunia e Eva Timothy
Afai ua e faia ni agasala matuiā ma o loo e i ai i le faagasologa o le salamo pe ua i ai le manao ia salamo atoatoa ma lagona le olioli le faamatalaina o le faamagaloga, faamolemole ia iloa o lenei vavega o loo faatalitali mai mo oe. …
O le liliuese mai le agasala, ae faasaga atu i le Atua, ma le faamalosia o lou faatuatua ia Iesu Keriso o ni amataga matagofie ia. O le gauai atu ma le faamaualalo o lou loto i le Atua e aofia ai le faailoa atu o agasala matuiā i lou epikopo po o le peresitene o le paranesi, peitai o lou faamagaloga atoatoa o le a oo mai mai le Faaola. …
O se manao e toe foi moni atu i le Atua e o mai faatasi ma se naunautaiga ia faamaoni atoatoa i lou Tama Faalelagi, ia te oe lava, ma ia i latou o e na faamanualia, ma i lou taitai perisitua. …
O lou naunautai e taitai atu ai oe i le manao e toe faaleleia mea na e faaleagaina. Peitai, o le iloaina o ni isi mea e le au i ai lou malosi e toe faalelei ai, e te tatalo faatauanau ai i le Alii, e ala mai i Lona alofa tunoa, o le a fesoasoani e faamalolo ai i latou ua afaina i taunuuga o au amioga. …
A o e sailia le faamagaloga a le Alii, ia onosai a o e faatalitali i Lana faamaoniga atoa. …
Mo oe o lē ua faamanu’alia ma le lē amiotonu e ala i agasala matuiā a se isi, ou te matuai manao lava e faasoa atu le alofa ma le agaalofa o le Faaola, Lana faamafanafanaga ma le filemu.
… Ou te tuuina atu la’u faamautinoaga atoatoa e silafia ma e alofa le Faaola ia te outou. Aapa atu ia te Ia. O Ia o lou faamafanafanaga ma le malosiaga; o le a Ia auina mai Ana agelu e sapasapai oe.