Mālohi ke Taʻofi e Fakafehoanakí

Tā fakatātā ʻa Katelyn Budge

ʻOku ou faʻa fakafehoanaki au ʻi ha ngaahi taimi ki he niʻihi kehé mo ongoʻi loto-mamahi ʻi he ʻikai ke u fakaʻofoʻofa pe “haohaoa” ʻo hangē ko kinautolú. Koeʻuhí ko e meʻá ni, naʻá ku foua ha ngaahi ʻahiʻahi faingataʻa fakaʻatamai mo fakaeloto. Naʻá ku fekumi ʻi he ʻinitanetí ki ha ngaahi maʻuʻanga tokoni ke lavaʻi kinautolu, ka naʻe ʻikai ke u lava ʻo maʻu ha meʻa naʻe tokoni.

Naʻá ku fakakaukau ʻi ha ʻaho ʻe taha, “ʻOku fiemaʻu ke u tūʻulutui ʻo lotu, koeʻuhí ʻoku ʻi ai ha taha ʻi ʻolunga te ne lava ʻo ʻōʻōfaki au.” Ko ia naʻá ku fakafalala ki he Tamai Hēvaní mo Sīsū Kalaisi peá u lotu fakamātoato.

ʻI heʻeku fai iá, naʻá ku manatuʻi naʻe faʻu fakafoʻituitui au ʻe he Tamai Hēvaní ʻi Hono tataú, ko ia ʻoku fiemaʻu ke u fakahoungaʻi au. Naʻá Ne ʻomi au ki heni ʻi ha taumuʻa, pea ʻoku ou fiefia ʻoku ou ʻi he māmaní! Naʻá Ne fakamanatu mai ʻo fakafou ʻi he Laumālie Māʻoniʻoní, ʻoku ou mahulu hake ʻi he meʻa ʻoku ou fakakaukau ki aí, pea naʻá ne ʻomi kiate au ha mālohi.

Naʻá ku fakakaukau ke siʻaki ʻa e mītia fakasōsialé pea fakapapauʻi ʻoku ou feohi mo e kakai totonú—ʻa e kakai naʻa nau fakahaaʻi mai kiate au ʻa e ʻofa faka-Kalaisí. ʻOku ou houngaʻia ʻaupito ʻi hoku ngaahi kaungāmeʻa ʻi heʻeku kalasi ʻi he Kau Finemuí koeʻuhí ko e ngaahi maama peheé. Ko e taimi kotoa pē naʻá ku fakaangaʻi pē au, naʻa nau fakamanatu mai ʻoku ou fakaʻofoʻofa pea ʻoku ʻi ai hoku mahuʻinga.

ʻOku ou kei fakafehoanaki pē au ki he niʻihi kehé ʻi he taimi ʻe niʻihi. Ka ko e taimi kotoa pē ʻoku ou lotu aí, ʻoku talamai ʻe ha kihiʻi leʻo siʻi, “ʻAmala, ʻokú ke fakaʻofoʻofa.”

Ko Sīsū Kalaisi hoku Fakamoʻuí mo hoku kaungāmeʻá. ʻOkú Ne ʻi ai maʻu pē ke tokoniʻi au, neongo ʻeku ongoʻi hangē ʻoku ʻikai ke u manatuʻi maʻu pē Ia ʻo hangē ko ia ʻoku totonu ke u faí. ʻOku ou ʻilo ʻoku Ne ʻofeina au pea pehē ki he Tamai Hēvaní, pea ʻoku ou ʻofa ʻiate Kinaua. ʻOku ʻikai ke u tui naʻá ku mei aʻusia ʻa e faʻahinga ʻofa ʻokú Na ʻomi kiate aú ʻi ha toe feituʻu kehe.