Sauniga o le Afiafi o le Aso Toonai
O Le Folafolaga i le Aiga—O Afioga mai le Atua
O Nai Vaega
ISA
Ou te fiafia i le folafolaga i le aiga. … O le folafolaga e i ai se afuaga paia, e tatau ona tatou taulimaina ma le migao ia afioga faamemelo mai le Atua. …
Ina ua tuuina mai, sa lei ogatasi le folafolaga ma manatu o le toatele i le lalolagi. E le o le taimi lena. E le o le taimi nei. E i ai i latou e i ai faafitauli i le tautinoga i le aiga, faaipoipoga, ma le itupa. Ua fautuaina e nisi le Ekalesia e toe toso i tua, toe iloilo, pe faataatia ese foi le folafolaga.
O lenei folafolaga i le aiga, e pei ona ta’ua e Peresitene Hinckley, o le aoaoga faavae autu, o’u uso e ma tuafafine. E le o laa ese ona mataupu faavae ae o loo sagatonu lelei ma ala o le Alii ma Lana ala o le feagaiga. O aoaoga a le folafolaga na faaalia mai e lo tatou Alii o Iesu Keriso i Ana Aposetolo i lena taimi ma le taimi nei. …
Mo i latou o i ai ni atugaluga, ia e iloa o oe o se atalii/afafine o ni matua faalelagi, o se vaega o le aiga o lou Tama Faalelagi. E leai se tasi e sili atu ona iloa oe pe amanaia loloto oe nai lo Ia. Liliu atu ia te Ia; liligi atu lou loto ia te Ia; talitonu ia te Ia ma Ana folafolaga. …
Tatou te maua i le folafolaga i le aiga:
E ao i tamā ma tinā ona fesoasoani le tasi i le isi o se paaga tutusa.
O le tutusa o se upu e taua. …
Pe a tatou ola ma le manatu tasi i le mamalu o le Atua, tatou te faaaloalo i le tasi i le isi ma lagolago le tasi ma le isi. …
Ua tuuina mai e lo tatou Tama o i le Lagi le folafolaga i le aiga, e fesoasoani e taitai atu i tatou i le aiga ia te Ia, e fesoasoani ia i tatou e aoao ma faatumuina i le alofa, malosi, faamoemoega, ma le malamalama e faavavau.