Fanga Ngelí mo e Ngaahi Mana ʻo e Ngāue Fakafaifekaú

Naʻá ku pehē ange, “ʻOi, Kuleni, te u saiʻia ke haʻu ʻo tokoni atu. ʻOku ou ʻataʻatā ʻi he Tokonaki ko ʻení. ʻOku ʻikai ha meʻa ke u fai, ko ia te u ʻalu atu ʻo tokoni ke fokotuʻu ha neti.”

ʻI heʻeku aʻu atu ʻi he ʻaho Tokonakí, naʻá ne tangutu lelei mai pē ʻi hono seá ʻo talitali mai kiate au. Naʻá ma ō ki he ngoué, pea naʻá ku tokoniʻi ia ke fokotuʻu ʻa e netí. ʻOku ʻikai ke u ʻilo pe naʻá ku fakahoko fēfē ia, koeʻuhí ko ha ngāue faingataʻa, ka ʻoku kei tuʻu pē [netí] ʻo aʻu ki he ʻahó ni.

Naʻe ʻikai hangē ia ha fuʻu meʻa lahi kiate au ke tokoni kia Kulení—naʻe ʻikai ha meʻa ke u fai ʻi he ʻaho ko iá. Ka ko ha ʻaho mahuʻinga ia kiate ia. Naʻá ne akoʻi mai mahalo ko e ngāue tokoní ko e meʻa siʻisiʻi taha ia kiate aú, ka ki he tokotaha ʻe tahá, ʻe lava ke hoko ia ko e meʻa lahi tahá.

Naʻá ku kamata māmālie foki ʻi hono vahevahe ʻo e ongoongoleleí. ʻI he kamataʻangá, naʻá ku fuʻu manavasiʻi—mātuʻaki tailiili—ke vahevahe ʻa e ongoongoleleí mo hoku ngaahi kaungāmeʻá. Naʻá ku fakakaukau he ʻikai saiʻia hoku ngaahi kaungāmeʻá ʻi he lotú. Pea naʻe ʻikai ke u loto ke fakamamahiʻi kinautolu ʻi ha faʻahinga founga pe faikeheʻia.

Ka ke u kamatá, naʻe ʻomi ʻe heʻeku faʻeé ha kaati mei he ongo faifekaú ʻoku ʻi ai e tuʻasila ʻo e ʻapisiasí. Naʻá ku ʻoange ʻa e kātí ki hoku kaungāmeʻá peá u pehē ange, “Haʻu ki ha ʻekitivitī ʻa e toʻu tupú. He toki meʻa lelei moʻoni.” Naʻá ne haʻu ki he ʻekitivitií. ʻI heʻemau foki ki ʻapí, naʻá ne fakalongolongo pē ʻo aʻu [ki ʻapi]. Pea ʻi he uike hono hokó naʻá ne ʻeke mai, “Te ta toe ʻalu?” Naʻá ku pehē ange, “ʻOi, ko hoʻo moʻoni?” Pea talu mei ai mo ʻene toutou haʻu ki he ngaahi ʻekitivitií, pea aʻu pē ki he lotú.

ʻI he taimi naʻe talamai ai ʻe hoku kaungāmeʻá kuó ne mateuteu ke papitaisó, naʻá ku pehē ange, “ʻIo, kae kiʻi tatali angé he ʻoku ou fuʻu fiefia.” Naʻá ne fakaafeʻi leva homa kaungāmeʻa ʻe tahá ki he lotú, pea ko kimaua naʻá ma tokoniʻi iá. Badda Boom, badda bam—kuo papitaiso ʻeni ha toko ua ʻo hoku ngaahi kaungāmeʻá! Pea ʻoku mau feinga toko tolu ke tokoniʻi ha kaungāmeʻa ʻe taha ke haʻu ki he lotú pea papitaiso foki mo ia.

Kuó u mamata ki he tupulaki lahi ʻa e tui hoku ongo kaungāmeʻá kia Sīsū Kalaisí. ʻOku ou tui ʻoku lahi ange ʻena tuí ʻiate au ʻi he taimi ʻe niʻihi. ʻI heʻeku sio ki heʻemau tufa fakataha ʻa e sākalamēnití, ʻoku ou pehē, “He toki meʻa lelei moʻoni. Ko e meʻaʻofa lelei taha ʻeni kuo lava ke foaki mai kiate aú.” Naʻe kamata kotoa ia ʻi he kiʻi kaati siʻisiʻi ko iá pea iku ai ki ha toko ua naʻe papitaiso.

ʻOku kamata siʻisiʻi pē hono fakahoko ha liliú. ʻE lava ke mātuʻaki mahuʻingamālie hono tokoniʻi ha taha, ʻo aʻu pē ki ha kiʻi malimali ki ha taha. ʻI he taimi ʻokú ke fakatokangaʻi ai ʻa e faikehekehe ʻoku hoko ki he tokotaha ko iá, ʻokú ne ʻai koe ke ke loto ke hokohoko atu hoʻo ngāue tokoní. “ʻOku fakahoko ʻe he fanga kiʻi meʻa iiki mo faingofuá ʻa e ngaahi fuʻu meʻa lalahi” (ʻAlamā 37:6