Aduna bay mga butang nga kinahanglan dili nako iampo?

Si Presidente Jeffrey R. Holland, Akting nga Presidente sa Korum sa Napulog Duha ka Apostoles, miingon, “Kon ang atong ‘pangayoon dili sayop,’ walay kinutoban kon kanus-a, asa, o unsay atong iampo.” Unsa man ang buot ipasabot sa “pangayoon ang sayop”?

Si Santiago naghatag kanato og ilhanan: “Nangayo kamo, ug wala kamo hatagi kay daotan man ang inyong tuyo, kay aron lamang sa pagtagbaw sa inyong mga lawasnong kaibog” (Santiago 4:3). Mao nga kini gamay lang og kalabotan sa unsa ang atong gipangayo ug mas dako og kalabotan sa ngano. Kon kita mag-ampo nga puro lang kahakog ang gibati, tingali kita mangayo og sayop.

Mahimo kitang mopakigbahin sa atong mga gibati ngadto sa atong Langitnong Amahan, bisan ang atong mga gibati nga kadismaya ug kaguol. Kinahanglan kitang mangayo sa Iyang tabang. Kon kita makahimo og mga sayop, kinahanglan kitang maghinulsol. Kinahanglan kitang maningkamot nga magmasulondon ug magmatinuoron ug mangita sa kabubut-on sa Ginoo kaysa atong kaugalingong kabubut-on. Dayon kon kita mag-ampo, walay kinutoban kon unsa ang dapat natong iampo.

Mahimo kitang mangutana sa mga pangutana nga natubag na. Ug ang Dios mahimong inanay nga mogiya nato ngadto sa mga tubag nga nahatag na. Mahimo usab kitang mangutana sa mga pangutana nga wala gayod matubag sa Dios. Ug ang Dios mahimong magpadayon nga dili motubag. Ang labing mahinungdanon mao ang pagpangita sa Iyang kabubut-on ug mosalig nga Siya mas nasayod kay sa kanato.