Tofotofoina ma Faamalosia ia Keriso

I aso ua leva, sa ou sailiili ai e aoao le fisiki ma le matematika i o‘u tausaga i le kolisi. Sa ou lagona le lofituina. … Sa amata ona ou mafaufau e togi le solo, e faia se mea faigofie atu.

Sa ou lagona le vaivai. A o ou tatalo, sa ou lagonaina le faamautinoaga filemu a le Alii. Sa ou lagonaina o Ia o fetalai mai i lo‘u mafaufau, “O loo ou tofotofoina oe, ae ua ou faatasi foi ma oe.” …

Sa ou aoaoina o la’u tauiviga ma le fisiki sa o se meaalofa moni lava mai le Alii. Sa Ia aoaoina a’u e faapea, faatasi ai ma Lana fesoasoani, e mafai ai ona ou faia mea na foliga mai e le mafai pe afai e i ai so‘u faatuatua o le a i ai o Ia iina e fesoasoani mai ia te a’u. E ala mai i lenei meaalofa, sa galue ai le Alii e tofotofo ma faamalosia a‘u.

… O le faamaonia o se fasi uamea o le tuu lea i lalo o se mea mamafa. … E le faavaivaia le uamea i le faamaoniaina. O le mea moni, e avea o se mea e mafai ona faatuatuaina, o se mea e lava le malosi e tauave ai avega e tele atu. …

Pe a faaauau pea ona tatou faatuatua ia Iesu Keriso—e tusa lava pe o le a lagona le faigata o mea ia i tatou i lena taimi—tatou te malolosi atili ai lava faaleagaga. …

Ona o Lana Togiola mamalu, ua mafai ai e Iesu Keriso ona faamalosia i tatou i o tatou taimi o tofotofoga. …

… Atonu e oo mai lemu, e ala i tofotofoga o le olaga faaleaiga. Atonu e oo mai e ala i ma‘i po o le le fiafia po o le faavauvau po o le tuuatoatasi.

Ou te molimau atu o nei taimi e le o ni faamaoniga ua tuulafoaiina outou e le Alii. Ae, o ni faamaoniga ia e lava Lona alofa ia te oe e faaleleia ma faamalosia ai oe. O loo Ia faia oe ia lava lou malosi e tauave ai le mamafa o le ola e faavavau.