Ko e Hā Te u Lava ʻo Fai ʻi he Taimi ʻOku Fakaʻitaʻi Ai Au ʻe ha Tahá?

Naʻá ku ʻalu ki ha konifelenisi KFT ʻi ha hōtele ʻi he hili pē ʻa e ngaahi fakangatangata ʻo e mahaki fakaʻauhá. Naʻe tokolahi ha toʻu tupu ne mahino hono uesia ʻe he mahaki fakaʻauhá pea fehangahangai mo ha ngaahi palopalema fakalaumālie mo fakaʻatamai. Ne hangē ne mau fehangahangai mo e taha ʻo e ngaahi feingatau fakalaumālie maʻongoʻonga taha kuó u moʻui aí. Kuo teʻeki ai ke u ongoʻi mamahi pehē.

ʻI he kamataʻanga ʻo e uiké ʻi heʻeku hū atu ki he loki naʻá mau nofo aí, naʻe talanoa mai ha tamaiki tangata ʻe niʻihi mo kakata fekauʻaki mo ha ngaahi meʻa naʻá ne uesia kovi au. Ne u pehē, “ʻOku ʻikai totonu eni.” Naʻá ku ongoʻi ʻoku totonu ke u kole ange ke nau lea leʻosiʻi ange. Ka neongo ia, ʻi heʻeku feinga ke lea haké, naʻa nau manukiʻi mo tolongi mai ha ʻū sitōkeni kiate au.

ʻI he momeniti ko iá, naʻá ku mihiʻi lahi ʻeku mānavá peá u fehuʻi loto pē kiate au, “Ko e hā naʻe mei fai ʻe he Fakamoʻuí?” Hili ʻeku fakakaukau ki aí, ne u toʻo hake ha sitōkeni naʻe lī mai kiate au, fakafoki ia, mo pehē ange, “Hei, ʻoku ʻikai tonu ʻeni. Kātaki ʻo lea leʻosiʻi ange. Mahalo ʻoku sai ke tau fai ha meʻa kehe. ”

Kapau ʻoku ongoʻi ʻe ha taha ʻoku ʻita pe fakamamahiʻi ʻo hangē ko aú, te u pehē ange, “Fakakaukau fakasilesitiale.” Kuo fakaafeʻi kitautolu ʻe Palesiteni Lāsolo M. Nalesoni ke tau hoko ko ha kau faʻa fakalelei. ʻOku mahuʻinga ʻa e hoko ko ha tokotaha faʻa fakaleleí, tautautefito ʻi he ngaahi taimi faingataʻá.

Naʻe akoʻi au ʻe he aʻusia ko ʻení fekauʻaki mo e mahuʻinga ʻo e manavaʻofá mo e ʻofa ki hoku kaungāʻapí. ʻE nofo maʻu ʻa e lēsoni ko iá ʻi hoku lotó.