“Te u lava fēfē ʻo tekeʻi ʻa e ʻahiʻahí ʻi he taimi ʻoku ou toutou fehālaaki aí?”

“Te u lava ʻo talanoa ki he Tamai Hēvaní fekauʻaki mo e meʻa kotoa ʻo fakafou ʻi he lotu. Kapau te ke fakatomala fakamātoato mo holi ke hoko ʻo lelei ange, te Ne tokoniʻi koe, ka kuo pau foki ke ke fakahoko moʻoni ʻa e ngāué. Siʻaki ʻa e ngaahi meʻa ʻokú ne ʻahiʻahiʻi koé, pea kole ki hoʻo mātuʻá, pīsopé, mo e kau taki ʻo e toʻu tupú ha faleʻi.”

Katenisi W., 15, ʻIutā, USA

“Ke tekeʻi ʻa e ʻahiʻahí ʻi he momeniti pē ko iá, ʻoku ou manava lōloa tuʻo tolu ke kiʻi tuʻu ʻo toe vakavakai. ʻOku ʻikai ko e haohaoa ʻi he meʻa kotoa peé ka ko e tuʻu hake ʻo fai hotau lelei tahá. ”

Lingikoni B., taʻu 17, Nevata, USA

“ʻOku tau taʻehaohaoa kotoa pē mo fai ha ngaahi fehalaaki, ka ko e fehalaaki lahi tahá ʻa e loto-foʻí, koeʻuhí he te ne lava ʻo tataki kitautolu ke tau fai ha ngaahi meʻa ʻe ʻi ai honau ngaahi nunuʻa taʻengata. ʻOua naʻa tuku hoʻo ʻalu ki he lotú, hoko atu hono lau e folofolá, lotu, mo fakatomala.”

Lepeka D., 15, Mekisikou Siti, Mekisikou

“ʻOku tau ongoʻi he taimi ʻe niʻihi he ʻikai ke tau teitei lava ʻo liliu. Ka ko e ongoongo fakafiefia ʻo e Fakalelei ʻa e Fakamoʻuí ʻoku ʻi ai ha ʻamanaki lelei! Lotu ke toe lelei ange, fekumi fakamātoato ki Heʻene fakahinohinó, fakatomala, mo fakamolemoleʻi koe ʻi hoʻo feinga ke hoko ʻo hangē ko Iá. Fekumi maʻu pē ki Heʻene ʻofá. Te ne ʻoatu ʻa e tokoni mo e mālohi ʻoku fiemaʻu ke ikuna ʻaki e tōnounoú mo e taʻehaohaoá. ”

Keiti., 14, ʻIutā, USA

“Vakavakaiʻi ʻa e tūkungá pea fakapapauʻi pe ko hai pe ko e hā ʻokú ne ueʻi koe ke ke maumaufonó, pea mavahe leva mei he ngaahi ivi tākiekina ko ia ʻokú ne fakamamahiʻi koé. Lotu maʻu pē, fekumi ki he Laumālie Māʻoniʻoní ke maʻu ʻa e faʻa ʻiloʻiló ʻi he tūkunga kotoa pē, ako ʻa e folofolá, pea moʻui ʻaki ia ki he ngaahi ngāue ʻoku fai lolotonga ho uiuiʻí.”

Konani J., 26, ʻApitasani, ʻAivolī Kousi