Tinago nga mga Bahandi

Ang Manluluwas misulti kang Propeta Joseph Smith: “Ang tanang butang ngari kanako mga espirituwal, ug wala mahitabo sa bisan unsang panahon nga mihatag ko kaninyo og balaod nga temporal” (Doktrina ug mga Pakigsaad 29:34).

Temporal nagpasabot nga may kalabotan niining pisikal nga kalibotan. Dili ba ang Pulong sa Kaalam usa ka “temporal” nga balaod?

Bisan kadtong “temporal” nga mga balaod espirituhanon usab, sa labing menos tungod sa duha ka rason:

1. Kon kamo mosunod sa bisan unsa nga sugo, kamo mapaduol ngadto sa Espiritu Santo. Mas bation ninyo ang presensya sa Dios ug ang Iyang gugma. Klaro kaayo, espirituwal kadto nga mga panalangin!

2. Bisan ang kadaghanan sa “temporal” nga mga balaod adunay espirituhanong mga panalangin nga pihong gilakip. Pananglitan, ang Pulong sa Kaalam nagsaad og pisikal nga kahimsog (tan-awa sa Doktrina ug mga Pakigsaad 89:18, 20), apan nagsaad usab kini nga inyong “makaplagan ang kaalam ug dagkong mga bahandi sa kahibalo, bisan ang tinago nga mga bahandi” (Doktrina ug mga Pakigsaad 89:19).

Dili nato hingpit nga masabtan ang tanang paagi nga ang espirituhanon nga kahimsog makaapekto sa pisikal nga kahimsog—ug vice versa. Sa kataposan, ang tanang mga sugo espirituhanon dili lamang tungod kay ang Dios espirituhanon apan tungod kay mao kita.

Kon kamo moserbisyo og misyon karon, kamo adunay kauban sa kanunay ug puy-anan. Bisan asa ka tawagon, ang Simbahan aduna nay presensya didto. Mahibalo dayon kamo kon unsa kadugay ang gilaoman nga moserbisyo kamo.

Walay usa niana ang tinuod alang sa unang mga misyonaryo sa gipahiuli nga ebanghelyo!

Ang mga lalaki nga midawat sa mga tawag sa sayong bahin sa 1830s kasagarang mibiyahe nga nag-inusara ug walay daghang temporal nga suporta samtang sila midala sa bag-ong gipahiuli nga ebanghelyo ngadto sa dapit diin walay usa nga nakadungog niini sukad. Ang ilang mga call wala magtakda og gidugayon—una sa tanan, “Lakaw ug isangyaw ang ebanghelyo hangtod nga makadungog ka og lain.”

Ug ang Simbahan pormal lang nga naorganisar niadtong 1830—matag misyonaryo bag-o usab nga kinabig!

Ang pagserbisyo og misyon aduna gihapoy mga hagit. Si Parley P. Pratt dili kinahanglan nga mabalaka mahitungod sa makabalda nga internet, pananglitan. Apan ang tibuok proseso mas hapsay, mas luwas, ug mas organisado karon. Kita kinahanglan nga magpasalamat niadtong unang mga misyonaryo kinsa mipahimutang sa pundasyon ug mihimong mas sayon alang kanato nga mopakigbahin sa ebanghelyo ngadto sa matag nasod.

Ang mga kasulatan napuno sa positibo nga mga panig-ingnan. Nagpakita nato unsa ang buhaton. Apan ang pipila ka mga panghitabo sa mga kasulatan mao ang inyong matawag nga “mga istorya sa pagpasidaan”—mga ehemplo sa dili angay nga buhaton.

Usa niana mao ang makapasubo nga istorya ni James Covel, usa ka ministro kinsa gipaila-ila sa ebanghelyo ug miingon nga iyang sundon ang bisan unsang sugo nga gihatag sa Ginoo kaniya pinaagi ni Propeta Joseph Smith.

Ang seksiyon 39 sa Doktrina ug mga Pakigsaad mao gayod ang iyang gipangayo: usa ka pagpadayag alang kaniya sa personal nga misulti kaniya unsa ang gusto sa Ginoo nga iyang buhaton ug unsa ang iyang mga panalangin sa pagbuhat niini (tan-awa sa Doktrina ug mga Pakigsaad 39:10–13).

Ang seksiyon 40 mao ang makapahigawad nga epilogue: Wala niya kini buhata. “Malipayon siya nga midawat sa pulong,” misulti ang Ginoo, “apan diha-diha dayon gitental siya ni Satanas; ug ang kahadlok sa pagpanglutos ug ang mga kabalaka sa kalibotan mao ang hinungdan sa iyang pagsalikway sa pulong.” (Doktrina ug mga Pakigsaad 40:2).

Si Brother Covel milapas sa pakigsaad nga iyang gihimo (tan-awa sa Doktrina ug mga Pakigsaad 40:3). Basin makasimpatiya kita kaniya—Gihangyo siya sa paghimo sa lisod kaayong desisyon nga pagbiya sa simbahan diin siya nahimong ministro sulod sa 40 ka tuig! Pero makakat-on usab kita gikan sa iyang sayop.