Maʻu ʻa e Meʻa Kotoa

Ko Sīsū Kalaisi pē te tau lava ai ʻo maʻu ʻa e ngaahi tāpuaki maʻongoʻonga taha ʻa e ʻOtuá ʻi he moʻuí ni mo e moʻui ka hokó. Naʻe fakaʻaongaʻi ʻe he palōfita ko Sēkopé ha fakatātā ʻokú ne fakatātaaʻi ʻa e fatongia foaki ʻo e Fakamoʻuí:

Ko e Tauhi ʻo e Matapaá

“ʻOku lausiʻi ʻa e hala ki he tangatá, ka ʻoku tuʻu hangatonu atu ia ki muʻa ʻiate ia, pea ko e tauhi ʻo e matapaá ʻa e Tokotaha Māʻoniʻoni ʻo ʻIsilelí; pea ʻoku ʻikai te ne nō ha taha kehe ke ne tauhi ia; he ʻoku ʻikai ke ʻi ai ha hala kehe kā ʻi he matapaá pē” (2 Nīfai 9:41).

Ko e hā ʻa e matapā ko ʻení? Naʻe fakamatala ʻe he palōfita ko Nīfaí:

“Ko e matapā ʻoku totonu ke mou hū aí ko e fakatomalá mo e papitaiso ʻi he vaí; pea ʻoku toki hoko ha fakamolemoleʻi ʻo hoʻomou ngaahi angahalá ʻi he afi mo e Laumālie Māʻoniʻoní” (2 Nīfai 31:17).

Pea ʻi he tafaʻaki ʻe taha ʻo e matapaá? Ko e hā ʻoku ʻomi ʻe Kalaisi ke tau lava ʻo maʻú? Naʻe pehē ʻe Nīfai:

“Pea ʻoku mou tuʻu ai ʻi he hala fāsiʻi mo lausiʻi ʻa ia ʻoku fakatau ki he moʻui taʻengatá” (2 Nīfai 31:18).

ʻOku tau haʻu ki he Fakamoʻuí pea hū ʻi he hala ko ʻení ʻi he:

• Tui kiate Ia.

• Fakatomala.

• Ngaahi ouaú mo e ngaahi fuakavá.

• Talangofuá.

• Kātaki ki he ikuʻangá.

Ko e moʻui taʻengatá ʻa e meʻa māʻolunga taha kuo tuku mai ʻe Sīsū Kalaisi ke tau lava ʻo maʻú. Ka ʻoku lahi foki mo ha ngaahi tāpuaki ʻokú Ne fakaʻatā maʻatautolu ʻi he moʻuí ni, lolotonga ʻetau ʻi he halá.

ʻOku finangalo ʻa e Tamai Hēvaní ke foaki kakato ʻa e ngaahi tāpuakí ki he tokotaha kotoa pē, ka he ʻikai ke Ne fakakounaʻi mai kinautolu [ngaahi tāpuakí] kiate kitautolu. Ko e ngaahi tāpuaki ʻoku tau maʻú ʻoku makatuʻunga ia ʻi he tuʻunga malava ʻoku tau fiemaʻu ke maʻu ai kinautolú pea mo e tuʻunga loto-fiemālie ke fakafeʻungaʻi kitautolu ki aí.

ʻI he ngaahi fuakavá, ʻokú ke maʻu ai ʻa e faingamālie ke maʻu ha meʻa makehe moʻoni. Naʻe akoʻi ʻe Palesiteni Nalesoni ʻo pehē:

ʻI hoʻo fakahoko ha ngaahi fuakavá, ʻokú ke kau ai ki ha vā fetuʻutaki makehe mo e ʻOtuá pea hoko ko e taha ʻo Hono kakaí. Pea ʻe toki hoko leva ha ngaahi meʻa fakaʻofoʻofa:

ʻI hoʻo feinga ke tauhi hoʻo ngaahi fuakavá, ʻe hanga ʻe he ʻOtuá ʻo:

• Tāpuekina koe ʻaki ha ʻofa mo ha ʻaloʻofa lahi.

• Fakamolemoleʻi koe ʻi he taimi ʻokú ke fakatomala aí.

• Tokoniʻi koe ke ke ʻilo ho hala foki kiate Iá kapau te ke hē.

• He ʻikai ke Ne teitei fiu ʻi Heʻene feinga ke tokoniʻi koé.

• He ʻikai teitei ʻosi ʻa e faʻa kātaki ʻaloʻofa maʻaú.

• Fai ʻa e meʻa kotoa pē te Ne lavá, ʻo ʻikai mole hoʻo tauʻatāina ke filí, ke tokoniʻi koe ke ke tauhi hoʻo fuakavá.

Naʻe akoʻi foki ʻe Palesiteni Nalesoni ʻo pehē:

Ko e hā ʻa e faʻahinga mālohi ko ʻení?

Hangē ko ʻení, te ke lava ʻo maʻu ha mālohi ke:

• Maʻu ha nonga mo ha faʻahinga mālōlō makehe.

• Ikunaʻi ʻa māmani pea tekeʻi ʻa hono ivi tākiekina maʻu peé.

• Ako.

• Fakatomala pea fakamāʻoniʻoniʻi.

• Maʻu ha ʻamanaki lelei, fakafiemālie, mo ha fiefia ʻi hoʻo fehangahangai mo e ngaahi faingataʻa ʻo e moʻuí.

• Maluʻi koe mei he ivi tākiekina ʻo e filí.

Ko ia, ko e hā leva ʻa e faʻahinga faingamālie ʻokú ke fiemaʻú? Pea ko e hā ʻokú ke fie fakahoko ke maʻu ai ʻa e meʻa ko iá?

ʻOku finangalo ʻa e Tamai Hēvaní ke ʻi ai ha vā fetuʻutaki vāofi ange mo koe pea ʻoatu ha faingamālie lahi ange ki Hono mālohí. Hokohoko atu ʻi he hala ʻo e fuakavá, pea te Ne foaki ia maʻau. ʻOfa kiate Ia ʻaki ho lotó kotoa. Talangofua. Fakatomala. Maʻu ʻa e sākalamēnití. ʻAlu ki he temipalé.

ʻI hoʻo tauhi ʻa e ngaahi fuakava ʻo e temipalé, ʻe ʻi ai ha ʻaho ʻe lava ke ʻoatu ʻe Sīsū Kalaisi ʻa e faingamālie taupotu taha ki he Tamaí—ke foki kiate Ia, hoko ʻo hangē ko Iá, pea maʻu ʻa e “meʻa kotoa pē ʻoku maʻu ʻe [he] Tamaí” (Tokāteline mo e Ngaahi Fuakava 84:38).

Ko hono moʻoní ʻokú Ne ʻoatu ke ke lava ʻo maʻu ʻa e meʻa kotoa pē.