Tulo ka Tuo-tuo mahitungod sa Kahimsog sa Pangisip

Unsa ang normal? Nakakita na ba ka og anglerfish [gatasan]? Sila adunay nagbitay nga suga sa agtang ug kasagaran nagpuyo sa lawom nga kadagatan. Ug ang mga langaw motilaw gamit ang ilang mga tiil.

Unsa ang buot ipasabot niini? Kining maanindot nga kalibotan nagpamatuod nga ang pagkadaiya kabahin sa plano sa Dios.

Ang matag usa kanato adunay nagkalain-laing kombinasyon sa mga talento, mga interes, ug mga kinaiya. Atol sa atong kinabuhi sa kalibotan, ang matag usa kanato makasinati og nagkalain-laing kombinasyon sa mga panalangin ug mga hagit.

Mao nga nganong naglaom man kita sa tanan nga mahisama?

Ang Dios, sa pagkatinuod, naghatag kanato og piho nga mga sugo ug gusto nga kitang tanan mosunod niini tungod kay Siya nakahibalo nga kini magdala kanato og hingpit nga kalipay. Apan adunay sobra sa usa ka “eksakto” nga paagi sa pag-atubang sa kasagaran nga mga sitwasyon sa matag adlaw.

Pagsikit sa Espiritu ug ayaw kahadlok sa pagsaulog sa maayo nga mga butang nga nag-inusara nga ikaw!

Tinuod nga ang paglapas og mga sugo mopadulong ngadto sa kasubo sa mas dali o mas dugay pa. Apan kana ba nagpasabot nga matag higayon nga ikaw magul-anon, ikaw tingali nakahimo og usa ka butang nga sayop?

Dili! Nakahibalo ka ba kon unsa pa ang makapaguol nato? Regular nga kinabuhi! Walay kakulangan sa makapasagmuyo nga mga panghitabo—sama sa mga katalagman, sakit, ug sayop nga mga pagpili sa katawhan—nga dili nato sayop.

Kon kini nga lisod nga mga butang mahitabo, pasagdi ang imong kaugalingon nga magbangotan. Mag-ampo. Pagpraktis og ginhawa og lawom ug pagtugot sa mga pagbati nga moabot ug mawala.

Kon ang magul-anon nga mga pagbati mikabat na og mga semana, tingali ikaw nakasinati og mas grabe nga mga butang sama sa depresyon, ug tingali nagkinahanglan ka og pipila ka ekstra nga tabang. Sama nga adunay mga doktor nga motabang aron maayo ang atong pisikal nga mga lawas, adunay mga propesyonal nga motabang nato nga maayo sa mental ug emosyonal nga paagi. Pagsugod pinaagi sa pagsulti ngadto sa usa ka ginikanan, lider, o lain nga hamtong kon unsa ang imong gibati.

Ug … balik sa orihinal nga pangutana: Kon nagtuo ka nga ang imong kaguol mao ang resulta sa sayop nga mga pagpili nga imong nahimo, pag-ampo ug pagpakig-istorya sa Dios mahitungod niini. Tingali makatabang usab ang pagpakig-istorya sa imong bishop. Kanunay nga adunay paagi pabalik sa kalinaw, salamat sa Pag-ula ni Jesukristo!

Ikaw ba mibati na nga nahadlok kaayo nga makahimo og sayop nga ikaw naglikay sa pagsulay og buhat og usa ka butang nga bag-o tungod kay basin og masayop ka? Kon mao, aniay pipila ka butang nga angay hunahunaon:

• Nakahibalo ang Dios nga ang kasakit kabahin sa mortalidad. Mao nga ang Iyang plano naglakip sa usa ka Manluluwas gikan sa sinugdanan.

• Kita makaampo alang sa grasya ni Jesukristo nga molig-on kanato sa atong mga kahuyang ug mga kakulangon. Ug kon kita makasala, kita makahinulsol ug mahimong mapasaylo. Mao kana ang rason nganong ang Pag-ula ni Jesuskristo nindot kaayo!

• Ang mga kasulatan nag-awhag kanato sa “[pag]duol ngadto kang Kristo ug [mag]hingpit diha Kaniya” (Moroni 10:32) Ang kahingpitan dili mahitabo niini nga kinabuhi. Human nga kita mabanhaw, kita sa kataposan mahimong hingpit sama Kaniya.

Pagmapailobon sa imong kaugalingon. Pagtutok sa unsay maayo nimong gibuhat. Ug kon ikaw masayop, pagkat-on gikan niini ug padayon sa unahan!